مات ۔ ۔ ۔ زاہدہ رئیس راجی ءِ آزمانک چمشانک ءِ وداریگ

[Zahida Raees Raji]

goun mahtaak sechkaan e mennatvaariya

آزمانک:

مات



زاہدہ رئیس راجی

 آچہ شُد ءُ تُن ءَ بے تاھیرلوگءَ سر بیت۔پہ تُن ءِ پروشگ ءَ سرسر جنان زُوت زوت ءَ کمپان ءَ گوزان چُل ءَشتءُ پاٹی ءِ سرا تاسے زرتءُ چہ مٹ ءَ آپ ےمان کت۔آپےیک تنگءَ وارت اَنت۔ہمے پیمءَ دوگلاس پُرایں آپ پد ماں پدءَ ورگ ءَ رند گوشے دلے سارتءُچمے روژناہ تر بیت اَنت۔  چماں لوگءِ چپ ءُ چاگرد ءَشانک دیانءَ  دیم ءِ کوٹی ءَ نشتگیں وتی لوگ بانک حنیفہ ءَ را دیستے کہ  زگ زگی مشینے دیما ات ءُوتی کش ءَ ایریں کرائی گداں دُچگءَ ات۔
آئی ءَ نزگندگ ءِ نزری عینک چہ وتی پونز ءِ سرا کمے  جہل تر کنزینت ءُ ائیءِ نیمگ ءَ چمے چست کُت انت ءُ چارگ ءَ لگ ات  بلے پدا بے پسکگ کنگ ءَ پدا گدانی دوچگءَدلگوش بیت۔   
آئی ءَ وتی مزوری ءِ ازبابانی پیلک چُل ءِ دروازگ ءِ پُشت ءَ ایر کُت اَنت ءُ چُل ءِ دیوال ءَ جتگیں آپ ءِ نلے پچ کُت ءُ دز دیمے شُشت انت ءُ وتی دزمال ءَ گوں  دزدیمے پہک کُت اَنتءُ کوٹی ءَ پُترات۔
لاپءِ شُدیگی آپاں  کم تراینتگ ات بلے پدا ھم نگن ءِ تلب وتی جاہ ءَ۔ بلے ھمتےنیست ات کہ  چہ وتی لوگ بانک ءَ سُبارگءِ جُست ءَ بہ کنت۔
آئی ءِدل ءَ بازیں گپ است ات کہ گوں وتی لوگ بانک ءَ بہ جنت اش، بلے حنیفہ ءِ ھاموشی ءَ آئی ءِ دل ءِ واھگ دلپروش کُت انت۔
آئی ءَ کوٹی ءِ توکی نیمگ ءِ دیوال ءِ دیما ایریں سرجاہ زُرت ءُ  وتی سرے سرجاہ ءِ سرا دْور دات۔ دل ئےِ  آگاہ ات بلے چم ئےِ  چُپت کت انت۔  کساس ساھتے ءَ رند آئی ءِ یکیں بچک چہ وانگ جاہ ءَ واتر اتک۔
چُک ءِ سلام ءِ توار ءِ گوناں اشی ءَ وتی چم پچ کُت انت۔  حنیفہ ءَ وتی دوچگ ءِ گُد یل داتگ ات ءُ پاد اتکگ ات۔  چُک ءِ دزدیمے ششت انت ءُ چہ وتی گُدانی پیلک ءِ توکا کسانیں تندوری نگنے  کش ات ءُ گوں امبڑی ءِ چٹنی ءَ دیما ایرے کُت انت۔
” امّاں ! تؤ وارتا؟ “ چُک ءَ جُست کُت
”ھؤ منی چُک ۔ اے پہ ترا تئ مزنیں مات ءَ دیم داتگاں ۔ دونگناں۔ یکے انّوں بُور دوئمی شام ئیگ اِنت۔  باندا منی گدانی کراہ کاینت گُڑا ما وتی تب ءِ چیز گرادیں وریں۔ ۔ ۔ شریں ؟۔ “

