اسٹوڈنٹ ونگز ءِ نیمگ ءَ اسحاق خاموش ءِ دیوان
دیوان ھال : شرپ شاد

21 اکتوبر2018 ءَ اسٹوڈنٹس ونگز لیاری ءِ نیمگا مئے دوست ءُ سنگت اسحاق خاموش ءِ نام ءَ یک مراگشے کراچی ءِ دمگ بغدادی لیاری ءَ برجم دارگ بوت ، مراگش ءِ دو بہر ات انت ۔ اولی بہرءَ وحید نور ، ضیا بلوچ ءُ شرف شاد (بزاں اے کسترءَ ) اسحاق خاموش ءِ ازم ءُ شخصیت ءِ بابت ءَ گشتانک دات ، پدا نامداریں گشندہ خورشید بلوچ ، وھاب بلوچ ءُ سہیل خورشید بلوچ ءَ اسحاق خآموش ءِ شعرے گوں وش گٹی ءَ پیش کت ۔ اولی بہرءِ جارچین اسٹودنٹس ونگز ءِ باسک ہزاراں بلوچ ات ۔ دومی بہر ءَ شعر ءُ شاعری دیوانے بوت کہ آئی ءِ تہا اُستاد نور محمد نورل ، ظفرکریم ، حسن علی حسن ، ظفراکبر ، زاہدہ رئیسی ، عمران ثاقب ،ساجد نور ، میرساگر ، اصغر لال ءُ اے دگراں وتی وتی شعر پیش کتگ انت ۔ اے بہر ءِ جارچین بلوچی ءُ اردو ءِ شاعر سانی سید بوتگ ۔ اسحاق خاموش ءِ شرف ءَ بوتگیں دیوان ءَ کراچی ءُ بلوچستان ءِ بلوچانی یک مزنیں مچی یے گندگ بوتگ کہ آہانی تہا ڈاکٹر رمضان بامری ، رمضان بلوچ ، اختربہادر ، عبدالواحد بلوچ ، گلزار گچکی ، عبید شاد ، جمیل امام ، سرفراز بلوچ ، بہرام بلوچ ، سلیمان رئیسی ءِ نام گرگ کرزاَنت ۔ کساس 4 ءُ 5 کلاک ءَ برجاہ بوتگیں دیوان ءَ مزنیں کساسے ءَ مردماں بہر زرتگ کہ آہانی تہا زالبول ءُ نودربرہم ہوار بوتگ انت ۔ اسحاق خاموش بلوچی زبان ءِ یک مزنیں شاعر ءُ نبشتہ کارے ءُ آئی ءِ شرف ءَ بوتگیں دیوان لیاری ءِ یادگاریں دیواناں شمار بیت ۔ اسٹوڈنٹس ونگز کہ آئی ءِ بنجل لیاری ءِ دمگ کلری ءِ میتگ علی محمد میتگ ءَ انت ۔ اسٹوڈنٹس ونگز ءِ گیشتریں باسک نودربر ءُ کساں سالیں ورنا انت بلے آہاں اے مراگش ءِ انتظام جوانیں وڑے ءَ کتگ ات اے وڑیں براہدار ءُ شوقیں مراگشے برجم دارگ ءَ اسٹوڈنٹس ونگز ءِ باسک ستاکرز انت ءُ ما آہاں مبارک باد دئیں