بودناکیں کرگوشک
“اگلامندیں کَرگُشک”
درگیجوک ءُ نبشتہ کار: بوھیر کلانچی
جنگلے ءَ بازیں سھدارے ھست ات.ھمے جنگل ءَ زوراوریں شیرے ھست ات.آ تیار ءُ گُروناکیں شیرے ات. آ ھمے کہ گژنگ بیتگ ات آئی ءَ ھمے ساھدار گپتگ ءُ وارتگ ات انت. برے وھدے آ مستی ءَ ایر کپتگ ات ءُ ناھک ءَ ساھدار ئے پروشتگ ات انت.
یکروچے جنگل ءِ دراھیں ساھدار ھور نشت انت ءُ سوڑگ اش کُت ءُ سوڑگ ءَ پد آھاں شَورے کُت آھاں روباہ کاسد کُت کہ آ بہ روت ءُ شیر ءَ بیار ایت.
روباہ ءَ شیر آؤرت, دراھیں ساھدار پاد آتک ءُ پیش سلام بیت انت. دست ءُ دروت ءَ پد کماشیں شادوے ءَ گوں شیر ءَ گشت.
بادشاہ سلامت!! ما زان ایں کہ ھرکس پہ لاپ ءِ دوزہ ءِ توسگ ءَ شکار کنت ءُ ما ترا پہ اے کار ءَ مکن اوں نہ کن ایں بلے گوں تو مئے دزبندی انت کہ تو انچو پہ دیم مارا مہ جن ءُ مہ پروش.
مروچیگ ءَ پد چہ ما روچے یک ساھدارے پاد وت پہ تئی ناھاری ءَ کیت. شیر ءَ آھانی گپّ من ات ءُ اے رنگ ءَ آھاں روچے یک ساھدارے پہ شیر ءَ دیمدات.
یکروچے کرگشک ءِ باری آتک. کرگشک ترسءَ گار ءُ دلترک ات.
آ ناکامیں دلے شیر ءِ دوار ءَ روان ات. چہ مرگ ءِ بیم ءَ آئی ءِ نُکّ ھُشک ءُ کلنڈ ات. آئی ءَ راہ ءِ دیم ءَ چاتے دیست ءُ چہ چات ءِ ھَود ءَ آپ ئے وارت ءُ چات ءَ سر ئے کش ات ءُ چات ءِ آپ ئے چار ات. چات ءَ سر کشگءَ پد آ دیم پہ شیر ءَ شُت. انچوشکہ آ شیر ءِ گُور ءَ سر بیت شیر ءَ زھر ءَ زھر جست کت کہ تو کجا بیتگ ئے؟
کرگشک ءَ بزّگ بزّگ ءَ گشت, من چہ وتی دوار ءَ مھلہ در آتکگ آں بلے من ءَ راہ ءَ دگہ شیرے ءَ مانترّینتگ کہ من ترا ور آں. من گوں آئی ءَ گشتگ من جنگل ءِ بادشاہ ءِ ناھاری آں ءُ ھمائی ءِ دپ بوج ءَ روگ ءَ آں گڑا آئی ءَ بد بُرتگ ءُ گُشتگ ئے کہ اے جنگل ءِ بادشاہ من آں اے نوکیں بادشاہ چہ کجا آتکگ. من چمّ ءُ دو چمّ کتگ ءُ وتی ساہ پہ تو رسینتگ. شیر کہ ساری ءَ زھر ءَ گُنج ءَ ات ھژم گپت ءُ گشت ئے , تو من ءَ بہ بَر ءُ ھمے شیر ءَ پیش بہ دار من چار آں آ چوں من ءَ نہ مَنّ ایت. کرگشک ءَ شیر رند ءَ جت ءُ چات ءِ گُور ءَ بُرت ءُ گُشت ئے, آ شیر کہ ترا نہ منّگ ءَ انت ھمے چات ءِ تہہ ءَ انت.
شیر ءَ چات ءَ سر کش ات. آئی ءَ چات ءِ آپانی سر ءَ وتی اکس دیست گڑا گُرّگے جت ئے ءُ چات ءَ دور ئے کُت ءُ بُڈ ات ءُ مُرت. کرگُشک ءَ سارتیں گیّنے کش ات ءُ تچان ءَ وتی دوار ءَ شُت ءُ چہ وتی ھمگنگلاں شیر ءِ مرگ ءِ مستاگ ئے گپت.
اے رنگ ءَ آئی ءَ وت ءَ رکّ اینت ءُ آ دگہ ساھدار چہ زوراکیں شیر ءَ آجو کنائینت انت.