بنیاد پرستی و ادیب۔ سلطان نعیم قیصرانی
بنیاد پرستی و ادیب
سلطان نعیم قیصرانی
گیستمی صدی ئے آخری دھاگ باز پر آشوب ایں۔1990ئے آخری دھاگ ئے اول سر ایں۔ پرشت پروش ئے عمل ہر میدان نیاماباز تیزیں ۔ معلوم بیث کہ گیست و یکمی صدی سیاسی ، مالی و جغرافیائی حوالہاں شہ دنیا ئے نقشہ اندرا گوں بازیں تبدیلیاں بنا بیث ۔ بنیادی سبب ایش اِنت کہ انسان ئے زانت (کائنات و ذات ) پختہ تر بیغیں۔ گیسمتی صدی ئے شروع انسان ئے طبقاتی زانت ئے ترند تربیغ ئے دور و باری ایں۔ دومی مزائیں جنگا شہ رندا سوشلسٹ بلا ک ئے محکمی ئا اے شعورمہمیز کثہ، آنہی نتیجہ ئا دنیا ئے نقشہ لافا بازیں انقلاب آتکغ انت۔ جرمنی نیا ما فاشزما پروش واڑتہ ۔ آنہی پروشا انگریزی استعمارا ہمِکریں دھکے داثہ کہ وختے کہ آنہی بادشاہی چکا روش ایرشت نیست اَت ، نی آں داں یونائیٹڈ کنگڈما محدود بیثہ ۔ آنہی مقابلہ نیاما امریکہ یک نوخیں سامراجے ڈولا دیما آتکہ۔ پرچہ کہ دومی مزنیں جنگا امریکا ئے سرا براہ راست ہچ منفی اثر نخثہ بلکہ نازی جرمنی ئے سائنسدان و زانتکار درکپتو امریکائا شتغ انت و اوذا سائنس ٹیکنالوجی و صنعتا را نوخیں ردومے داثیش۔ آنہی نتیجہ ئا امریکہ سرمایہ داری ئے آخری منزل بزاں داں سامراجا پُجثہ۔ آنہیا وثی ہمے تاگتا شہ کار گپتو جدید نو آبادی نظامے بنا کثہ و ہر آں ملک کہ اے شیطانی نظام ئے جنترانی پُڑانی شیرا نارغ و چینہگغا اثاں آنہانی محنت کش اولس ئے طبقاتی شعور دہ ودھثہ ۔ اے شعور ئے ودھائنیغ نیاما ادیب و زانتکاراں وثی رول پیلوی ئا ادا کثہ۔ رافیل البرٹی‘رومین رولاں‘ بنجامن مولائس ‘آزات جمالدینی ۔۔ و فیض ئا ابید صدہا دومی نام است انت ، آنکہ ادبی تاریخ ئے آزمانا جلشکوخیں استارنت ۔ طبقاتی زانت ئے ترندتر بیغا گوں آزادی ئے زرمبشتاں جدید نو آبادتی نظام ئے زوراخی خلافا زور بستہ ، ھندے ئا اے زر مبشت گوں سوبھا وثی منزلا شتو سربیثغنت و ھندے آں وثی دری و اندری حالتانی سببا پذا سراتکغ انت ۔
گیستمی صدی ئے آخری دھاگ نیاما دنیا ئے پرشت و پروش ئے عمل یک نوخیں دَورے نیاما داخل بیثہ۔ انسان وثی کائنات و زانت و شعور ئے پختگی ئا گوں دیما روغیں۔ مشرقی یورپ و سوشلسٹ دنیا وثی پہناذاں بدل کھنغ ایں ۔ دراھیں دنیا ئے دیما اے نوخیں نہرے بڑز بیغ ایں کہ آں کلیں دنیا آ گوں نوخیں چیلنجا ں دیم پہ دیم کھنغ ایں ۔ پریسترائیکایاگلاس نوسٹ ئے اے عملا اوذا کہ فرد و فکر و سیاسی آزاتی ئے نوخیں راہ بوتکغنت اوذا آنہیا قومی و مذہبی بنیاد پرستی ئے لہر دہ گوں نوخیں تاگتے ئا دیما آڑتہ ۔ اے قومی و دینی بنیاد پرستی ئے جنون ایران ، ہندوستان ، پاکستان، افغانستان، مصر، عراق و ترکی ئا ابید مشرقی یورپ و وث سوویت یونین ئے جند نیاما دہ گندغ بیث ۔ ترقی پذیر دنیا نیاما اخوان المسلمین، جماعت اسلامی،حزب اسلامی او راشڑیہ سیوک سنگ ئے شکل نیاما،یا پہ ناما قومی علاقائی پارٹیانی ڈولا سہرا و پدرا انت۔ آں مُلکالی نیاما کہ جمہوری عمل و جمہوری ادارہ محکم انت اوذا شاید اے ڈولیں جنوں تاں دیر جُزِث مونت پر اوذا کہ جمہوری عمل مارشل لا و فوجیانی دستاں شہ بے ہند بیثہ آں ملکانی نیاما چوشیں تحریک پہ زانت دیم آرغ بیثغنت تاکہ آں جمہوری قوتانی مقابلہ ئا نہ صرف دیم پہ دیم اوشتات بنت بلکہ آنہانی سربورینغ ئے واستا دہ گوں ہماں غیر جمہوری تاگتاں دزکمک کث کن انت۔
شاونزمِ قومی بیث یادینی بہرحال شاونزم ایں ۔او اے بنیاد پرستی ئے یہ مظہرے ۔آں امن و جمہوریت ئے ضدیں۔ ہمے واستا مروشیگیں ادیباں اے گنڑغ و وزت کھنغ پہ کاریں کہ اشی خلافا جنگ و جتل ہیلسنکی ئے ہماں قرار داد ئے وڑا جاری کھنغی بیث۔ آں قرار داد تہا اے فیصلہ بیثغہ کہ فاشزم ئے ضد جنگ دراہیں دنیا ئے ادیبانی جنگیں ۔
’’ماامن لوٹوں ، کپوت مئے امن ئے سمبل انت اوقلم مئے چیذغ ۔ماآنہی عزت سرا ہچ ٹوک آغا نیلوں۔ اے قول ہماں قرارداد کنغ بیثہ۔ اشی سرا کل ادیباں نہ صرف دزخت کھثغ انت بلکہ آنہاں ہسپانیہ نیاما فاشزم ئے خلافا عملی جنگ نیاما دہ بہر زڑتغ اث، پرچے کہ اے جنگ تہذیب و حسن ئے بچائینغ ئے جنگ اث۔ ہمے موقع سرا ’’ رومین رولاں‘‘ ئا وثی یک پیغامے نیاما گوشتغ اث:
’’وختے کہ جہانی کلچر فاشسٹانی دستاں برباد بیغ بیث ہماں وختا ادیب ئے کار کلچر و زیبائی ئے حفاظتا پہ جدوجہد کنغ بیث‘‘ ۔1979نیاما ادیبانی بین الاقوامی کانگریس منعقدہ صوفیہ نیاما ہسپانوی شاعر ’’رافیل البرٹی‘‘ئا (آنہیاکہ فاشزم ئے خلافا ہسپانیہ جنگ آزادی لافا پنچمی رجمنٹ نیاما بہرزڑتغ اث) گوشتغ اث:
ماجتا جتائیں ڈیہانی ادیب ایذا سانڑی اوں ۔ ما بایدیں کہ ہیلسنکی ئے ترتیب داثغیں دستاویزا مہ شموشوں۔ ہمے دستاویز ئے روح امن ئے روح ایں ۔اے دستاویز اُمِیتے ،روژنائیَ ئے ۔ ماباید یں کہ اے روژنائیا تُسغا میلوں۔ ماامن ئے مرگ ئے پَرّانی پٹغا نیلوں ۔ ما اِشی پَرّاں سلامت داروں تاکہ ہمے امن ئے مرگ اے گلزمین ئے آزادی و امن ئے پیغاما پجائینت کنت اوہر دلا امن ئے وہاو و خیالاں گوں پرکث بہ کنت‘‘۔