چُک گل بیت۔ سرئِےگوں ”ھؤ“سُرینت  ءُ نگن ورگ ءَ لگ ات۔ سبارگ ءَ  رند چُک ءَ وانگ جاہ ءِ  گُد بدل کت انت ءُ پہ لئیب ءَ در کپت۔
آئیءَ ھمیں یکیں جاہ ءَ لیٹگ لیٹگ ءَ وتی دل  ءِ درد ایر بُرت انت ءُ  واب کپگ ءِ جہد کُت بلے شُد وپسگ ءَ نئیلگایت۔ زیکیں سبارگءَ ھم  زیگیں سھب ءِ سرتگیں نگن اتنت کہ گوں آپیشکاں  وارتگ اتنتی ۔ شام ءَ ھم ھمے وراکی اتنت ءُ سھب ءَ کہ نارشت ھلاس بیتگ اتنت تیچّ ءَ ھمے سرتگیں نگن کہ ایر اتنت۔ آئیءَ پہ حنیفہ ءَ یل داتگ اتنت ءُ وت گوں شدلاپی ءَ کار ءَ شتگ ات۔
یک شریں ساھتے ءِ اے کش ءُ آ کشءَ لیٹگ ءَ رند دلے کمے واب ءَ شُت۔ مات ءِ پرمہریں دروشم چمانی دیما آدینک بیت ،آ چہ واب ءَجہہ سِرّاِت۔  وتی وپسگے  مھتل کُت ءُ پاد اتک گُدے چنڈاتنت ءُ پہ دزدیم شودگ ءَ شت۔
اے دوئمی سال ات کہ لوگ ءِ سرا واری اتکگ ات پیسرا لوگ ءَ دُزی بیت ءُ جنین ءِ درستیں سُہر ءُ کباٹ ءَ ایریں زر شپ ءِ نیمءَ دُزاں بُرت انت ۔ دُز کئے بیتگ انت ءُآیاں چون سرپدی بیتگ کہ ایشانی گْورا چیزے است!انگتءَ کس ہم  نہ زانت۔
 بازیں گریوگ پٹینگ ءَ رند آیاں اے ویل، ھُدا ءِ یارتگیں چکاسے زانت ءُ  ھاموش بیتاں۔ بلے انگت دل چہ اے تاوان ءَ بُود نہ یتکگ ات کہ آئی ءِ دست ءِ دہ سالگیں کار یکپارگی شت۔

کار مستر ءِ بیران بئیگ ءَ  پد آئ ءِ کاروبار ءِ شریدار ءَ کارگس ءِ سرا بیڑ آؤرت ءُ کہنیں درستیں مردمانءَ ھکداری ءِ چارکے زر دات انت ءُ  چہ کار ءَ در کُت انت۔
آئیءَ جہد کت کہ ہمے کمیں زراں چہ کارءُ بارے بندات بہ کنت ۔ جنین ءَ زور داتءُ گشت کہ اے زرّاں برباد مہ کن ءُ لوگ ءِ دپا کیبینوکے پچ بہ کن ءُ مردمانی گیشیں  زلورت ءِ چیزاں بہا بہ کن۔ اللہ وت کموکءِتوکا برکت دنت  بلےآئی ءَ وتی سنگتانی گپ گوش داشت انت ءُ زر گوں وتی دگہ ھمکارےءَ  یک کمپنی ے ءَ  پہ کارمدار ءَ دات انت کہ ماہءِ سرا دہ درسد نپ دنت ءُ اسل زراں وتی کرّا امانت کنت ءُ لُوٹ ءِ وھد ءَ دنت اش ۔

زرانی جم کنگ ءِ تاں چارماہ ءَ، ماہ پہ ماہ چہ پگار ءَ گیش زرلوگ ءَ آھان بیت بلے پنچمی ماہ ءَ رند اے زرانی رسگ بند بیت۔ پہ زرانی پد جنگ ءَ وھدے آئیءَ  وتی ھمکارءِ ھمبرائی ءَ کمپنی ءِ کارگس ءَ سرجت داں دیستے کہ بازیں مہلوکے کارگس ءِ بندیں دروازگ ءِ دپا جاک ءُ سلوات کنگ ءَ انت ءُ وتی زھرشانی ءَ درشان کنگ ءَ انت کہ آیاں کمپنی بند کُتگ ءُ تتکگ انت۔  آئیءَرا  وتی گوشانی سرا باور نہ بوئگءَ ات۔ چہ وتی ھمکار ءَ جُستے کُت آئی ءِ چم اوں چہ ارساں گلگل اتنت کہ لالچ ءَ آ ھم برباد کُتگ ات۔

