Author Topic: بلوچیءِ لہتیں ادبی ءُ لسانی جیڑھ۔۔۔۔۔۔۔۔۔۔۔۔ شعیب شاداب  (Read 1121 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7064
  • Karma: 356
    • Baask-Home of Baluchi Language, Literature & Culture

بلوچیءِ لہتیں ادبی ءُ لسانی جیڑھ۔۔۔۔۔۔۔۔۔۔۔۔ شعیب شاداب

ادبءِ تہا کسےءِ ادبی کارانی جائزہ گرگ ءُ آہانی گیشینگءُ آہانی سرا ایرادگرگ شّری ءُ حرابیانی پیشدارگ دنیاءِ ادبانی یک مزنیں دستورے ۔۔۔یک فنّ یے ۔۔۔کہ ہمے فن تنقیدگشگ بیت۔کہ چرے فنءَ ادب ءِ باندات رُژناہ بیت.
ادیبانی شخصیتءِ تجزیہ ہم ادبءِ بہرے آہانی زندحالانی نبشتہ کنئگءُ آہانی بابتءَ نوکیں چیزانی دیمءَ آرگ یک ریسرچے گشئگ بیت۔
نفسیاتی تنقیدءِ تہا شعر یا نبشتہ ءِ ہمراہیءَ ہما شاعریا نبشتہ کارءِ نفسیاتءِ جائزہ ہم کئیت گوں۔

اگاں کسے یکےءِ یا شخصیتءِ جائزہ ءَ گیپت ایشیءِ مطلب ایش نہ اِنت کہ آئیءَ آ بدءُ رِد کتگ یا آچہ مقامءَ جہل دؤر داتگ
جیڑھ ہما وہدءَ پادکاینت وہدے دگرے تہا دؤربہ کنت ءُ نقادءَ زاہ بہ دنت اے غیرادبی روّیہ یے گشگ بیت۔
ءُ جیڑھ پہ ذاتیاتءَ رؤت۔

اگاں ما سیدءِ شخصیتءِ جائزہءَ بگراں سیدءَ بازجاگہءَ وتی نادانی ہم دانائی لیک اِتگ آئیءَ گوادرتیابءَ انگریزجتگ اَنت ءُ آہانی شراب پروشتگ اَنت کہ اے بلوچانی ملک اِنت ادا شمارا نندگءُ شراب ورگءِ اجازت نیست۔ ہمے درگتءَ آجیل ہم بوتگ ۔ سلطان ءَ مسقطءَ پیشیءَ ہم لوٹتگ ۔
سیدءِ کوپگ ہڑ پرشتگ آئیءَ پُکّی مان کتگ ءُ سربرءَ کوٹے گوراکتگ کہ کس مزانت کہ منی کوپگ پروشتگ۔
ہمے گپ استاد صباء دشتیاری ءَ وتی کتاب ءِ تہا ہم مان کتگ اَنت کہ سیدءِ ہمراہاں نبشتہ کتگ اَنت۔

مبارک قاضی سرئے عام شراب وارت وتی شلوارءَ کشّیت پسنی ءَ تیابءَ نندایت ءُ دگہ بازیں سِل کاری کنت چو کہ بچہ بازی وغیرہ ۔اے گپ پہ مبارک قاضیءَ عیب نہ اَنت
پہ مزن نامی ءَ کسّی پولنگ صاف نہ بنت۔
بایدیں کسےءِ سرا چو ستک کنئگ مہ بیت کہ پرائیءِ ردیاں یا آئیءِ بدگشئگا دگہ دوایے مردم وتی سرا بہ زوریت۔
بلوچی ادب ہمے واستہ حراب رؤگااِنت کہ ادبی کارانی تہا بے ادبیءِ عنصرگیش بؤان اِنت۔
ادب ۔۔۔ادب اِنت
کردار۔۔۔ کردار اَنت

