اُستاد عبدالمجید گْوادری ءِ نام ءَ
چہ آرسی ڈی سی کونسل گْوادر ءِ نیمگ ءَ برجاہ داشتگیں “کتابانی مراگاہ”
اُستاد عبدالمجید گْوادری ءِ نام ءَ
ــ اِسحاق خاموشؔ
چہ گْوستگیں پنچ سالاں آرسی ڈی کونسل گْوادر کتابانی مراگاہ ءَ برجاہ داران اِنت کہ اے مراگاہ ءِ تہا چہ ہَندی دَمگاں ابید کراچی، شالکوٹ ، اسلام آبادءُ دگہ جاگہانی شاعر ، نبشتہ کار ءُ کتابانی چاپ کارءُ شِنگ کار بہر زُورنت۔اے رندی اے چار روچی کتابانی مراگاہ(15 تاں 18 مارچ 2018) کہ اُستاد عبدالمجید گوادر ی ءِ نام ءَات آکسفورڈ پریس ءِ ہاسیں کُمک ءَ برجم دارگ بُوتگ اَت ءُ اکسفورڈ پریس ءِ منیجنگ ڈائریکٹر بانُک امینہ سیّد ءَ وت ہم بہر زُرتگ اَت۔اے کتابانی مراگاہ ءِ مستریں جْوانی اے بُوتگ اَت کہ اے مراگاہ ءِ تہا کُلّ 23 کتابانی چاپ کار ءُ شِنگاراں بہر زُرتگ ات ءُ آہاں وتی کتابانی اسٹال جتگ اِتنت ءُ یک رپورٹے ءِ رِد ءَ اے چاریں روچانی تہا سینزدہ لکّ ءُ ہژدہ ہزارکلدار ءِ کتاب بہا بُوتگ اَنت ۔ گْوستگیں سال ءَ 7 لک ّ ءُ چیزے ءِ کلدار ءِ کتاب بہا بُوتگ ات ءُ اے گپّ ءِ درانگازی چہ کراچی ءُ شال ءَ اتکگیں نبشتہ کار ءُ لبزانکی مردُماں وت کُتگ ات کہ چار روچ ءِ تہا اینچو کتاب ءِ بہا بُوہگ یک ریکارڈے۔
اے ” کتابانی مراگاہ ءِ تہا کُلّ 30 سیشن ایر کنگ بُوتگ اِتنت۔” کتابانی مراگاہ ” ءِ بِندات گوں بلوچی سُروز ءَ کنگ بُوت۔
مراگش ءِ تہا اُستاد عبدالمجید گوادری ءِ زِند ءُ شاعری ءِ باروا علی عیسیٰ ، پروفیسر اے آرداد، غلام فاروق ءُ ڈاکٹر انورجمال ءَ تْران کُت۔
ماں ” چاگرد ءَ کتاب ءُ لبزانک ءِ ارزِشت” ءِ ڈاکٹر کہور خان، اُردو ءِ نبشتہ کار فاطمہ حسن،امینہ سید، زاہدہ حناؔ ئَ تْرا ن کُت، وہدیکہ آرسی ڈی سی کونسل ءِ سروک ناصر رحیم سُہرابی ءَ مراگش ءَ اتکگیں مہمان وش اتک گُشت اَنت۔دمانے ءَ پدا اُستاد عبدالمجید ءِ زِند ءِ سر ءَ جوڑ کُتگیں ڈاکیومینٹری تامُر پیشدارگ بُوت۔