وھدے آئیءَ وتا لوگ ءَ سر کُت ءُ حنیفہ چہ آئی ءِ بربادی ءَسرپد بیت۔آ یکبرے وا سک دل پدردیگ بیت۔ بلئے پداآئی ءِ لالچ کنگ ءِ سراآئیءَ را سک شگانے جت ۔ اے ساہتاں آئی ءِ سر جہل ات ءُ گشے دپ ءِ ھبر کسے ءَپچ گپتگ اتنت۔ حنیفہ ءَ وتیگ ءُ وتی چْک ءِ باندات ءِ پگر بے تاھیر کنگ ءَ ات ۔
آئی ءَ حنیفہ ءَرا باور کنگ ءِ جہد کُت کہ من تئ گپ نزورگ ءِ مزنیں ردی ے کُتگ ،بلئےنوں تو ھرچی گشئے من ہما وڑکناں۔ بلےنوں حنیفہ ءِ بھیسہ چہ آئیءِ سرا ھلاس بیتگ ات۔

آئیءَ پہ کارءِ شوہاز ءَ وتی کلیں وس کارمرز کُت انت بلے کارے دست ءَ نہ کپت۔ حنیفہ ءَ شریں وہدا ں پہ وتا زُرتگیں زگ زگی مشین چہ انبار ءَ کش ات ءُ ھمبراہ ءُھمسائیگانءَ ھالے دات کہ کسے کرائی گد دوچائینگ ءَ دلمانگ انت گڈا آئی ءَرا بہ دنت اش۔

 چیزے روچ ءِ توکءَ آئی ءَرا بازینانی گُد پہ دوچگ ءَ رسان بیت اَنت۔ لوگ ءَ ھم پہ ورگ ءَ کمک رسان بیت بلے اے زر اینچو نہ یتاں کہ لوگ ءِ کلیں ھرچاں کشئت بہ کننت۔
 آئی ءَ ھم سرجنان کُت کہ کارئِے بہ رسیت۔ بلے گندگ ءَ بھت نوں چہ آئی ءَ زھر ات۔

بازیں لئینانی رؤگ ءَ زگ زگ ءِ کار ءَ ھم اسر دؤر دئیان کُت۔  گرانی ءَ لئین ءِ بل ، چک ءِ کتابانی ھرچ، بیماری سیماری ءُ مہمانانی رپت آمد ءِ ھرچ  کشگ سک گران ات بلے ٹک ٹک ءَ زندگی روان بیت۔

آئی ءَ دوسال پُریگیں در پہ در بئیگ ءَ رند بازار ءِ یک دکانے ءَ دروازگ دریگانی کُبل شر کنگ ءُ جنگ ءِ کار ءَ دست مان دات۔ دکان ءِ مستر ءَ ھپتگ ءِ سرا پگار دئیگ ءِ زبان کُت۔ مروچی دوئمی روچ ات کہ کارءَ رؤگ ءَ ات۔ حنیفہ ءَ ھمسائیگ ءِ گُد دوتکگ اتاں۔ بلے گُدانی زر نہ رسئیتگ اتنت ۔  گُدیاروک دئیوک ءَ ھال داتگ ات کہ گُدانی بانک وتی ملک ءَ شتگ ءُ دو سے روچ ءِ توکءَ کئیت اِنت۔ حنیفہ ءَ بازیں ھبرھالے کُت گُڑا گُدیاروک ءَ دگہ جوڑی ے گُد دات کہ تؤ ایشاں زُوت دوچ من ایشانی زراں ترا زوت دئیاں۔