دنیاءَ کہ علمءِ لسانیاتءِ راہبندءُ میار قائم کتگ اَنت ہما دربرگی ءُ وتی چاگردءُ زبانءِ سرا اپلائی کنئگی اَنت۔ گوں بے رہبندیءُ وتسریءَ علمِ لسانیاتءِ رہبندءُ معیارانی پروشگ نہ تہنابے علمیءُ جاہلی عمل یے بلکیں علمِ لسانیاتءُ دنیاءِ نہ منّگءُ وتی جند،ءُ راجءُ چاگردءِ نقصان دئیگءِ برابراِنت۔بایدیں لسانی جیڑھ ابید علمِ لسانیاتءِ دربرگءَ جیڑگ مہ بنت۔
ہر زبانءِ وتی کیفسٹی استاں کہ آ دگہ لبزاں ،ملکانی ناماںءُ ٹیکنالوجیانی ناماں وتی چاگردی بساطءَ چے حدّءَ قبول کن اَنت۔
خاص کرٹیکنالوجیانی نامءُ ملکانی نامءُ دگہ علمءُ زانتانی ناماں کس وتی زبانءَ مٹ نہ کنت ءُ آہاں گاجیل نہ کنت۔ ہر لبز کہ چاگردءِ تہا ہمارنگءَ کارمرزبیتءُ عوامءِ دپءَ بیت ہما رنگءَ منّگ بیت دگہ کسےءَ اختیار نیست کہ تہادؤر بہ کنتءُ دگہ لبزے بہ تراشیتءُ عوامءِ درمیانءَ کمیونیکیش گیپ پیداک بہ کنت۔اے علمِ لسانیاتءِ اصول بُنّکی اصول اَنت۔
اصطلاح سازی ءِ اتھارٹی یک قومےءِ منّتگیں علمی ادارہ یے ءِ ذمّہ داری اِنت کہ علمِ لسانیاتءِ عالمی رہبندانی سرا اصطلاح سازی بہ کنت۔ مئے کرا ناں علمِ لسانیات است ناں ادارہ، ءُ ناں ماہرِلسانیات۔
جامعہ عثمانیہ دہلیءَ یک لکھ عالمی اصطلاح پہ اردو ءَ جوڑ کتءُ نوکیں اصطلاحاتءِ ڈکشنری یے کشّ اِت ادبی سطحءَ کم زورگ ءُ منّگ بوتاں باقی دراہ ہما انگریزیءِ جندءِ لبزاں عوامءِ دپءَ جاگہ کت۔
عربی زبانءِ تہا لبز چ نیست آ بلوچ ءَ بلوش گُشنت ۔ ٹ ءُ پ نیستاں آ کمپیوٹرءَ کمبیوتر گُشنت کہ کمپیوٹرءِ دکتور ۔۔۔ڈاکٹرءِ ۔۔۔انجلید۔۔۔انگلیڈءِ گاجیلیں شکل اَنت۔
فارسیءِ تہا رادیو۔۔۔ریڈیوءِ گاجیلیں شکل اِنت۔
اے زبانانی کیفسٹی ہمیش اِنت کہ ہمے رنگءَ دری لبزاں قبول کن اَنت ۔
بلئے بلوچی زبانءِ تہا سرجمیں ہاٹی مان اِنت کہ ہرملک، ٹیکنالوجیءُ دگہ لبزاں ہما اصلیں دروشمءَ قبول کت کنت۔
بلوچ ءِ ووکل کارڈ کمپیوٹر۔۔۔انگلیڈ۔۔۔ریڈیو۔۔۔ موبائل۔۔۔ٹیلیفون گشت کنت اگاں نہ کنت گڑا عوامءِ زبان وت کمّو ترّینت یے ءُ چاگردے جلدی قبول کنت۔ چوش کہ ریڈیو ۔۔۔ریڈو۔۔۔موبائل۔۔۔موبیل۔۔۔کمپیوٹر۔۔۔کمپوٹر۔۔۔اے بلوچ چاگردءِ لسانی کیفسٹی اِنت ءُ ہمے علمِ لسانیاتءِ نیچرل راہبنداِنت ۔
اگاں ما ریڈوءَ چہ عوامءِ دپءَ چہ پچ بگریںءُ بے علمی رہبندے بدئیں گڑاوتگش گشیں۔ ٹیلیفونءَ گوانکو گشیں کتابءَ وانگی گشیں کہ بے علمیءُ غیرلسانی نام بنت عوام نزانت کہ چے اَنت چوکہ ساربانءَ ما اُشتری ، شوانگءَ پس چارینوک، رملیءَ دست چاروک، گاڑیءَ تچوک، موٹرسیکلءَ دوپرّگی تچوک،شاعرءَ شعر بند،گڑا ماعوامءِ تہا گیپ پیداک کنئگءَ ئیں۔جاگہ یےءَ اُشتری رواج گپیت جاگہےءَ ساربان ۔ ہمے حال چاگردی سطحءَ سید ہاشمیءِ گوانکو۔۔۔وانگی۔۔۔ءُ وتگشءَ کتگ۔اگاں ما کلگءُ میتگاں بروں ءُ اودءِ مردماںءَ بگشاں کہ مارا وانگی۔۔۔وتگشءُ گوانکو ءَ پیشدار گڑا آحیران بنت۔ اگاں ما بگشیں کہ مارا ٹیلفون۔۔۔کتاب۔۔۔ءُ ریڈویے پیشدارگڑاآ دمانءَ ایشاں کارنت۔
چاگردءِ تہا گپّ جنوک یک طبقہ یے نہ اِنت شہری طبقہءِ زبان چہ کلّگی طبقہءَ جتا بیت، قدامت پسندانی زبان چہ ماڑرن مردمانی زبانءَ جتا بیت، بے تعلیمانی زبان چہ تعلیم یافتہ آنی زبانءَ جتا بیت۔دری لبزءُ علم چہ ماڑرنءُ تعلیم یافتہ ئیں مردمانی وسیلہ ءَ چاگردءِ تہا کاینتءُ عوامءَ سر بنت۔
ہمے وڑا اگاں ماعملءُ نام بچاریں ءُ لبزاں ترجمہ بکنیں کہ جراثیم یا وائرسءَ للوک ءُ ہائرایجوکیشنءَ برزی تعلیم ،سائنسءَ مزن زانتی، موبائلءَ دستی گونکو ۔۔۔ائیرکنڈیشنءَ ۔۔۔سردکنوک۔۔۔ہیٹرءَ گرم کنوک گڑا اے جاہلی ءُ
بے علمی لبزجوڈ بنت اگاں ہمے رنگیں جاہلیاں کسے زانتکاری بہ گشیت زبانءِ تہاچو ہمساہگءِ روکیں ترونءَ ہرکس وتی آرتءَ تہا بہ جنت بروت گڑا
بقول ءِ استاد کریم دشتی ئیگ ءَ ما وَ ،چہ کندگ مِریں