بلوچی ءِ جْوانیں اِزمکار سرفراز محمد ءُ آئی ءِ ہمراہاں گوں وتی جْوانیں اِزمکاری ءَ جی آرمُلّا ءِ لچّہ ” چتور من حیال ءِ کتاب ءَ بہ پیچاں” ءِ سرا وتی اِزمکاری پیشداشت۔اے لچّہ ءِ سرا اِزمکاری ءِ سوجکار نامداریں آزمانک نویس یونس حُسین ات ءُ پہ دمانے ءِ ہاتر ءَ چاروک ءُ گوشداروکانی حیال ئےِ گوں وت ءَ مُلما کُت۔چریشی ءَ پیسرچہ خیرجان آرٹ اکیڈمی گْوادر ءِ نیمگ ءَ میدانی زِندءِ سرا”فشرمین لائف” اُستاد عبدالعزیز بلوچ ءِ گُشتگیں سؤتے ءِ سرااحسان دانش ، شاہ نواز، رفیق کمانڈو، بشیر آس، زُہیب جان، عبداللہ، عزیز ہارون ، تانیہ اختر ءُ جلیل قادر ءَ وتی اِزم ءِ کمال پیشداشت۔
” بلوچی رِدانکی لبزانک ، مرچی، زیکّ ءُ باندات ” ءِ سرحال ءَ مقبول ناصر، چندن ،اسحاق خاموش ءُ پروفیسر اے آرداد ءَ تْران کُت ءُ اے مراگش ءِ جارچین ہم پروفیسر اے آرداد ات۔
” گوادر کتابانی مراگاہ” ءِ دوم روچ ءَ دلوش دانا( اعجاز زاکر) ءِ کتاب ” دْروگ نہ بنداں” ءُ عیسیٰ گُل ء کتاب ” کلاگ نہ زیراں” ءِ دیمدرائی بُوت کہ اے کتابانی سرا آصف شفیق ءُ پُلّان عُمر ءَ تْران کُت۔چریشی ءَ پدورنائیں شاعر اکمل شاکر ءِ اُردو لچّہانی کتاب ” نظم کہ ساحل پر”ءِ دیمدرائی بُوت کہ اکمل ءِ شاعری ءُ کتاب ءِ سرا فاطمہ حس ءُ اے دگراں تْران کُت۔
اے ڈی بلوچ کہ پی ٹی وی جْوانیں اِزمکارے ورناہانی بے روزگاری ءِ رِد ءَ وتی نبشتگیں کِسّہ ” جان محمد گولڈ میڈلسٹ گوں ” وتی جْوانیں اِزمکاری ءَ مہلوک ءِ دیما پیش کُت۔
چریشی ءَ پدا ہشت لُکّیں تامُر ماں مراگش ءِ دیما پیشدارگ بُوتنت ۔اے مراگش ءِ جارچین یونس حُسین ات۔
” کتابانی مراگاہ ” ءِ تہا زباد بلوچ، حمل خان ، صدف بلوچ ءُ شاہینہ رشید ءِ جوڑ کُتگیں پینٹگز ہم پیشدارگ بُوت اَنت کہ مہلوک ءَ مزنیں کساے ءَ دوست بُوتنت۔حمل خان بلوچی ءِ نامداریں نبشتہ کار واجہ غنی پرواز ءِ بچّ اِنت ءُ مروچاں ماں شالکوٹ ءَ یک دربرجاہے ءَ اُستاد اِنت ، وانینگ ءِ ہمرائی ءَ وتی اِزم ءَ ہم دیمرئی دیان اِنت ۔ وہدیکہ زباد بلوچ ءِ سْیادی چہ آواران ءِ دمگ تیرتیج ءَ اِنت۔ چہ 2007 ءَ گوں آرٹ ءَ ہمگْرنچ اِنت ۔ زباد بلوچ ءِ کہول سکّیں غریب ءُ نیزگارے بلئے زباد ءِ اِرادگ سکّ باز مُہکم اَنت ءُ وتی باندات ءِ درگیجگ ءَ بے ہاٹی نہ اَنت۔پینٹگزانی باروا ادارہ ءِ ثقافت بلوچستان ءِ گْوستگیں ڈائریکٹر عبداللہ بلوچ ءَ تْران کُت۔
چہ ” زنبیل ” ءِ نیمگ ءَ آصف فرخی ءِ ریڈیائی کسمانک” سمندر کی چوری”اوں پیش کنگ بُوت۔
