شپ نوں تھنائی ءِ ھال ءَ گپتہ
دستونک (خالق ارمان)۔
شپ نوں تہنائی ءِ ہال ءَ گِپتہ
روچ کوچَنڈتہ ، واب ءَ گِپتہ
انگہ اے گپءَ منی جند نہ زانت
تئ گَم ءَ پرچی ءَ مارا گِپتہ
روچ دمبُرتہ وتا زُرت نکنت
شپ منی ساہگءَ دست ءَ گِپتہ
چاریں دیماں تئ زہیراِنت کہ رِچیت
تو وَ نوں سرجم ءَ دنیا گِپتہ
کِرد سالونک ، بلوچ زہگانی !!
ہرکُجا ، سوہوَی داوا گِپتہ
مِیزر ءُ سبزیں دلانی چمّاں
سُرمگیں لَبزے ءِ مانا گِپتہ
مارا دریا وتی پاداں بر گوں
چَولے ءِ لنکُک ءَ نوں ما گِپتہ
تہنا ارمان، منی جند نہ اِنت
سرجمیں میتگءَ تُنّ ءَ گِپتہ