بوجیگ ءِ جون ۔ سوگات کلمتی
بوجیگ ءِ جون
سوگات کلمتی
رمضان ءِ بیست ءُ نومی روچگ ات۔۔۔۔آزمان مجاں مانپوشتگ ات۔۔۔ مہلوک ائید ءِ نوک ءَ شوہازگ ءَ ات کہ پِر بوتگ یا ناں؟؟؟؟
بلے مھنال اے درستیں جاک ءَ جیک ءَ چہ بے سما لوگ ءِ کنڈ ءَ نشتگ ءُ گوں ارس گواریں چماں وتی جود ءِ وداریگ ات کہ ہپت سال پیش پہ ائید ءِ موکلاں گوں لانچی ءَ چہ مسقط ءَ در اتکگ ات بلے لانچ ءُ مھنال ءِ جود ہر دوں منزل ءَ سر نہ بیتگ ات۔۔۔۔۔ ھچ وڈیں ھالی نیست ات۔۔۔۔۔
آئی ءَ وتی کسانیں چک ءِ نیمگ ءَ چارت کہ دنیا ءَ چہ بے سما لیب ءَ ات ۔۔ آئی ءَ جیڑ ات کہ مباتاں من کہ بابل ءَ ھم انگت ابا نہ دیستگ ۔۔۔ آ روچی کہ آئی ءِ پت ءَ مارا یل دات ءُ لاپ ءِ شوہاز ءَ ولایتاں شت بابل مناں شش ماہ ات کہ لاپ ءَ ات۔۔۔من باز مہ کن کت ولایتاں مرو۔۔۔۔ ولایت مردماں وارت ۔۔۔ بلے آ لاچار اَت۔۔۔ملک دگہ راہ ءُ در نیست ات ۔۔۔ گوں گریتگیں چماں مارا رکست ءِ کت ءُ شت۔۔۔۔
“ھدا بکنت کہ ائید ءِ نوک ءِ پر بوھگ ءَ پیش بابل ءِ ابا بہ ات” پہ بے انہانی آئی ءِ دپ ءَ چہ در اتک۔۔۔۔۔۔
مغرب ءِ بانگ ماں گیدی جکس ات بلے کبلہ ءَ آزمان سہر چکیں مجی ءَ پتاتگ ات ءُ ائید ءِ نوک بازیں پٹگ ءُ چم لٹینی ءَ پد ھم گندگ نہ بوت۔۔۔۔ پہ ائید ءَ گڈی آسر ماسٹر الہی بخش ءِ ریڈیو اتَ کہ چہ ولایتاں ھالی رپتگ ءُ آرتگ ات۔۔۔۔۔۔۔
مغرب ءِ نماز ءَ پد میتگ ءِ ورنا ، کماش ءُ گونڈو درست پہ بی بی سی ءِ گوشدارگ ءَ aa ماسٹر الہی بخش ءِ اوتاگ ءِ پیش گاہ ءَ جم بیت انت کہ بلکے ائیدی ھال ءِ بدات۔۔۔ مھنال ءِ بابل ھم رومب ءَ گوں ات۔۔۔۔۔ ماسٹر ءَ ریڈیو ءِ تار انگر ءُ آنگر کت ،،، بازیں گُژ گژ ءَ پد وش تواریں جنکی آواز ءَ سر کش ات۔۔۔۔
” ماں عرب زر ءَ اتکگیں دوشیگیں توپان ءَ بوجیگی ءِ جون ماں مسقط ءِ کندو ءَ لیپگ کتگ۔۔۔ زر زانتانی گوشگ انت کہ اے ھما بوجیگ بیت کنت کہ ہپت سال پیش ماں مکران ءِ تیاب گوراں روگ ءَ بوتگ بلے منزل ءَ سر بوھگ ءَ پیسر گا۔۔۔۔۔ر۔۔ر۔۔۔۔ اان۔۔تتت۔۔۔۔ ماسٹر الہی بخش ءِ ریڈیو ءَ ساہ دات ءُ گیس ءِ ھل ات انت۔۔۔۔