تپتان دوت کنت
چه عھد و زمانگاں ،
ھزار و سدیاں ساری
چه بازیں پیڑیاں پیش
نزاناں چه کدین و تا کد
سُچیت جبین و
دوت کنت تپتان .
" کاینت منءَ یات
آ گپ و گالاں
آ ماہ و سالاں"
تپتان ءِ دامنءَ سبزگ ات
ھیرتانی تردّگ ات
میش و بُز گلانی دودگ ات
لوکانی دریپّگ ات
ڈاچیانی دنزگ ات
شیراش چه ماھگاں شنزگ ات
ھینزکانی منتگ ات
دوگ و سمبارءِ نوشگ ات .
"وش اتنت آ دور بلوچانی
تاب دیگ ڈالشاھیں بروتانی
" چکگ و چکاسگ سگارانی"
مالدارانی لڈ و بوج ات
جوپاگ و ھامین ات
پیر و ورنا شاد ات
بلوچ ڈیه آباد ات،
کاینت من ءَ یات
گشتگ جمالدینی آزات:
" آ گپّ و گالاں آ ماہ و سالاں
پیش ءِ بلوچ انت رند چاکری انت
ھر جا روانت آ ملک اش وتی انت
ترسے ندارانت وت بادشاہ انت
شپ روچ روانءَ منزل جنان ءَ"
کاینت منءَ یات
رنجاں بنت زیات
بلوچ ءِ پلّیں آبند ءَ ،
مان رتک انت گوباز
ٹگ و" موچڑیں" رپکباز
جت اش جنگانی ساز
ملک مئے کت اش آوار
آدرہ برنجی کشار
ماش گوں پرماشاں
تنگھیں گله و ارزن
ھیکی لپاشت انت۔
یلیں ورنا سرمچاریں
راجی سردار کنگریں
چو کڑبی ڈل ات انت
تیگاں تیزیناں،
ایرنشت انت تیرکوہ
ڈوبر ءَ تپتان ءِ ۔
بلے بزان که،
"چه ابد بیتگ تا ازل مانیت"
تپتان نبیت ایرماد
بلوچ ءِ ڈیل و بالاد
نجنت جوکاں ۔
تپتان دوت کنت،
آسگوار بیت په بدیگاں
دری زورآور و شومّیں لدیگاں ۔
ندر پما روچ ءَ ،
تپتان شور کنت
مُچّاں ھور کنت
درپشیت سھیل
وتواجھی ءِ
وت مستری ءِ ۔
تپتان دوت کنت
تپتان دوت کنت
۔
اپریل 2007
اسماعیل امیری