مکرانی: کتگ
رخشانی:۔۔۔ کرتگ
سلیمانی:۔۔۔ کثغ

اے ہرسہیں وتی علاقائیءِ گالواراں انگت گشگ بنت۔ ایشانی تہا گچین کنئگ ءُ زورگ زوراکی یے بیت۔ واجہ سیدءَ ۔۔۔ث۔۔۔ح۔۔۔خ۔۔۔غ۔۔۔ف۔۔۔ق ءُ دگہ حرف درکتگ اَنت ءُ بلوچستانءِ تہا دو زبان جوڑ کنئگ ءِ جہد کتگ ءُ یک مزنیں لسانی تضادے پیداک کتگ کہ مکرانی گالوارءِ مردم سلیمانی گالواراں ونت نہ کن اَنت ءُ سلیمانی مکرانی گالوارءَ۔۔۔۔۔۔۔۔
اے حرف چہ دگہ جاگہےءَ آرگءُ بلوچیءِ تہا مان کنئگ نہ بوتگاں۔چاگردءِ تہا ہما لبزکہ مزہبی یا دگہ حوالہ یے ءَ رواج گپتگ اَنت۔ہمے چاگردءُ بلوچی زبانءِ بہراَنت ایشانی درکنئگءَ زبان گاجیل بیت۔ لبزانی (اعراب )زبرءُ زیرءِ فرقءَ چہ لبزانی معنا بدل بنت ۔اگاں حرفاں بدل بہ کنئے وا کس نزانت کہ دومی زبان ءَ ہمے لبزءِ بدل چے اِنت ۔ءُ لبزچہ کجام زبانءَ اتکہ ۔اگاں ما تاریخءَ تاریک نبشتہ بہ کناں اردوءِ تہا ہردو لبز دگہ دگہ معناءَ کارمرز بنتءُ اے ہمے یکّیں لبز نہ مانیت۔اے یک مزنیں لسانی جیڑہ ایت۔
سیدءَ جوز پیش کتگ کہ مئے گّٹءَ اے لبزانی توار مان نیست ۔ بلئے ہرکسءَ قرآن ونتگ آ عربی حرفاں ادا کت کنت۔ بلوچءِ چاگردءُ بلوچی زبانءِ تہا ہمینچو شاہگانی اَست کہ ہردرآمدیں لبز ملکانی نام ءُ ٹیکنالوجیانی ناماں ہما اصل دروشمءَ منّیت۔
بلئے اگاں ما عربی زبانءُ عرب چاگردءَ بہ چاراں گڑاآہانی زبانءِ سکّ تنک اِنت ءُ دگہ ملکانی نامءُ ٹیکنالوجیاں انچو گاجیل کنت کہ اُودا کمیونیکیشنءِ گیف پیدابیت۔

