اُستاد صبا دشتیاری ءِ یات ءَ
اُستاد صبا دشتیاری ءِ یات ءَ
کریم بلوچ _ تـَهـل
مردمانی نیام ءَ ، دو بــُــرّ و گروپ هست انت ؛ لهتے همایاں که آهان ءَ گپ کنگ و بٹاک جَنـَگ وَش بیت و لهتے همایاں که دست ءَ دست ءِ سرا ایر نه کن انت و کارے نه کارے ءَ گلائیش بنت . شهیدیں استا واجه صبا دَشتیاری چه همے دومی گروپ ءِ مردمان ات . بزاں استا صبا دشتیاری یک پرجُهدیں راجدوست و زبان دوستے ات .
1988 ءِ سال ءِ در میان ات که چیزے راجدوستیں بلوچ لندن ءَ و رندا باگیں کراچی ءَ « بلوچ دود و ربیدگی و پٹ و پولی انجمن » ے اڈ دات . کراچی ءَ همے انجمن ءِ پاکار _ جارچین _ اِش منا کت . همے وهداں استا صبا دشتیاری کوئٹه ءَ بلوچستان ءِ شهدربرجاه ءِ استا ات و هم هزار زیبیں کوئٹه ءِ « بلوچی » مهتاک ءِ کمک شونکار ات . واجه صبا گوں « بلوچی » مهتاک ءَ سَکّ گـَـٹ ات . کراچی ءَ کدی کدی و دمانے ءَ آتکگ ات . پرچا که واجه ءِ لوگ وهَنکین کراچی ات . هما وهداں کراچی ءَ ما لوٹ اِت که بلوچی کلاسے په هـُـدوک و لوٹوکاں پَچ بکنیں . وهدے که همے گپ ءَ من واجه هدامرزی میر یوسف نسکنتی ءَ گوئشت ، واجه یوسف نسکنتی باز وش بوت و واجه ءَ منا گوئشت که اے باز جوان و باز نیکیں کارے و من پر شما جاه ءِ بند و بَست کناں و واجه وتی گپ ءَ اوشتات و پر ما جاهی بند و بست کت و رندا وهدے که همے گپ ءَ من گوں واجهیں استا عابدجان آسکانی ءَ گوئشت و چه آئیا دَزبندی کت که مئی کلاسانی وانینوک و استا به بیت و وانینگی کتابانی بند و بست چون به کن اوں !
واجه ءَ هم منا شاباش کت و دلبڈی دات و وتی همراهی ءِ جار ئی جَت . چو مئی بلوچی وانینگ ءِ کلاس کراچی ءَ بنگیج بیت انت . همے کلاساں بیست و سی ءِ درمیان ءَ بلوچ ورنا و نوک ورنا چه جنین و مردین بلوچ نام نبشت و بهر زرت . استا عابد آسکانی باز جوانی ءَ کلاساں دیما بران ات و من هم کمک کار اتاں و وهدے که چه استا صبا دشتیاری ءَ هم ما دزبندی کت که اے کار ءَ ما را کمک به کنت ، آئیا بے نیمون و گیشیں هبرے گوئشت که منا سر و چمان انت و واجه ءَ هر چنت که آزاتیں وهد سک کم ات ، بلے پدا هم چه کوئٹه ءَ گیشتر کراچی ءَ آتک و مئی کلاسانی دیمبری ءِ جهد ئی کت . مئی کلاسانی دو دَؤرَه پوره بوت انت . هر دوئیں دورهاں استا صبا په کلاسانی دیمبری ءَ جوانیں جهد و کوشستاں کنگ ات .مئی کلاساں هم سید ءِ رهبند و هم ایدگه رهبندانی باره ءَ گپ و هبر بوان ات . اے وهداں استا صبا و عابد جان آسکانی پوره نمیرانیں سید ءِ رهبند ءِ منوگر اَتنت . رندا استا صبا گیشتر پگر جنان بیت ؛ هر چنت که تا هنوں استا عابدجان آسکانی که هدا آئیا هزار سال زندگ کنات ، هما راه ءَ داشتگ .
چونائیا من و استا صبا ءِ گند و نند باز بیتگ ، بلے هما کلاسانی وهد ءَ من دیست که واجه چینچو زباندوستیں راجدوستے انت که وتی زرّ ءِ سرا مئی کلاسانی دیمبری ءِ جهد ءَ کنان ات و مئی دلبڈی ءَ ما را هزار شاباش و جی و جان ئی کت .
استا صبا ءِ همے جهدانی برکت ات که چه مئی انجمن ءِ نیمگ ءَ ، هما کلاسانی اند ر ءَ ، وتی وانینتگیں شاگردانی کلاس ءَ « ایوارڈ » و انعامے دَیگ بیت .
استا صبا دشتیاری ءِ زند ، هنچو سادگ و ادنایینے ات که آئیا مَٹ و دَرورے نبوتگ یا سک کم انت . آئی ءِ شائری و لبزانکی جهد هم کم درور و پر زانت ات . آئی ءِ شائری تو گوئشت کن ئے که بلوچی گالانی همبارے و په گالانی گچین ءَ سک دلتپرکه بیتگ ات و در آمدیں گالانی سک باز کم آرتگ و کارمرز کتگ و آ هم هما جاه ءَ که لاچار بیتگ !
استا صبا ءِ کوش ، کور زانت و پر تَماهیں دُژمن و وشنیاتکاں رکینت نه کنت . پر چا که دگرانی حق ءِ پـُـلــَـگ مدام و تاں ابد پادار نه بوتگ و نه بیت . چے استا صبا شهید کنگ به بیت یا سَدانی دگه شهید کنگ به بنت . استا صبا ءِ شپچراگ و ڈیوا ، آئی ءِ زانت و زانگ و مارشت ات که سَدانی دلانی روک کرتگ و بالینتگ . مردمانی چیر جَتَگیں حقان انت که پـَدجـَنـَگ بیان انت و پـَدجنگ بنت .
استا صبا دشتیاری گوں وتی شهمیری کِرد ءَ بلوچ و بلوچ ورنایانی دلاں زندگ انت و دیر نه انت هما روچ که آئی ءِ و ایدگه شهیدانی بـُـٹاں وتی شهر کلگانی زیب کن انت . من دلجماں که استا صبا بیران نبوتگ و نه بیت ، پر چا که ماں بلوچ ءِ جدو جهد و راجی واهگاں مدام زندگ انت و چو شپچراگ راهانی بالینوک و روک کنوک انت