ہونانی لکیر
صبیحہ کریم
گرماگی بیگاہ یے ئِ وھد اَت ، شمال ئِ گوات کشگ ئَ اَت بلے پیشی حساب ئَ نہ اَت کہ مردم یک دومی ئَ میم مہ کنت ۔
پدی زِر ئِ تیاب ئِ دپ ئَ یکدارانی رِد زیبدار اَت۔یک ءُ دو مید ( ماہی کُش) وتی یکدارانی تہا نشتگ ءُ ماہو ر ساچگ ئَ مشکول اِتنت۔بلے تیاب دپ ئَ وڑ وڑیں نیم براہنگیں زالبول،مردیںآدم ،جنئک ءُ زہگانی سیل ءُ سواد ئَ چہ تیاب ئِ ندارگ پہک بدل بوتگ اَت۔وتی ھیالانی زِر ئَ بیگواہ یک ورنایے ہمے تیاب دپ ئِ اَرزُنیں ریکانی سرا نشتگ اَت ءُ زِر ئِ چولاں سیل کنگ ئَ اَت ۔اناگہ یک نیم براہنگیں جنئکے کہ آئی ئِ پُچّ آپ ئَ میچل اِتنت ءُ جان ئِ بند بندے پدّر اَت آئی ئِ دیم َ اتک ءُ اشتات ءُ چارگ ئَ لگّ اِت ۔جنئک ئِ پت ئَ آئی ئَ را توار جت۔
”ارے بیٹا اس پاگل بلوچی کے پاس مت جاﺅیہ مارے گایہ بلوچی پاگل ہے “
تیاب دپ ئَ ابید ئے ہمے ورناءُ یک ءُ میداں کہ وتی یکدارانی تہا نشتگ ءُ ماہور ساچگ ئَ اِتنت دگہ کس نیست اَت۔دُرا درامدیں مردم اِتنت۔بچک ءُ جنئک یک دومی ئَ گلائیش اِتنت،میار ءُ لج نیست اَت۔درآمدیں مردمانی روچ پہ روچئِ گیشی ئَ چہ ہند وتی صورت ئَ مٹّ کنگ ئَ اَت۔برے برے گمان گو´ستگ اَت کہ اے شمال بند نئِ پدی زِر نہ اِنت۔
”یہ پاگل ہے یہ بلوچی پاگل ہے۔“
یک برے پدا اے توار ئَ آورنا ئَ را گُڑینت بلے انچو گمان بوتگ اَت کہ گشئے آورنا وتی ہند ءُ زِرئِ درآمد بوہگ ئَ سک تکانسر اَت ءُ یک بے تواری یےئَ آئی تہا جاگہ کتگ اَت کہ یک مزنیںجاکے ئِ صورت ئَ ودی بوہگ ئَ مہتل اَت۔آورنا ئَ سر چست کت ءُ ہمے جنئکئِ نیمگ ئِ چاراِت ءُ پدا آئی ئِ پت ئِ نیمگ ئَ چارگ ئَ لگ اِت کہ آئی ئِ پِت ءُ پیرکی زمین ئِ سرانشتگ اِتنت ءُپدا آئی ئَ را بد گشُگ ئَ اِتنت۔میرل ئَ را آئی ئِ ہبر باز توراِت ۔
”کیوں بیٹھے ہویہاں؟ چلو اٹھو شاباش بھاگو یہاں سے“
ہما جنئک ئِ پت ئَ آئی ئَ را ہکّل کت ءُ گشت بلے میرل ئَ آئی ئِ نیمگ ئَ چار اِت ءُ پدا کندگ ئَ لگ اِت ۔
”حرامی ہنستے ہوچلواٹھونہیںتو ابھی فوج تمھیں ڈنڈا کریگا“
جنئک ئَ میرل ئِ کندگ ئَ چہ بد برُت ءُ چنکے ہاک زُرتے ءُ آئی ئِ سرا مانشانت ے۔میرل سرا داں پاداں ہاک ئَ پُرّبوت بلے آئی ئَ ہچ نہ گُشت۔
” بیٹی یہ حرامی بلوچی ایسے نہیں اٹھے گا جب تک اس کو مار نہ پڑے“
پدا جنئک ئَ یک سنگے زُرت ءُ آئی ئَ را جت ۔
سنگ ئِ لگّگئَ گوں میرل ئِ سر ہون ئَ پچ بوت ۔آہژم گپت ءُپاداَتک ۔جنئک ترس ئَ چہ تچگ ئَ لگ اِت میر لئَ سنگے چست کت ءُ آئی ئِ پُشت ئَ تچگ بنا کت۔
