Author Topic: robortein kaar daar:aashoobi  (Read 1938 times)

0 Members and 1 Guest are viewing this topic.

Offline Asghar Zaheer Baloch

  • Baluchi Nadkaar بلوچی ندکار
  • ***
  • Posts: 203
  • Karma: 26
robortein kaar daar:aashoobi
« on: July 20, 2011, 08:59:38 PM »
روبورٹیں کاردار اے شھشنابیں گیدیءِ مشینی میتگءَ اگں ما وتی چماں شانک بدئیں گڈا مارا دو رنگیںبنی آدم گندگءَ کئیت۔یکے ہما کہ وتی جندئے لاپءِ شوھازگءَ سر بتکءُ گار زدگ،دومی ہما کہ وتی زندءَ را گیشیں آسراتیانی پجارینگءِ ھاترا نوک نوکیں ساچشتانی دراں ٹُکگ ءُ تیلانک دئیگءَ مشکول اِنت۔بزاں دنیارنگ ناں رنگےءَ گوں وتا دز گٹ ءُ سلے ولے اِنت۔اگں ھوریں رنگءَ چارگ بہ بیت گڈا ہمے ھبر دیما کئیت کہ ”جہدءُ شوھازگ“ ھردوانی ھوریں بنجل اِنت۔یکے پہ مشینی زند گوازینگءَ ھدوک ءُ دومی وتی چاگردءُ ابرمءِ گِرءُ چیلاں سرءُ لینڈ۔   سائنس ءُ ٹیکنالوجیءَ دیمرئی کتگ،نوک نوکیںمشینی سازءُ ازباب جوڑ کنگ بوتگ اَنت۔زی روچانی سپر ہپتگ،ہپتگانی سپر ماہ ءُ ماہانی سپر سالاں شتگ اَنت بلئے مرچی دمانءُ ادارانی گپ اِنت۔زی یک کارےءِ سرجم کنگءَ باز وھد در کار بوتگ بلئے مرچی چو نہ اِنت۔زی پوریاگریں آدمءِ ارزشتءُ بستار برز بوتگ بلئے مرچی پوریاگریں مشین ءَ جہلءَ دور داتگ۔  یک دنیا ءُ آدمے وتی وجودءَ را رکینگءِ جہدءَ اِنتءُ یک دنیا ءُ آدمے ماں گیدیءَ وتی ساچشتی وجودءِ ابدمانیءَ را منارینگءِ ھاترا دستءُ پاد جنگا اِنت۔  مرچی دنیا ہمینچو مشینی جوڑ بوتگ کہ آئیءِ پگرءُ سسّاءِ دروشم اوں مشینی اِنت۔آ ہمک چیزءَ را مشینی رنگءَ چاریت۔۔آ واہشتاناں اوں مشین ءِ دپءَ دنت۔آ آدمءِ اندری رازاںمشینءِ سرا در گیجگ ءِ جہدءَ کنت۔آ نیپچونءِ ودی بوتنءُ سالگرہءَ در گیج ایت۔ماہءِ سرا رؤت،خلائی شٹل جوڑ کنت۔نادرائیاں در گیجگءُ آہانی علاجءُ بُرءُ برینءِ در ءُ وسیلہاں شوھازیتءُ دیما کاریت۔ سائنسءَ یک مزنءُ سوب مندیں دیمرئی ے کتگ۔بلئے باز جاہاں آئیءَانسانی کدرءُ ارزشت اوں پادمال کتگ اَنت۔انسانءِ وجودءُ ہستی اوں گوں ترس ءُ ھتراں دچار کتگ۔پہ درور اگں سائنسءَ جہاز جوڑ کتگ پہ ساتءُ سپرءِ ارزانیءَ۔بلئے میزائل ،ٹوپءُ جنگی جہاز اوں انسانءِ نیستءُ نابودی ءِ ھاترا ساڑیءُ جاڑیگ اَنت۔ہما انسان کشیں زرّات کہ آئیءِ اثر داں کرنانی کرناں است بنت،چاگردءِ ہمک ساہ دارءُ داں کہ زمین ءِ جندءِاوںازلی دژمن ءُ وڑ وڑیں نادرائیانی سَوب جوڑ بنتءُ پدا اے نادرائیانی ہچ وڑیں علاج اوں در نئیت۔پہ درور ناگاساکی،ایروشیماءُ ماتیں بلوچستان ءِ راسکوہ ہمک چم پچءُ ماروکیں دلانی دیمءَ پدر اَنت۔کہ اے سائنسءِ کارزوالی اَنت۔ادا سائنس بنی آدمءِ ارزشتءُ کدرءُ کیمتءَرا برجاہ دارگءَ بے سوب بوتگ۔ من سائنسءِ بگیر ہم نہ اوں۔بلکن کسے دلءَ بگشیت کہ اے مرد سائنس ءُ دیمروئیءَ نہ منیت۔من دیمروئیءِ منوگروں،من پٹ ءُ پولءُ شوھازگءِ منوک اوں،من ساچ ءِ منوک اوں۔ بلئے اے دو رنگءَ اَنت۔یکے ہما کہ علمی۔بزاں ہما پٹ ءُ پولءُ ساچکاری کہ ھوریں رنگءَ کل بنی آدمءَ را سیتءُ نپ بہ دنت۔پہ درور”گیشیں وانگءَ چہ بلڈ پریشر کم بیت“” تاں دیراں ڈیسکءِ سرا نندگ پہ جان سلامتیءَ شرنہ اِنت“ یاکہ”ماں بے ہوشی ءَزہنءِ بازیں بہر وت ماں وتءَ گپءُ تران کننت“ یاکہ پہ کوراں انچیں چشمک ے ءِ جوڑ کنگءِ جہد بوھگا اِنت کہ چرائیءَ چہ کور وتی راہءَ وت در گیج ایت“ءُ دگہ بازیں انچیں علمی ھوریں نپ رسانکی پٹءُ پول کہ است  باز جوان اَنت۔ دومی ہما کہ مشینی اَنت۔اے اوں پدا دو بہرءِ تہا اَنت۔یک بہرے ہما کہ بنی آدمءَ تاوان دئینتءُ دومی ہما کہ سیتءُ نپ۔ اے سائنسءُ مشینی دیمروئیءِ ھارءِ دیما انسانءِ دستءُ ازمکاریءِ بازیں ازباب بے ارزشتءُ بے پکار جوڑ بوان اَنت۔پوریاتگریں ٹَک وتی زندءِ رکینگءِ ھاترا بے دستءُ پاد گندگءَ پیداک اِنت۔پرچاکہ مرچی سائنسءَ یک دگہ مزنیں گناہے اے کتگ کہ پہ لوگءِ کارداریءِ ھاترا اوں روبورٹ جوڑ کتگ ۔ گڈا نوں اے بزگرءُ پوریا ت گریں بنی آدم کجا بروت۔           آشوبی