وار وئیرندان بُوآن، سیر، اَزگار تِر بیان
دستونک
منظور بسمل
وار وئیرندان بُوآن، سیر، اَزگار تِر بیان
چیرگْوچّان یک سرے ءُ یک سرے گہتر بیان
ہِیرہ ءَ ہرچُند تْراش ئے بیت زیبا ہر کدَر
ڈَکّ لگّیت، ڈُکھ لگیت، بیت مردم زِر بیان
چہ تہا بنت کْوہکّ ءُ کْواپگ پُپّ ساڑیں باز ہبر
دْروگ بندوکیں مُناپِک زْیادہیں زاہر بیان
زندگی ءِ چِست و ایراں باز دَربُرت، باز زانت
تئی زبان کہ چہرگَردیں، ما اوں جادُوگِر بیان
تاسُپیں بچ گار ءُ گور، مات ءُ گُہار دَر پہ در اَنت
بے دلیں مارشت کوہ انت، ہَزم بے ہاتر بیان
درد ءُ اندو گیش ودّنت، سکّی ءُ سوری رسیت
بیت شَرتِر روچ پہ روچ مردم بہ بیت مستر بیان
کِسّہ ءُ آیات، پُوتّاری، ہزار گپ ءُ ہُنر
ماں دپ ءَ ہاریں زبانے، شاعر ءُ شاطِر بیان