ناٹک (سئیمی بھر)۔

نسیم عادل

یونانی وھدے ناٹک ءَ چہ زیوس ءِ لوگ ءَ کشّ اَنت تہ پہ ناٹک گیشّینتگیں جاھے ٹاھین انت کہ دیمتر ءَ اے جاگہ مرچیگیں اسٹیڈیم جوڑ بیت. 776 B.C ءَ یونان ءِ شھر اولمپیا کہ ھما وھد ءَ زیوس ءِ (یونانیانی ھُدایے) نیکراھی چست ءُ ایرانی بنزہ بیت، اولمپکس لئیب بندات بنت. قدیم یونانیاں اے لئیب نیکراھی ھساب ءَ چار اِتگ اَنت کہ اے لئیباں یونانیاں وتی ھدا زیوس ءِ کسّہ ھم جاگہ داتگ. ھمے سَوَب ءَ پد چہ A.D عیسائی رومی بادشاہ تھیوڈوس زیوس ءِ کُنّت ءَ اے لئیباں پہ زور بند کنائین اِیت.
اے گپ نہ گیش اِتگ کہ یونانیانی ناٹک ءُ ہندوستانی ناٹک ھمسروگ انت یانکہ پشت ءُ دیم انت، ہندوستانیانی رامائن ءُ یونانیانی اوڈیسے ءِ ھمرنگی ءَ مردم مار اِت بیت البت اے گپ گیش اِتگ کہ سکندر ءَ پیش آریائی ہندوستان ءَ اتکگ انت ءُ ھمایاں ناٹک چہ بابلیاں ہندوستان ءَ آورتگ ( فارس ءِ بابل ءِ گرگ ءَ پد). باز پولکارانی گمان ھمیش انت کہ رام آریائی النسل بادشاھے بوتگ ءُ راون بُن ءُ بیھ ہندوستانی یے بوتگ، آریائیاں ہندوستان ءِ بُنُکّی وارس جتگ ءُ قُطبی ہندوستان تاچینتگ انت ءُ وت ملک اِش دستِیگ کتگ.
ہندوستان ءِ بنداتی ناٹک کار سنسکرت زبان ءَ گوں سیادی داروکیں مردم انت ءُ بندات ءَ ھما وھد ءِ بادشاھانی چیردستی ءَ ھمایانی دیواناں (دربار) نیکراھی ناٹک پیش دارگ بوتگ.
ہندو نیکراھی ستک ءِ رد ءَ رامائن راستیں ءُ آسمان ءِ واھُنداں گوں سیادی داروکیں کسّھے پمیشکا اشی ءِ کارست ھم زیر ء زمین ءُ آسمان رپتگ انت.
رامائن بزانکہ رام ءِ سات ءُ سپر ءُ جنگانی درستاں کْوھن تریں سنسکرت زبان ءِ داستانے کہ نظمے ءِ دروشم ءَ کساس 500 B.C کمایگ بوتگ ءُ اے نظم بیست ءُ چار ہزار کڑی اِنت البت اشی ءَ چیزے بدلی سدلی ءَ پد مرچیگیں دروشم کساس 200/300 B.C گِپتگ البت دست کپتگیں دراوڑ دودمان ءِ رد ءَ رامائن ءَ پنچ سد سال پیش (بزانکہ 1000 B.C) ھم ہندوستانی مندراں کتھک ناچ بوتگ کہ ھمے ناچ ءِ سُر ءُ پُراں گوں بگوان گپّ ءُ ٹال ءُ بگوان ءِ کسّہ زیارتیانی دیم ءَ آرگ بوتگ انت.
رامائن ءِ کسّہ ھپت بھر ءَ گیشّینگ بوتگ البت پولکارانی گمان ھمیش اِنت کہ ھپتمی بھر رندئِیگے!
اولی بھر: رام ءِ کودکی ءِ کسّہ
دومی بھر: ایودھیا ءِ رام ءِ کسانی ءُ درانڈیھی
سئیمی بھر: رام ءِ کوہ ءُ گاراں فقیری سربتگی ءُ سیتا ءِ دست ء راون آوار جنگ ءِ کسّہ.
چارمی بھر: رام ءِ ماں میسور (کرناٹک) بار بوجی.
پنچمی بھر: رام ءِ گوں وتی کمکّ کاراں سائیلون (سریلنکا) ءَ سر بیگ.
ششمی بھر: راون ءُ رام ءِ جنگ ءُ چوپ ءُ راون ءِ دست ء رام پروش ورگ.
ھپتمی بھر: اے بھر ءَ گْوستگیں چیزے بھرانی دوواری پرّیچ ءُ ناٹک ءِ آسر بزانکہ سیتا ءِ زیر ء زمین روگ ءُ رام ءِ گوں وتی براتاں آسمان ءَ روگ.

روان اِنت….