Aaie paadan dambortag at. Rouch cha kandaga jahl kapaan at, bale tany wahdi menzele gwaah o neshaan nyst at. Mehrjaten mosaaper goun wati hourken kalleega latta jekk dayaan at dym pa dooren menzelia, bale noon aaera shapa ham geptag at. Dela jydety ke ey shap ham pa pand begwazeet bale noon aai paadaan ham jaab daatag at. Dasty man koundan sakk kot o nesht.
Shape syaahi grandaga at. Cheretaan shape bytawaari doora sara zortag at. Paadbramshie tawaara aaie goush jekk kot ant. Gomaany kot k begende rahgwazie beet, bale ey wa keshky nahy k rahgwazi ra o aa bekanant. Paadbramshe tawaar nazzikter aayaan at. Aa yak syaahpoushaaken mardy wati nymaga aayaga gendeet. Aai jaane pot paad kaayant. Dela gwasheet k dastan tokk bejanan o betachaan bale ey draajen pande borraga aaera anchou zhand o pand kotag at k aa soragi na at. Aa tachk boot.
Gendeet ta syaahpoushaaken mard aaie saroona oushtaatag. Aa wati chamman band kant.
Ey syaahtaaben mard aaera badda kant o rahaadag beet. Saahatia rand aa yak hanchen mytagia sar ban k ouda mardomi pad nagwaaheet, bale cha damk o deewaalan hamy zaaher at k karnaan pysar ey weraanen shahr mardomi mehraani hankyn bootag. Aaera hamy tahtaala gwar jat k aa shaahere sar balken hamy mytaga kaptag, o gwashtagy ke~
Ey chepemen halky, dyr ent eda zendagi nayatkag
Eda chounen kahry kaptag, eda mardomy nagwaaheet
Aaia hamy syaahtaaben mard poul kot ke ey shahre mardom koja shotag ant. Marde passa yak kessahy at.
Gwashty, "Karnaan pysar ey shahr kourani hankyn bootag. Ede tawaamen mardom kour bootag ant k aawana goun rozhna mehr bootag. Yak shapy shahre tawaamen mardom waab bant k rouch goun wati rozhna zameena eyr kaet. Rouche braanzaani garmi aawana cha waaba paad kant. Kour wa chounaya kour ent, bale agan mehre naadraahi yakkiara gwar bejant ta tahna aai chamm na balken agl o pahm ham kour bant. Rozhne mehra aawani akl o pahm ham kour kotag at, pameshka tawaamen shahre mardom pa rouche rozhne dazgeraga cha zende pashtkaptagen rouchan zebahr boot ant."
Peeshokie sheperraga mana paddrahynt. Mana cha mani tahnaahi o shape syaahia abyd hech gendaga nayatk.........