Author Topic: دیمروئی دوستیءِ پلّہ مرزیءَ۔ ۔ ۔ شعیب شاداب  (Read 3413 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture

    دیمروئی دوستیءِ پلّہ مرزیءَ

    شعیب شاداب

    چاگردی سماءِ زاناسانی لیکہ اِنت کہ اگاں ماں بیست و یکمی قرنءَ راجے گوں سائنسی رہبنداں دنیاءِ ہمراداریءَ مہ کنت گڑا بیست و دومی قرنءَ باز پدمانیتءُ پدا دیما شُتگیں راج آئیءَ را وتی ہمدرور نہ لیکنت ءُ پہ وتی ضرورتءَ کارمرز کن اَنت ءُ غلام داراَنت۔ پمیشکا دنیاءِ کّلیں راجانی انساناں ہرتکءَ سائنسی رہبندپہ وتی دیمروئیءَ کارگرگی اَنت ءُ سائنسی رہبندانی ردا جوڑ کتگیں سامان پہ وتی دیمروئی ءُ عاقبتءُ پہ وتی زندءِ آسراتیءُ ایمنیءِ حاطرا پہ ابد وتی ہمراہ کنئگی ءُ دوست دارگی اَنت۔ اگاں راجےءَ ہمے لیکہءِ ہمراہداری نہ کت ءُ وتارا گِستا داشت گڑا پہ ہماراجءَ قرنےءَ پُشت چک جنئگ ءُ چارگ المّی بیت ءُ وتی ءُ ہمساہگیں راجانی گوست ءُ است دیم پہ دیم کنئگی بنت گڑا آ وت ہمے مارایت کہ گوستگیں قرنءِ مسافراں کجا کجا وتی بار بوتکگ اَنت ءُ آئی ءَ وتی زندمانی ءِسفرءِ بار کجا ایر کنئگی اَنت۔۔۔۔۔۔۔۔۔۔؟

    من مدام کتاب واناں گنداں کہ نبشتہ کار وتی تجربتانی بُنچک ءَ گپّ جن اَنت ءُ وتی ءُ دگرانی فائدہ مندیں گپّاں شنگ کن اَنت چریشیءَ چہ بازیں نوکیں بحث ءُ تران دیما کاینتءُ وانوکاں بازیں سرپدی رسیت ءُ آ بازیں انچیں جاوراں سہی ءُ سرپد بنت کہ چدو پیش آہانی سرا کسّءَ گپّ نہ جتگ۔ چرے عملءَ نبشتہ کارءِ مقصدہمیش بیت کہ بازیں انچیں مردم است اَنت کہ آہانی گپّ پہ دگراں فائدہ مند اَنت بلئے آ کدی نبشتہ اش نہ کن انت ءُ بازیں انچیں مردم ہم استاں کہ آ نبشتہ کت نہ کن اَنت پمیشکا آہانی گپّ ہچ جاگہ شِنگ نہ بنت ءُ کسّے نہ وانیت۔ چرے چیریں ءُ انچائیں گپّاں چہ بازیں وانوکانی دیما ایریں کوہنیں جیڑھ اوں گیش ءُ گیوار بنت ۔ امریکی فلاسفر ءُ ماہرِ نفسیات اسٹیفن آر کوے دگرانی چاگردی جیڑھانی قصّہاں گوشداریت ءُ نبشتہ کنت ءُ آہانی سرا وتی یک پیراگراف یےءِ پرّیسءَ نبشتہ کنت۔ چریشیءَ چہ دراہیں دنیاءَ آئیءِ کتاب رجانک کنئگءُ وانگ بنت۔

    سالےءَ پیش من ماں کراچیءَ بلوچستانءِ اردوزبانءِ نامداریں ناول نگارءُ سندھ و بلوچستانءِ پوسٹ ماسٹر جنرل واجہ آغاگل ءَ گوں آئیءِ لوگءَ ڈیفنسءَ دچار کپتاں۔ من آئیءِ ناول’’ دشتِ وفا ‘‘ ءِ سرا تران بندات کت ءُ آئیءَ را سوال جُست کنان کت کہ واجہ تو پٹھان یے بلئے تو وتی ناول ءُ آزمانکانی تہا پشتو رسم ءُ رواجانی بدلءَ بلوچی رسمءُ رواجاں پرچا دیما آرگ لوٹگائے چو کہ تئی بازیں ساچشتانی نام ہم بلوچی اَنت انچو کہ ’’ گوریچ ‘‘ ’’ بدروچ‘‘ ’’ گنوک‘‘ ءُ تو بلوچستانءَ ایٹمی دھماکہ ءِ خلافءَ اوں ’’راسکوہ‘‘ نبشتہ کتگ۔ چوکہ تئی ناول’’ دشتِ وفا‘‘ اِنت ہمے ناول تو بلوچستانءِ بغاوتءِ پشدرءَ نبشتہ کتگ ءُ بازیں تاریخی راستی اوں تو وتی ناولءِ تہا واقعاتانی دروشمءَ کارمرزکتگ اَنت، بلوچ دودمان ءِ اوں پیشدارگءِ جہد کتگ۔ بلئے ہمے ناولءِ تہا تو یک رُخسانہ نامیں بہابدنیں کہبگیں جنکے اوں ہوار کتہ گوں، کہ آ ظاہرءَ سرمچارانی ہمکاراِنت۔۔۔۔۔۔؟