1979ئے سال چُکانی بین الاقوامی سال اث۔1990ئے سال زالانی سال انت۔ زال و چُک کائنات نیاما تخلیقی عنصر ئے لازمی بہرنت ، اے زبیائی ذوق سلیم ئے چیذغ انت۔ زال شہ چُکا سوا و چک شہ زالا ابیدبے نشان انت و بےہیذغ انت۔ مار وثی چاگردا گندغی کفیث کہ ما اے چیذغانی بورینو خانی دیما داں چِکھر حدا اوشتا ثغا اوں۔ مئے نزیخیں ملک افغانستان و ایران نیاما بنیاد پرستی ئے اے لہرا دراہیں لوغ، کسان کسانیں چُک ، ورنا ئیں زال، پیریں مڑد و جن ہونانی لہڑ لافا بوڈالتغ انت ۔ لیکن بنیاد پرستانی ہون واری دنیخا دہ نہ صرف کم نویثہ بلکہ بے سوبھیاں گوں دیم پہ دیم بیغ ئے آسرا اغدہ گیش بیثہ ۔مئے ملک سرا یازدہ سال ئے دراژیں سیمی مارشل لا پھذا نیم جمہوری حکومت ہنچوش وثارا بے دست و پاذ زانغا ایں کہ آں گوئستغیں دور ئے پالیسیاں پہ برجاہ دارغا مجبور معلوم بیث پرچے کہ اے دراہیں استحصالی حکمران طبقہانی نمائندگ انت۔ ہمے سبب اِنت کہ جنیوا ئے معاہدہ سرا ہچ عمل نویغیں و افغانستان نیاما بنیاد پرست وثی ہوں واری ئا جاری داشتغاانت۔او وہاواں گندغا انت کہ کابل و سمرقند و بخارا نیاما برونت وثی بیرکاں چست کن انت و آمر مطلق ضیا الحق ئے قضا بیثغ ایں نواشاں بوان انت ۔ مئے حکمران طبقہاں ہچبرا شہ تاریخا سبق نہ گپتہ۔ ہمے سبب ایں کہ آنہاں ہچبر بنیاد پرستی خلافا چوشیں گام زڑت نہ خثغنت او نئے چوشیں اقدار ٹھا ہینتغ انت اش کہ معاشرہ نیاما جوانیں و آزاتیں فکر و خیال ئے رژنائیں قدرانی شاغ کھنغ نیاما پھیلوی آ ناکام بیثغنت ۔ریڈیو یا ٹیلیویژن نیاما اغر موسیقی ئے ، آرٹے یادومی چوشیں ثقافتی پروگرامے بیئث کہ آنہی نیاما چھی یے روشن خیالی ئے بہرے ماں بیث تہ بنیاد پرست آنہیا فحاشی گش انت ۔حتیٰ کہ کلاسیکل موسیقی پروگرام’’ راگ رنگ‘‘ دہ آنہانی واستا فحاشی انت ۔ چوش معلوم بی کہ ہمے تُرسا شہ حکمران ایشانی دیما ہتھیاراں پھر ینتغا اَنت و ناکام انت۔
