بسم اللہ الرحمن الرحیم
غلامی
ہروھدءَ کہ غلامیءِ نام کئیت گڈا گوں آئی واجہی ہم گون اِنت پر چہ کہ ہر چیزءِ پجار چہ آئی ضدءَ بیت۔
غلامی یک ہنچیں تہلیں لبزے کہ ہچ غلامے ہم پہ وت نہ زوریت،ءُ واجہی یک ہنچیں شہدناکیں لبزے کہ ہچ واجہ چہ آئی سیر نہ کنت،
غلامیءُ واجہی انسانءِ ماہکانیں دیمءِسرءِ ہما داغ اَنت کہ ہجبر دور نیاتکگ اَنت دور نیاینت داں ہما وھدا کہ آجوئیں شخص غلامءِ دردءَ بہ ماریت
اگاں منءُ تو پہ شہم بہ چاریں گڈا حقیقت چو ہما رژنءَ پدراِنت کہ چم آئی چارگءَ سگّ اِت نہ کنت کہ ہر واجہ جاھے نہ جاھے غلام اِنت ءُ ہر غلام جاھے نہ جاھے واجہی کنگااِنت، ہر غلام چہ غلامیءَ بیزاراِنت بلے واجہیءِ ھدوک اِنت! بلّے کہ آئی واجہی ءِ جن ہزار غلامءِ خونءِ قربانیءَ لوٹیت،
غلامیءِ وڑ وڑیں رنگءُ دروشم اَنت، بلے چہ ترسناک تریں رنگاں آئی یکے
(1)
قومی غلامی اِنت کہ ہر زانتکاریں قوم آئیءِ ہر رنگءُ دروشمءَ جاہ کاریت۔
دومی (2)شخصی غلامی ،ءُ منی بن گپ ہمیشی سرااِنت۔
انسانیتءِ سرا ظلمءِ مستریں کوہ ہما وھدا کپت کہ غلامیءِ لہتے رنگاں رسمءُ رواجانی پوشاک پوش اِتءُ مہلوکءِ تہا ہنچو جاہ اِش کت کہ آیاں وتی پجار ہمے پولنگیں پوشاک زانت اَنتءُاشانی سرا پہراِش کت،اگاں کسےءَ آیاں آدینک پیش دارگ لوٹ اِت گڈا آئی دست گڈگ بوت اَنت ءُ آ یک قومی دودءُربیدگانی بلاہیں باغی ے زانگ بوتءُ آئی پیشانیءِ سرا غداریءِ یک ہنچیں مہرے جنگ بوت کہ نہ زانتکار چہ آئی اندرز گران بوت اَنت،۔
غلام کنگ تہنا اے نہ اِنت کہ منءُ تو یک شکسے بگریں ءُ آئیءَ گوں زمزیلاں بہ بندیں ءُ آئیءَ چو خرءِ پیما کار بہ بندیں، بلکیں اے ہم غلام کنگے کہ منءُ تو کسےءِ فکرءُ خیالءَ چہ وتی واجہیءَ پادءِ چیرا لتاریں۔
بیااِت ہور بئیں ءُ غلامیءِ خلافءَ جہدکنیں۔ بیااِت واجہی نہ لوٹیں بیا وتی چاگردءِ تہءِ جنیں آ دمءِ لگتمال کتگیں بنکی حقاں آئیءَ دئیں ،آئی مارشتءَ ماریں،آئیءَ میراثءِ تہاہم بہر دئیں آئی زندگیءِ مزنیں فیصلہاں پہکءَ وت نہ کنیں،۔
ایا منءُ تو راضی بئیں کہ منءَ ترا یک ماڑی ے تہا دنیاءِ کلیں آسراتی دیگ بہ بنت پہ اے چیزءِ عوضءَ کہ منءُ تو گنگ بہ بئیں کرّ بہ بئیں،ءُ منیءُ تئی لگام دگرےءَ گون بہ بیت، منیءُ تئی مارشتءِ پر لذتیں تامءَ منءُ تو ہجبر مہ چشیں؟منءَ ءُ ترا فکر کنگءِ حق مہ بیت،منءَ نان دنت بلے ورگءَ آ پیم نئیلیت کہ من ءَ دوست بیت، منءَ کندگءَ نئیلیت آ وہدءَ کہ من کندگ لوٹاں؟ کئے اِنت کہ اے چیزءَ پہ وتءَ دوست داریت؟
من دوست نہ داراں۔ءُمن اے چیزءَ ہم دوست نہ داراں کہ کسے منءَ بگشیت:
بیا ہر چیز کہ تئی خیالءَ کئیت کہ من آئی ءَ پہ تو حقیقتے کناں بلے ہما پئیم کہ من گشاں بکن ءُ ہما راہءُ رہبنداں کہ من ترا سوج دیاں، ہما پئیم کہ منی دل لوٹیت۔
ایا اے منی کمک کنگے یا کہ آئی اندرءِ واجہیءِ رسترءَشکارے رستگ؟؟
بیا کمو جیڑیں کہ چاگردءِ تہا منءُ تو کئی سرا واجہی کنگائیں ءُ کئی فکرءِ باغءِ اجگیں پلانءَ سندگءَ ایں ءُ لگتمال کنگءَ ایں،ءُ آپلانی واجہءَ چہ آئی وشبوئیءَ زبہر کنگءَ ایں،
بیا چاریں باریں منیءُ تئی گسءِ تہا یا چاگردءِتہا منءُ تو کئی کندگ پل اِتگ اَنت،کئے منءُ تو رسمءُ رواجانی نامءَ زندانی کتگ، کئے اِنت کہ فکرے گوں تو گون نہ اِنت بلے آئی جسمءِ مالک توئے؟ کئے اِنت کہ آئی دل گریوگ لوٹیت ءُ تئی نیمگءَ گوں پرارسیں نگاہے چاریت کہ باریں منءَ گریوگءِ اجازت ہست؟ اگاں چشیں کسے ہست گڈا بزاں کہ دنیاءِ رزوا تریں رستر منءُ توئیں ءُ اگاں نیست گڈا منءُ تو انسانیں،،،،توامیں انسان،،،،
ءُ چہ انسانیتءَ شرپ دار تریں صفت ہچ نیست۔۔۔۔۔۔۔۔۔
(حافظ آسکانی زامرانی)