مراگش ءِ تہا نامداریں نبشتہ کار ءُ معیشیت ءِ زانتکار قیصر بنگالی ءِ کتاب “A Cry for Justice ” ءِ دیمدرائی بُوت کہ ایشی ءِ باروا ڈاکٹر کہور خان بلوچ ءَ تْران کُت۔
” چاگردی دیمرئی ءُ زانشت ” ءِ سر حال ءَ ڈاکٹر فاطمہ حسن ، امر سندھو، امینہ سید ءُ قیصر بنگالی ءَ تران کُت وہدیکہ جارچینی ءِ ڈُبّہ قیسر بنگالی ءَ زُرتگ ات۔ضیا بلوچ ءِ نوک چاپ بُوتگیں کتاب ءِ سرا عبید شاد ءُ غفور شادؔ ءَ جْوانیں وڑے ءَ تْران کُت۔
مراگش ءِ تہا گُلزار گچکی ءِ پٹّ ءُ پولی کتاب ” اِلّاں بیس ، اِلی اللہ ” ءُ حانی بلوچ ءِ کتاب ” زِند ءِ ادینک ” ءِ ہم دیمدرائی بُوت کہ اے کتابانی سر اَمر سندھو، گُلزار گچکی، حانی بلوچ، احمد ندیم ءُ عبدالرحیم بلوچ ءَ تْران کُت۔حانی بلوچ ءِ کتاب ءِ باروا اَمر سندھو ءِ گُشگ ات کہ حانی بلوچ زالبول ءِ زِند ءِ جیڑہانی باروا اَنچیں سرحال چِست کُت اَنت کہ چِد ءُ پیسر اہانی سرا گپّ ءُ باوست نہ بُوتگ اے کتاب پہ بلوچ چاگرد ءَ یک مزنین ارزشتے داریت۔گُلزار گچکی ءِ کتاب ” الّاں بیس ، اِلی اللہ” ءِ تہا کہ سینزدہ سرحانی سرا گپ جنگ بُوتگ کہ اِشانی سْیادی گوں ماہی گِیری ءِ تک ءَ اِنت۔گُلزار گچکی ءَ وتی کتاب ءِ تہا میدانی زِند ءِ جیڑہانی باروا نبشتہ کُتگ ءُ اے کتاب ماہی گیری ءِ تک ءَ یک جْوانیں مالومداری کتابے۔اے مراگش ءِ جارچین عبداللہ عابد ات۔کتابانی اے مراگاہ ءِ تہا یک شعری دیوانے اوں اڑ دیگ بُوتگ ات کہ ایشی ءِ تہابلوچی، اُردو ءُ سندھی ءِ نامداریں شاعراں بہر زُرت ءُ گْوادر ءِ بیگاہ ءِ جوناکی گیش کُت۔ مراگش ءِ جارچین پروفیسر اے آرداد ات۔شاعرانی تہا افضال احمد سید، اَمر سندھو، فاطمہ حسن،تنیور انجم،ارشاد پرواز، زُبیر مُختار، اسحاق خاموش، ظفر اکبرؔ،محسن بالاچ، ڈولی بیگ، غین نُون گُل، عارف عزیزِ مُحسن بالاچ، عبداللہ عابد، بہار علی گوہر، ضیا بلوچ، فرید فراق ، عابد علیم، مُجیب ممجاہد، عالم سیف، وسیم وارث،علی چراگ، زاہد سلیمان، پُلان عُمر، امبر سمین، یونس واہگ، شاہ میر دیدگ، چندن ساچ، زِرنگار، آزاد علی، عبید ارمان، خالد ہُما، وحید نُورءُ صبا گُلزار ءِ نام ہوار اتنت۔
اُستاد عبدالمجید گْوادر ی ءِ نام ءَ برجاہ داشتگیں کتابانی اے مرگاہ ءَ اے سال یاتگار کُت ءُ اے سوبمندیں جُہد ءُ کوشست ءَ ناصر رحیم سُہرابی ءُ آئی ءِ ہمراہانی کِردستاکرزیت