مثال عربانی کرّا ۔۔۔پ۔۔۔ٹ۔۔۔چ۔۔۔گ۔۔۔ ڈءُ دگہ توار نیست اَنت آ انگلش۔۔۔ انجیش۔۔۔انگریزءَ انجریز۔۔۔انگلیڈءَ۔۔۔ انجلید۔۔۔چینءَ۔۔۔شین۔۔۔ کراچیءَ کراتشی۔۔۔ پاکستانءَ ۔۔۔باکستان ۔۔۔ ڈاکٹرءَ۔۔۔دکتور وان اَنتءُ گاجیل کن اَنت۔
بلئے مئے گُٹّ (ووکل کارڈ)ءِ تہا ہمے لبزانی ادا کنئگءِ پورائیں طاقت استیں۔ ہمے رِدءَ ایشانی درکنئگ مارا چہ دنیاءَ سندیت۔
دومی حبرایش اِنت عربیءِ اے لبزکہ مئے کرّا رواج گپتگ اَنت ماراہماوڑا نبشتہ کنئگی اَنت ءُ منّگی اَنت۔اگاں ما
فجرءَ۔۔۔پجر۔۔۔ظہرءَ۔۔۔زہر۔۔۔عصرءَ۔۔۔اسُر۔۔۔مغربءَ۔۔۔مگرب۔۔۔عشاءَ۔۔۔اشا۔۔۔نفلءَ۔۔۔ نپل۔۔۔رکعتءَ ۔۔۔رُکات ۔۔۔قرآنءَ۔۔۔کران۔۔۔حج۔۔۔اجّ۔۔۔
کعبہءَ۔۔۔کابا۔۔۔حجرہءَ۔۔۔اُجرا۔۔۔عمر فاروقءَ۔۔۔اُمرپاروک۔۔۔حضرت علیءَ۔۔۔ازرت الی۔۔۔عثمان غنیءَ۔۔۔ اسمان گنی۔۔۔ءُ محمدءَ۔۔۔مھمد نبشتہ بہ کناں ۔زبانءَ اسٹینڈر باریں رسیت یااناں،مزنیں مزہبی نضادے جوڑ مہ بیت ءُ دگہ مُلّایے تہا دؤرمہ کنت مئے جندءَ مہ کشیت۔

دشمنی گوں عرباں کسّءَ نہ بوتگ بلکیں دو ادبی گروپانی درمیانءَ ادبی تضادبوتگ
واجہ باکرزئیءِ گشگ اِنت کہ کوئٹہ مکتب ءِ نبشتہ کاراں لوٹ اِتگ کہ سرجمیں بلوچستانءِ درسیں گالواراں ما بلوچیءِ تہا ہوار کناں فارسی ءُ عربی ءُ دگہ ہر دری لبزے کئیت ما زیران ئے۔پرچاکہ کوئٹہءَ بلوچستانءِ ہر ہندءُ دمگءِ مردم نندوک بوتگ اَنت۔ کراچیءَ کہ دیوان بوتگ گڑا دیوانءَ عربی حرفانی درکنئگ نہ منّ اِتگ۔ رند کتاب دیماآرگ بوتگ۔
مکران مکتبءَ تہنا مکرانی گالوار بلوچی منّ اتگ ءُ آہانی گپّ دلگوش نہ داتگ۔
عربی حرفانی درکنئگ تہنا کوئٹہ مکتبءِ شکست دئیگءُ آہاناں چہ بلوچیءَ سندگءِ پندلے بوتگ۔ پرچا کہ کوئٹہ مکتبءِ نبشتہ کار رخشانی ءُ سلیمانی گالوارءِ مردم عربی حرفاں شرّیں وڑےءَ وتی زبانءِ تہا کارمرزکنئگا اَنت۔
ع ص امیریءَ ہم وتی نبشتانکءِ تہا ہمے رنگیں بازیں گپّ جتگ۔

