بلوچی بنگیجی دوئیں گدارانی نبشتہ ئی رمس
نبشتانک
نبشتکار:اصغرزہیر
بلوچی بنگیجی دوئیں گدارانی نبشتہ ئی رمس
اے ساھتءَ فقیرمحمد عنبرءِ گدار ”نلءِ توار“ءُسیدھاشمیءِ گدار”نازک“منی دیمءَ اَنت۔من اے دوئیں گدارانی تکنیک،شریءُ نزوری یاکہ دگہ پھتاتانی سرءَ نبشتہ نہ کناں،بلکن ھمے کتابانی نبشتہ ئی رمسانی سرشونءَ یک جستءُ سلاھے ایرکناں۔
بازپولکارءِ گشگ ھمیش انت کہ بلوچیءِ بنگیجی گدار ”نلءِ توار“انتءُ بازءِ گشگءِ ردءَ ”نازک“ اِنت۔بلے گیشتر ”نازک“ءِ منوک اَنت۔دوئیں کتابانی پیشگالی سرشوناں چہ پیسر یک گپےءِ گشینگءِ جھد کناں کہ پولکاری رھبند ءَ دو بنداتی ساچشتانی دیم پہ دیم کنگءَ بائد چاپکاریءِ رمسءِ زورگءِ بدلءَ کتابءِ سرجم بوھگءِ رمس زورگ بہ بیت۔اے منی ھیال انت،بلے من رد اوں بوت کناں۔الم نہ اِنت کہ چوش بہ بیت۔من اے گپءَ پمیشکا جنگءَ اوں کہ اگں یک کتابے بیست سال پیش نبشتہ بوتگءُ یک دگہ کتابے انوں نبشتہءُ چاپ بوتگ،آ بیست سال پیسری کتاب انگہ چاپ نہ بوتگ۔آ کہ دگہ بیست سال پد چاپ بیت،گڑا دوئیں کتابانی زمانگاں سک باز پرک بیت۔نوں کہ دوئیں کتاب پولکاری رھبندءِ دیمءَ ایربنت گڑا بائد آ کتاب کہ پیسرا نبشتہ بوتگ ءُ رندءَ چاپ بوتگ،آ کوھن تر گشگ بہ بیتءُ اے کہ رندءَ نبشتہ بوتگءُ پیسرا چاپ بوتگ اے نوک تر گشگ بہ بیت۔پولکار ی رھبندءَ چاپ بوھگءِ رمسءَچہ کتابءِ سرجم بوھگءِ رمس گیشتر ارزشت دئیگ بہ بیت۔
نوں کاھاں اسل بن گپءِ نیمگءَ،”نلءِ توار“ءَ انچوش کہ پچ کنئےدومی تاکدیمءَ”حال“ءِ سرھالءَ چار دانک انت کہ آھانی چیرءَ 5مئی 1960نبشتہ اِنت۔ابراہیم عابدءَ پیشگال 5جون1987ءَ نبشتہ کتگءُ آئیءِ گشگءِ رِدءَ اے بلوچیءِ اولی گدار اِنت کہ سرجمیءَ پدچاپگءِ واک ئےِ نہ بوتگ۔کتاب 1960ءَ نبشتہ بوتگءُ چاپ 1987ءَ ،بزاں 27 سالءَ پد۔
فقیرمحمد عنبرءَ ھمے کسانیں ”حال“ءِ گڈسرءَنبشتہ کتگ :”اے گنوکی منی پشت دردیءِ مُزاِنت کہ ”نلءِ توار“ءِ دروشمءَ شمئے دستءَانت۔کیت روچے یلیں زانتکارھمے راہءَ منی رنداں گراَنت“ادءَ واجہءِ ارادگ ھمے بوتگ کہ آ 1960ءَ کتابءَچاپ بہ کنت۔بلے ابراہیم عابدءَ پیشگالءَنبشتہ کتگ :”نلءِ توار یک ھسابےءَ بلوچی لبزانکءِ اولی ناول اِنت۔پرچاکہ واجہ عنبرءِ گشگءُ ناولءِ نبشتہ کنگءِ تاریخءَ چہ ھمے پدربیت کہ اے ناول واجہ عنبر ایشیءَ را چاپ کنائینت کت نہ کتگ۔“
نوں کاھاں گدار”نازک“ءِ نیمگءَ ۔اے گدارءِ پیشگال سیدھاشمیءِ جندءَ نبشتہ کتگ۔(آ وھدءَ زانا پیشگال ءُسردانکءِ گالبند گشینگ نہ بوتگ اَنت)۔پیشگالءِ تاکدیم 7ءَ واجہءَ نبشتہ کتگ :”ماں ”رم امبار“ءَ یکے ھمے ”نازک“ات۔اے بیست تاکدیمی آزمانک یاداستانے ات کہ سال 1958 یا 1959ءَ نبشتگ ات۔ءُ انوں 1969اَت۔چہ دہ سالءِ دراجیں مُدتءَ رند کہ من پدءَ چمے چاراِت،گوش ئےزاناں دلءَ یک نوکیں دوستی یے پہ ایشی ءَ چست بوت۔ءُ لوٹ اتوں کہ کمیں ایشیءَ دراج ترءُ مستر بکناں۔“
بزاں فقیرمحمدعنبرءِ گدار 1960ءَ سرجم بوتگءُ سیدھاشمیءِ انگہ 1969ءَ سرجم نہ بوتگ۔بنداتءَ آئیءَ وت نہ زانتگ کہ بیست تاکدیمی آزمانک یاکہ داستانے۔بلے عنبرءَ 1960ءَ گوں دلجمی اے گپ جتگ : ”کیت روچے یلیں زانتکارھمے راہءَ منی رنداں گر انت۔“
1969ءَ کہ واجہ سیدھاشمیءَ گدار سرجم کتگ،گڑا چریشی ابید اوں دلجم نہ بوتگ کہ چے یے۔پمیشکا واجہءَ کریم دشتیءُ بیگ محمد بیگلءَ پیش داشتگ ءُ ھماھاں گشتگ کہ اے گدارے۔اودءَ ابراہیم عابد وتی پیشگالءَ گشگءَ انت کہ ”نلءِ توار“یک ھسابےءَ بلوچیءِ اولی گدار اِنت،ءُ 1960ءَ واجہ عنبرءِ جند ءَاوں گوں دلجمیءَ نبشتگ کہ ”کیت روچے یلیں زانتکارھمے راہءَ منی رنداں گر انت۔“ءُ واجہ سید ءَاوں وتی پیشگال ءَ نبشتگ ”تھنا اے گپ نہ اِنت کہ ”نازک“منی نبشتگیں بنگیجی گدار اِنت۔بلے اے ھم گواچنی ءُ مُدّنی انت کہ بلوچی زبانءِ دپترانی ھم بنگیجی گدار اِنت۔“
اے گپ الّم اِنت کہ واجہ سید 1969ءَ سرپد نہ بوتگ کہ ”نازک“ ءَ پیش 1960ءَ نبشتگیں گدارے است اِنت کہ پہ چاپءَ مھتل اِنت۔
جست ایش اِنت کہ بلوچیءِ بنگیجی گدار چاپءِ ھساب ءَزورگ بہ بیت یاکہ کتابءِ جندءِ نبشتہ ئی رنگءَ سرجم بوتگیں رمس ءِ ھسابءَ زورگ بہ بیت۔رھشونی پکار اِنت۔