وثی اے کلیں ناکامیانی اوڈھردیغ واستا مرشی کشمیر ئے مسئلہ بارہا آنہانی اپروچ اسل ہماں بنیاد پرستی ئیگ انت ۔شہ ایشیا فائدہ زڑ تھوضیائی باقیات ئے جمہوریت دژمن آہانی اے عملا راجنگ پھلوا دھکو دیغ ئے کوششا کھنغ انت ۔میجر سعید ٹوانہ ڈولیں بنیاد پرستیں نام نہادیں ادیب جنگی تھیوریاں داثو جنگی جنونا ودھائینغ ئے کوششانت لیکن زاناں ہچے ادیبے چوش دہ وَزّتا کھنغ انت کہ کشمیر و افغانستان نیاما چھے لیو کھنغا انت۔ کشمیری شاعروادیب عبدالستار ربخور کہ کھشتغاشتہ۔ آنہیاچے لوٹ اث؟۔ میر مصطفےٰ ئے گناہ ہمیش اث کہ آں سیکولر و رژنا فکر داروخیں سیاست کارے اث۔ ایشانی خبرتہ آتکا لیکن دومی چھکر چُک مرشی مذہبی جنون و بنیات پرستی ئے ’’ سیاہیں دیوی‘‘ ئے قربان جاہا یتیم بیغ انت ۔ حیف انت آں ادیبانی سراکہ بنیاد پرستانی تُرسا شہ دو لوٛز دہ ’’ ہیلسنکی ‘‘ ئے چیذغ نیاما گاڈیرت نہ کن انت۔
۔1979ئے ادیبانی بین الاقوامی کانگریس نیاماگشغ بیثہ :۔
ما مَنّوں کہ ہمے رنگیں جنگ ہم بنت آں کہ انصاف و آزادی ئے خاطر ا کنغ بنت پرجنگانی اصلیں سوب ہمیشہ غیر انسانی و مژارو بنت ۔ جنگ مڑدمانی جند ئے انفرادیتا برباد کن انت۔ اے پہ انسانیتا یک کُشوخیں زہرے ، اے جنگ زیبائی ، ازم و کلچر ھر شہا شوشی پُھرانی ڈھیری یے نیاما بدل کنت‘‘
ایذامنا مست توکلی ‘ ئے اے ابدمانیں شیر ئے گالے یاد آیغ اِنت:
جوان نہ ینت جنگانی بذیں بولی
کئے وثی جوائیں سنگتاں رولی
ہمے کانگریس نیاما اپیل کنغ بیثہ کہ :
’’ وثی قلما وثی ازما وثی پوہی ئا او علم ئا پہ یک نوخیں مردمے پیلویں مردمے و ڈسپلن والائیں مڑدمے پیداکنغ و آنہی رووم ئے خاطر ا وقف بہ کن ایث ۔ شماخالقیں یک نوخیں دورے ئے ،یک انصاف داریں نظامے ئے، یک نوخیں سماجے ئے۔ ہمنگیں دنیائے یئے اوذا کہ زیبائی ئے ‘و زیبائی قانونئے دور و باری بیث ‘‘۔
مروشگیں ادیب ئے سرا اے ذمہ داری اغَدِہ گیش انت کہ آں امن ئے و وشحالی ئے واستا وتی قلم ئے استعمالا گوں دلیری و تاگتا بکنت ، پرچے کہ مرشی شعور ذات ئے عمل دیما روغا انت۔ انسانا گوں فطرتا جنگ کھثو آنہیارا داں بازحدا وثی باندی کھنغا انت۔ طبقاتی جنگانی نتیجہ نیاما آنہیا انقلاب آڑتغ انت، اے آنہی شعور (کائنات و طبقات ) ئے بہر ثنت بلے شعورِذات ئے حوالہا شہ آنہیا را گوں وثی اندرا دِہ جنگ کنغی ایں تاکہ آں وثی جند ا را شہ چوشیں موقع پرستیاں و وثی جند ئے مفاداں بڑز ترکنت تاکہ آں بنیاد پرستی و مذہبی و قومی جنوناں شہ بنی نوع انسان ئے فکر ا را آزات کنت و امن و آشتی ئے پیغاما انسانیت ئے لوغ لوغا داں پجائین ایث۔