نبشتانکءِ نفسیاتءَ واجہ بارکزئیءَ بازیں گپّ پوشیدہ کتگ اَنت ءُ آخرءَ بلوچی ءِ ہمے رہبندءَ را ’’ یک کسانیں چاتک یے‘‘ گشتگ۔
وانوک سرپد بہ بنت کہ نبشتہ رہبندءِ ٹہینگءَ ساری ءُ چرائی ءَ رندآ وہدءِ ادبی چستءُ ایرچے بوتگ اَنت۔ ہمے جیڑھ ءِ سراکہ سنگت اداگپّ جن اَنت۔چدو پیسر ایشیءِ سرا کجام گپّ چے وڑ جنئگ بوتگ اَنت۔
آوہد ادبی تضادچے بوتگ اَنت و رہبندءِ تہا کجام چیز ردکنئگ ءُ کجام چیز جوان گشگ بوتگ اَنت۔
ع ص امیری سیدءِ نزّیکیں سنگت ءُ مکران مکتبءِ محکمیں باسکے بوتگ آئیءَ ہم بازیں اعتراض چست کتگ اَنت ءُ بازیں چیزانی تہا بدلی آرگءِ صلاح داتگ۔
چشیں چیزانی ادا شِنگ کنئگءِ مقصد کسےءِ ایرجنئگ نہ اِنت بلکیں علم و زانتءِ گیش کنئگ اِنت۔
۔بلوچیءِ تہا گیشتر لبزچہ فارسیءَ اتکگ اَنت چو کہ ۔۔۔شمبے۔۔۔یک شمبے۔۔۔دوشمبے۔۔۔سئے شمبے۔۔۔چارشمبے۔۔۔پنچ شمبے ۔۔۔آدینہ(جمہ)۔۔۔
یک۔۔۔دو۔۔۔سئے۔۔۔چار۔۔۔پنج۔۔۔شش۔۔۔ہفت۔۔۔ہشت۔۔۔نو۔۔۔دہ۔۔۔یازدہ۔۔۔دوازدہ داں صدءَ رواں بو۔۔۔
ماہانی نام انگلش اَنت۔جنوری۔۔۔فروری۔۔۔مارچ۔۔۔اپریل۔۔۔مئی۔۔۔جون۔۔۔رواں بو۔
۔۔۔ مردم۔۔۔ دریا۔۔۔صورت۔۔۔برو۔۔۔بیا۔۔۔است۔۔۔نیست۔۔۔من۔۔۔تو۔۔۔شما۔۔۔ما۔۔۔کجا۔۔۔کدی۔۔۔جدا۔۔۔ دور۔۔۔نزیک۔۔۔سزا۔۔۔سنگ
دست۔۔۔بدن۔۔۔سر۔۔۔گردن۔۔۔دیم۔۔۔کوہ۔۔۔روغن۔۔۔قدم۔۔۔نوجوان۔۔۔سیاہ۔۔۔سبز۔۔۔باغ۔۔۔جسم۔۔۔دل۔۔۔جان۔۔۔دوست۔۔۔
دشمن۔۔۔زمین۔۔۔آسمان ۔۔۔ایمان۔۔۔آگاہ۔۔۔جاہ۔۔۔راہ۔۔۔ماہ۔۔۔آستین۔۔۔برف۔۔۔گنج۔۔۔روچ(روز)۔۔۔ آپ۔۔۔(آب)مہر۔۔۔گرم ۔۔۔سرد۔۔۔آسیاب۔۔۔رنگ۔۔۔بو۔۔۔فائدہ۔۔۔نقصان۔۔۔نف۔۔۔کار۔۔۔روزگار۔۔۔جہان۔۔۔ در۔۔۔ماہتاب۔۔۔زرگر ۔۔۔اسپ۔۔۔ دکان۔۔۔ شاعر۔۔۔شعر۔۔۔غزل۔۔۔ماہ لقاہ۔۔۔قصاب۔۔۔شہر۔۔۔درس۔۔۔خاندان۔۔۔منزل۔۔۔صابون۔۔۔کلاہ۔۔۔چادر۔۔۔عینک۔۔۔گوش۔۔۔ کم۔۔۔باز ۔۔۔بُزدل۔۔۔بیمار۔۔۔پست۔۔۔مہوش۔۔۔بہار۔۔۔زبان۔۔۔آواز۔۔۔آوارہ۔۔۔آہ۔۔۔درد۔۔۔دوا۔۔۔غم۔۔۔رنج ۔۔۔چراغ۔۔۔آہو۔۔۔شیر۔۔۔مُرغ۔۔۔
اُشتر۔۔۔سوزن۔۔۔سوز۔۔۔ساز۔۔۔آہستہ۔۔۔ءُ دگہ ہزارانی کساسءَ کامن لبزفارسی استاں۔
رواں۔۔۔روام۔۔۔کناں۔۔۔کنم۔۔۔داراں۔۔۔دارم۔۔۔استاں۔۔۔ہستم۔۔۔بوتاں۔۔۔بودام۔۔۔
تہنا بلوچیءِ جملہانی ساخت چہ فارسیءَ جدااِنت۔ دگہ بلوچی زبانءِ جندءِ کجااِنت؟
ہمے واستہ یک مغربی ریسرچرےءَ گشتہ کہ بلوچی زبان فارسیءِ بگڑتگیں شکل اِنت۔
یک زبانے چہ نزکیں زبانءَ اثرزوریت ءُ اثردنت اے نیچرل فیکٹ یے بلکیں عیبے نہ اِنت۔
لہتیں ریسرچراں گشتگ کہ بلوچی قدیم فارسی (میڈین پرشین)ءِ گوہاراِنت۔
اے ہبرراست اِنت کہ اے ریجن دو قدیم ثقافتانی تہا بہرکنئگ بیت ۔۔۔۔قدیم ایرانءُ قدیم ہندوستان۔
مئے سیادی گوں قدیم ایرانءَ اِنتءُ مارا گوں قدیم ہندوستانءِ کلچرءُ زباناں گوں ہچ تعلق نیست۔
وہدے کہ مئے تاریخی تعلق گوں ایرانءِ سرزمینءَ اِنت گرااے گپ منّگی اِنت کہ ہردوزبان بازیں حوالہءَ نزیکی کن اَنت۔
میڈین ایمپائرءَ وہدے سائرس دی گریٹ (کوروش بزرگ)کرمانءُ مکرانءِ سرا حکمرانی کنت گڑاایران مشرقءِ نیمگءَ دراج کش بیتءُ بلوچ گوں کرداں مکرانءَ سرگردانءُ قیقان (قلات) ءَ تاں برزرونتءُ جہہ منند بنتءُ مزنیں مدتےءَ سرجمیں ریجن پرشیاگشگ بیت۔
چدءُ پدعربانی دؤربندات بیت۔