٭
شمال بندنئَ درآمدانی آہگ ءُ جاہ منند بوہگ ئَ دگہ د´روشمے آﺅرتگ اَت ۔ حمل جیئند تہنا یک کسّہ یے جوڑ بوتگ اَت ۔شمال بند ن شمال بندن نہ اَت جناح پور جوڑ اَت ۔تیاب گیمرتگ اَت شمالئَ وتی پیسریگیں کشّگ یلہ کتگ اَت کوہ ئِ پیشانی مُجتگ اَتمغل ئِ(ہمے کوہئِ بنداتی بہر) دیم ئَ نوداں نہ بستگ اَت گلزمین ئِ سینگ دردانی یک امبارے جوڑ اَتءُدرابے ترک ءُ توار ملور اِتنت
شمال بندن ئِ مہلوک بے سد ءُ سما اَت ۔بس یکیّں ھبر ئَ وش اَت کہ درآمدانی آہگ ئَ گوں مئے ملک دیمروی کنگ ئَ اِنت ۔سرکار ئَ مزنیں درمان جاہ،بحریہ وانگ جاہ ، کنٹومنٹ بورڈءُ لہتے ورناہاناں ماں نیوی ئَ شش ءُ ہشت ہزار والا پگار ئِ روزگاردات ۔شش ءُ ہشت ہزار پگار ئِ روزگار ئِ عمل گشئے پراہاں دنیایے اَتءُ ہمیشاں چہ آ گل اِتنت کہ مئے ڈیھ دیمروی کنگ ئَ اِنت ءُ نوں کراچی ءُ اسلام آباد جوڑ بوہگ ئَ اِنت ۔شمال بند نئِ مہلوک ئَ وھدے بلوچستان ئِ ایندگہ دمگانی ھال ہُش کتگ کہ فلاں دمگ ئَ مردم چست کنگ بوتگاں گار ءُ بیگواہ اَنت،جنئگ بوتگاں، لاش دور دئیگ بوتگاں ،فوجی جنئگ بوتگاں ، ہڑتال اِنت ،گڈا آہاں اللہ ئِ شکر گپتگ اَت کہ شرّیں شمال بند ن ئَ آزاد بلوچستانئِ نعرہ ءُ کشُگ ءُ لاشانی دور دئیگ نیست اِنت ۔تمامیں مہلوک بے سدءُ سما اَت بلے شہر ئِ تہا یکے اَست اَت کہ آئی ئَ را درآمدانی آہگ ءُ وتی ڈیھ ئِ صورت ئِ مٹّ بوہگ ئِ گم چو وروکئَ ورگ ئَ اَت۔آمیرل اَت
مروچی ئئَ چہ 8سال پیسر وھدے اے ورنا بی ایس او ئِ سیشن ئَ شال ئَ شُت تہ آئی ئَ سیاسی سرکلانی تہا بہر زُرت ۔راج ءُ ڈیھ ئِ مہر ، زبان ءُ ربیدگ ئِ زندگ دارگءُ دگہ بازیں سر حالانی سرا آئی ئَ راسر پدی رست ۔آئی ئِ دل ئِ تہا پہ وتی ماتیں گلزمین ئَ مہر ءُ محبت ئِ یک زِرے چول جنئگ ئَ لگ اِت۔آئی ئَ مار اِت کہ ما غلامیں ءُ یک غلا میں پُسّگے ئِ کار تہنا ہمے بیت کہ وتی پیسرا وتی ڈیھ ئَ آجو بکنت۔
وھدے آ سیشن ئِ چہ پد وتی ہند شمال بندن ئَ واتر بوت تہ آئی ئَ زوت مہلوک ئِ سر پدی ئِ کار بندات کرت ۔ہر دیوان ئُُ مجلسانی تہا وتی ڈیھ ءُ راج ئِ غلامی ئِ بابت ئَ ورناہانی ذہن سازی کت ۔پدا میرلئَ بازیں مردمے تیار کت ءُ پہ وتی حقانی لوٹگ ئِ حاطر ئَ شاہدگ ءُچار راہانی سرا زہر شانی کت ءُ روانک کشّ اِت۔برے پہ بیگوائیں مردماں شُد کیمپے جتگ اَت وانگ جاہانی تہا بازیںنودر بر آئی ئِ نیمگ ئَ آہان بوتاں ۔ شمال بند ن ئِ تہا اے نوکیں راج دوستیںسیاستئِ دروشم فوجی سرکار ئَ جوان لگگّئَ نہ اَت۔سرکار ئَ چار اِت کہ آئی ئِ سی سالی پلاننگ چو مہ بیت کہ ہاکاں ہوار بہ بیت ۔پلاننگ ئِ رِد ئَ آئی ئَ شمال بندن ئِ مہلوک غلام جوڑ کتگ اَت ءُ پدا میرل ئِ اے سیاسی چست ءُ ایراں سرکار پہک تکانسر کرتگ اَت۔سر کارئِ یک مزنیں پلاننگ ے تیوگیں ”کوہ بُن“ ئِ آبادی چست کنگی اَت ءُ اود ئَ قبضہ کنگی اَت کہ شمال بندن ئِ یک میتگ ے اَت ءُ نیول بیس ئَ ڈُکّ اِتگ اَت۔ بلے میرلئِ اے مہلوکئِ تہا سرپدی ئِ سیاست ئَ آہاناں کمے تکانسر کرتگ اَت بلے سرکار ئَ چار اِت کہ ایشی پیش کہ مہلوک ئِ تہا گیش سرپدی بئیت ”کوہ بُن“ئِ قبضہئِ کارئَ پیسرا بکن، پدا سرکارئَ جار جت کہ
”کوہ بنئِ درائیں مردم برو اَنت ءُ پنجگ ئَ جاہ بہ نند بباں ،درستانی لوگانی ءُ زمین ءُ ڈگارانی قیمت آہاناں دئیگ بنت۔“
اے جار ئَ چہ میرل ئَ باز کوکار ءُ جاک کت۔جلسہ ، ہڑتال ،روانک ءُ شدکیمپ ءُ زہرشانی کت کس ئَ آئی ئِ گون ئَ ہمراہداری نہ کت۔سرکارئَ تیوگیں مردماناں زر دات ءُترسینت کہ وتی گِس ءُ جاگاہاں یلہ بکن اَنت۔درائیں مردماں وتی دزنبشت داتگاںءُوتی پت ءُ پیرکی جاگہ سرکارئَ را بخشتگءُ پنجگ ئَ شتگ ءُآباد بوتگاںکہ سرکار ئِ نیمگ ئَ آہاناں ہمودا زمین دئیگ ءُ آباد کنگ بوت بلے میرل ئَ وتی گس یلہ ندات۔
”من وتی پت ءُ پیرکی گس ئَ ہجبر یلہ ندیاں ،مرگ منا امبازیت بلے وتی زمین ئَ ندیاں۔“
یک شپے میرل ئَ آئی ئِ گس ئَ چہ چست کنگ ءُ برگ بیت۔آیک تیوگیںماہے ئَ گار ءُبیگواہ بیت ءُپدا آئی ئَ را یلہ دئے اَنت۔بلے بازیں لٹّ ئُُ کُٹّئَ چہ آ وتی ہوش ءُ سار ئَ رﺅت ءُ گنوک بیت۔پدا آئی ئِ پیریں مات آئی ئَ را زوریت ءُ پنجگ ئَ کئیت پدی زِر ئِ نیمئَ جاہ منند بیت ۔میرل ئِ چست کنگ ءُ گنوک بوہگ ئِ حال ئَ پد ”شمال بند “ ئِ حقیقیں راجدوستیںسیاسی پترّ چمدا چہ پیچگ بیت ۔تمامیں مہلوک سرکار ئِ بہر جوڑ بیت ءُ وتی ڈیھ ، راج ، زبان ءُ ربیدگ ئَ شمشکار بیت بلے میرل انگت پدی زِر ئَ نندیت ءُ وتی زِر، زمین، مرُگ، کوہ ءُ دمگ ئِ ندارگاں چاریت
٭
تیر ئِ توار ئَ چہ تیوگیں شہر جکس اِتپدا یکےدوسئےچارپنچششتیرانی یک رِدے اَت کہ گوارگئَ اَتشہر تکانسر اَت کہ چے بوت؟؟
پداحال اتک کہ فوجیاں میرل جتگ کہ یک میجرے ئِ جنئک ئَ را سنگے جتگ ے
میرل ئِ تیراں سمبتگیں لاش تیاب دپ ئَ کپتگ اَتہونانی یک لکیرے دیم پہ تیاب ئِ آپاں ہوار بوہگ ئَ اَتچول آئی ئِ پاداں واس گرگئَ اِتنتبلے سنگ انگت آئی ئِ دستئَ اَت
٭٭٭