مروچی لوگ ءَ پہ ورگ ءَ ھم ھچ نیست ات ءُ دپ دل ءَ ھم نہ گپت کہ چہ وتی دکان ءَ وام بیزیرایت۔ کہ کار نوک انت چش مہ بیت وام پچ گرگ ءَ کارمستر بد بہ بارت ءُ چہ کار ءَ در بہ کنت۔

سُہب ءَ ھما وھد ءَ کہ آئی ءَ چہ لوگ ءَ درکپگی ات آئی ءِ کستریں وسرک ءَ دوتندوری نگن گون اتنت ءُ پہ حنیفہ ءَ یارت داتگ اتنت۔

چہ ھمے نگناں یکے آئی ءَ وتی بچک ءَ را دات ءُ دوئمی پہ آئی ءِ شام ءَ ایرے کُت ۔
___________
 

چہ واب ءَ پاد آھگ ءَ رند آئی ءَ وتی دزدیم شُشت انت ءُ دیم پہ مات ءِ لوگ ءَ روان بیت۔ مات ءَ سہمی سال ات کہ مستریں برات ءَ وتی کرّا کُتگ ات۔

ھپتگ دوھپتگانی سرا مات ءِ نیمگ ءَآئی ءَرا الم ءَ سر جنگی ات۔ انوں ھم  واب ءَ وتی مات ءِ پُر مہریں دروشم ءَ  گندگ ءَ رند دل ءَ لوٹ ات کہ مات ءِ کونڈانی سرا وتی سرءَ ایر بہ کنت ءُ دل ءَ کمے تاہیر بہ دنت۔  آ کہ برات ءِ کمپان ءَ سر بیت داں تچک ءَ تچک  مات ءِ کوٹی ءَ پُترات۔ چمے پہ مات ءَ کپت اَنت کہ وتی مسلا ءَ پیچگ ءَ ات  بزاں عصر ءِ نمازی ونتگ ءُ ھلاس کُتگ ات ۔

انچوکہ مات ءِ چم پرائیءَ کپت انت داں آئیءِ کرچکیں دیم ءِ سرا بچکندے تالان بیت۔ آئیءَ مات بگلءَ کتءُ پدا آئیءِ کش ءَ نشت۔ مات ءِ دستے وتی دست ءَ کت اَنت ءُ ھال اھوالے کت۔

ماتءَآئی ءِ دیم ءِ سراوتی  چم سک دات اَنت۔بلئے آئیءَ وتی سر زرت ءُ مات ءِ کونڈانی سرا ایر کت۔
” آدم! منی چُک چون انت ترا؟ ۔ ۔  “
 آئیءَبچکند ے جت ءُ ھچ نہ گُشت

 بچار وتی دیم ءَ چوں ھُشک ترایتگئے؟ “ ماتءَ گوں پریشانی ءَ آئی ءِ نیمگ ءَ چاراِت  ءُ  دستی آئ ءِ دیم ءِ سرا تراینت ءُ گُشت:”
اماں۔ ۔ ۔  من شراں، ھچ نہ انت۔ پہ من وتا ھچ پریشان مہ کن “ آئیءَ مات ءَ راگوں پُرمہریں توارےءَ پسو دات ءُ مات ءِ دست چُک ات۔

 گپے زانئے!؟ نیم روچ ءَ منی  دل واب ءَ شتگ اتءُ من ماں واب ءَ دیستگ ات کہ  تؤ سک شدیگئے بلے ترا ھچ نیست کہ چیزے گپت وارت بہ کنئے۔

مات ءِاے گپّ ءِ اشکنگ ءَ گوں آ سک ھیران بیت۔چہ دل ءَ دردےچست بیتءُ  چہ چم ءَ کنڈا ارسے ترمپے ایر ریتک۔ بلے مات ءِ گپ ءِ ھچ پسوے نہ دات۔ دمانے گوں ھاموشی ءَ مات ءَ آئ ءِ سرا چم سک داتنت ءُ چارات۔  پدا چہ وتی کُٹ ءَ آئی ءِ سرئ چست کت ءُ پاد اتک، کوٹی ءِ کنڈ ءَ ایریں تاس ے زرتءُ یارت آئیءِ دیما ایرئ کت۔ آئ ءِ توکا بٹ ماش ایراتنت۔ آ گوں ھیرانی مات ءَ چارگءَ لگ ات ءُ جُستی کُت

” اماں! اے وَ تئ سبارگ انت۔ تؤ زاناں سبارگ نہ کُتگ؟ “

” منی بچ ! چُک ءِ شُدیگی مات ءَ کجا ورگ ءِ موہ دنت “ 

ھلاس

[Zahida Raees Raji]

Rebel Leal Baloch, Jabar Askani, Liaqat Ameen and 12 others like this.