مسلمانوں کی تاریخءِ تہاجمیل یوسف نبشتہ کنت کہ ’’امیرمعاو یہ کے زمانے کے آغازمیں ہی مہلب بن ابی صفرہ نے طورخم عبورکرکے درّہ خیبرکے راستے ہندوستان پریلغارکی۔دوسراحملہ بلوچستان کے ایک شہرقیقان پرہوااور اسے فتح کیاگیا۔
امیرمعاویہ کے عہدمیں اسلامی سلطنت دس صوبوں پرتقسیم تھی۔
۱۔۔۔۔شام۔۔۔۲۔۔۔کوفہ عراق۔۔۔۳بصرہ(بحرین،خراسان،سیستان)۔۔۔۴۔۔۔آرمینیا۔۔۔۵۔۔۔مکہ۔۔۔۶۔۔۔مدینہ۔۔۔۷۔۔۔(سرحداتِ ہند ) مکران۔۔۔
۸۔۔۔مصر۔۔۔۹۔۔۔افریقہ۔۔۔۱۰۔۔۔یمن۔

ولیدبن عبدالمالک اور سلیمان بن عبدالمالک ۱۰۵ سے ۷۱۷ء)سندھ میں راجہ چچھ بدمت کومٹاکربرہمن راج قائم کرچکاتھا۔ اس نے مکران کے مسلمانوں سے چفقلش شروع کردی۔قتیبہ کے بعدیزیدبن مہلب کو خراسان کا حاکم بنایا جس نے جرجان اور طبرستان فتح کرلیے۔

عرب مکرانءَ وتی جنگی بیس جوڑ کن اَنتءُ ہندوستانءِ سرا حملہ کن اَنت ءُ ہمداوتی حاکمی ءَ برجاہ دارنت۔ہمے وڑا فارسیءَ رندعربی زبان گوں بلوچی ہوار بیت۔ ہمازبان کہ زورمندءُ توانا بیت ہما وتی اثراتاں کسانیں زبانءِ سرا دؤردنت۔بلوچی چہ عربیءُ فارسیءَ کسان تریں زبانے نیکہ ایشیءِ تہا انچوطاقت بوتگ کہ وتی لبزاں فارسیءُ عربیءِ وڑیں مزنیں زبانےءَ دات کنت۔
عربی لبزبلوچیءَ مزہبی حوالہ وتی کتگ اَنتءُ فارسی زبان مئے نیچرءُ جغرافیہءِ بہربوتگ۔ — a


دلگوش:
باسک ءِ انتظامیہ اے نبشتانک ءِ شری بدی ءِ زمہ وار نہ اِنت
[/size]
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line