Ghani Pahwaal:
 banuk kessay waqiyayani tarteb o kerdarani nafsiyat o ayani fitri darangaza azmank baz sob mand o por taseer kota pameshka ishiy wanaga wanok wat hmy kessa o waqiyayani wata yak bahry mareet goshy ay dorosten hbar aiy dema bayagayant....baz sob mandy azmanky shomara mubarak bibit
Thursday at 12:10pm · Unlike · 1

Zend E Bandeeg:
 Jowan. Maat ay Mehr bemat int.
Thursday at 1:28pm · Unlike · 1

Sharif Zia:
 han dear zahida ji ye mara samaj mein nahein ante ji
Thursday at 3:19pm · Like

Amjed Darvesh Baloch:
 baaz wash int, barebar int, agan hame paima johd barjah bebeet tan ich shak nest k balochi labzanka aazmank a noken maddiye naseeba beet,,,,
Thursday at 4:09pm via mobile · Unlike · 1

Mureed Hadam:
 baaz jowaan int
Thursday at 8:04pm · Unlike · 1

Zahida Raeesi:
 برات غنی پہوال Ghani Pahwaal شمئے لک منت پہ دلبڈی دئیگ ءِ ۔ وژنام باتئے۔
Yesterday at 7:22am · Like

Zahida Raeesi:
 Zend E Bandeeg shome mehrbani
18 hours ago · Like

Zahida Raeesi:
 Sharif Zia, tao wata baloch goshe bale baluchi diwwan a Baluchi kanaga tara tab nakant.
18 hours ago · Like

Zahida Raeesi:
 Amjed Darvesh Baloch, tai delbaddi e mennatvaaran'
18 hours ago · Like

Zahida Raeesi:
 Mureed Hadam tai mehrbani pah azamnk e doust daarag e
18 hours ago · Like · 1

KhalidBuledi Baloch:

 منا را یات باں الّم منی مات ءَ شپی پاساں منارا شیر میچینت ءَ ، شُدیکیں لاپ ئے گم زرت ءَ ، تگرد گوا پی کتگ زند ءَ منا چار لبز وانیتگ ___ چُک ءِ شُدیگی مات ءَ کجا ورگ ءِ موہ دنت “
باز جونیں آزمانک ئے ما ونت منا باز وشی بوت ،،سوبیں باتےگہار زاہدہ
17 hours ago · Unlike · 1

Liaqat Ameen:

 باز پُر مہر ءُُ درداں سرکیلیں آزمانکے۔نزاناں پرچا من اے آزمانک ونت نہ کت،آسر باز شریں رنگے گون بیتگ اَت، بندات ام جوان ات،کردارنگاری باز شرین رنگے ءَ کنگ بیتگ۔زبان ءُ بیان ءُ گون ہیال ءَ ہمریچ انت ، کہ وانوک ءَ وتی نیمگا کش انت۔۔وانگ وانگ چم ارسیگ بیتاں۔۔سر سلامت ۔۔
15 hours ago · Unlike · 1

[Naguman]

جوانیں آزمانکے۔۔

[Zahida Raees Raji]

جوانیں آزمانکے۔۔

وھد کشگ ءُ آزمانک وانگ ءُ ستا کنگ ءِ لک منہ واراں

[hafiz_aaskani1]

ماشاء اللہ،سک واش نبیس اِتگ،،،،،،،ٹیلی پیتھی اگاں راستے گڈا ہمیشی جنداِنت،،،،بیشک مات مات اِنت۔۔