    گڑا آئیءَ گُشت کہ’’ اوّلی گپّ ایش اِنت کہ من بے شک پٹھانے اوں بلئے منءَ کسانیءَ مستونگءَ یک براہوئی ماتے ءَ میچینتگ ۔ منی شیرءِ مات یک براہوئی شیرزال ایت۔ من بازیں وہد چہ کوئٹہءَ ڈّن بلوچانی ہندءَ گوازینتگ۔۔۔۔۔۔۔۔ اصل بلوچستان پٹھانانی نہ اِنت ۔۔۔۔۔۔۔ بلکیں بلوچانی اِنت۔ ظاہرانت افغانستان ءُ صوبہ سرحد ءِ پشتون دودمانءِ دیما منی بلوچستانی پشتون دودمانءِ دیماآرگ ءُ پیشدارگ یک بے مطلبیں عملے بیت۔ پمیشکا منءَ بلوچ ءُ بلوچستان وتی فنءِ وسیلہءَ دیما آرگی اَنت ءُ منءَ کوئٹہءَ نندگءُ بلوچستانءِ ترانکاری کنئگی اِنت۔ پمیشکا منی دراہیں ساچشتانی نام بلوچی لبزاَنت۔
    منی ناول’’ دشتِ وفا‘‘ ءِ بابتءَ کہ تو جست کنئگائے، اے سرجمیں بغاوتءِ شونداریءَ کنت۔ بازیں واقعات گواچن اَنت کہ من ہمے ناولءِ تہا آرتگ اَنت دانکہ تاریخ است بہ بیت ءُ پشت بہ کپیت۔۔۔۔۔۔۔۔۔۔۔۔ تو نسیم حجازیءِ ناول نہ ونتگ اَنت کہ آ اسلامی جنگانی تاریخاں وتی ناولانی تہا کاریت؟۔۔۔۔۔۔۔۔۔۔۔ منی اوں مطلب بلوچستانءِ تاریخءِ رکھینگ اِنت۔۔۔۔۔۔۔۔۔۔۔۔۔۔ ناول’’ راسکوہ‘‘ ءِ شنگ بوہگءَ رند منا چیریں گلی کارِندھانی نیمگا پادتراپ اوں رستگ کہ تو فوجی مول ءُ مرادانی تہا دزمانجنیءَ کنئگائے۔۔۔۔۔۔۔۔۔۔!
    تئی ہمے جست کہ ناول’’ دشتِ وفا‘‘ءِ تہا رخسانہ نامیں بہابدنیں کہبگیں جنکے کہ گوں سرمچاراں ہمکاری کنت ۔۔۔۔۔۔۔۔۔۔ اصلءَ اے اوں یک راستی یے کہ بلوچستانءِ تہا وہدے سیمی رندابغاوت بندات بیت گڑا ہمے سرکاری چیریں گل وتی بہابدنیں کہبگاں ہم سرمچارانی شیدا جوڑ کن اَنت ءُہمیشانی وسیلہ ءَآہانی رازاں پچ گراَنت۔ بلئے بلوچ سکیں قدامت پسندیں قوم ایت ءُ آ ہمے نبشتہ کتگیں چیزاں ایر جنت۔ منی ہمے ناول وہدے بلوچستان یونیورسٹی ءِ لہتیں براہوئی مکتبیاں براہوئی زبانءَ رجانک کت گڑا آہاں ہمے حسابءَ منی کردار برجاہ داشتاں کہ من کتگ اتاں۔ بلئے وہدے لہتیں بلوچ ورناہاں اوں ہمے واہگ ظاہر کت کہ ما اوں تئی ناولءَ بلوچی زبانءَ رجانک کنیں گڑا من اجازت دات اَنت۔۔۔۔۔۔۔۔۔۔۔۔۔ ماہےءَ پد ہمے ورناہ منی کرّا اتک اَنت ءُ رجانک کتگیں ناول اِش آؤرت گڑا آہاں گشت کہ تئی ناولءِ بنکّی کردار نجیب ءُ رخسانہ بلوچی نام نہ اَنت پمیشکا ما بدل کتگ اَنت ۔آہانی جاگہ دگہ بلوچی نام ایر کتگ۔ من گشت کہ شما چُش مہ کتیں منا جُست بکتیں۔۔۔۔۔۔۔۔رخسانہ چہ پشاورءَ اتکگیں کہبگے۔۔۔۔۔۔۔شما چتورآئیءَ را بلوچی نام بست کنئے۔۔۔۔۔۔ شما جیڑھ نہ پہمتگ ۔۔۔۔۔۔۔۔۔۔۔۔ بلئے خیر آ دیمترا وت اے چیزاں سرپد بنت‘‘

    من گشت سر!۔۔۔ اے تئی راست اَنت ما ہمک چیزءَ گوں وتی ذاتءَ بندوک کنیں ، مئے کرا دگہ قوماں بستار نیست ما نشتگ وتارا وت بستار دئیگاایں کہ ما یک مزنیں قومے یاں ۔۔۔۔۔۔۔۔۔ یک مزنیں قومےءِ بوہگءِ واستہ ہرجنسءَ آئیءِ بنکی حقّ دئیگ بہ بنت۔ تعلیمی ماحول پہ ہرجنسءَ یک بہ بیت۔ قوم ٹیکنیکل بہ بیت۔ دگہ قومانی ربیدگاں چہ فائدگ بزوریتءُ وتی ربیدگاں چہ دگراں فائدگ بہ دنت۔ ما نشتگ ہمے جیڑگاایں کہ ہرچی مئے کرّا است، ہمے مئے سرجمیں چاگرداِنت ۔من ہزاراں سالیلگیں ہمے چاگردءَ سرجم نہ لیکاں کہ آئیءِ تہا کس ہچ بدلی آرگءِ واستہ تیارنہ اِنت۔ما گشیں مئے استیں چیز گار مہ بنت ما دگہ چیز نہ لوٹیں۔ منی خیالءَ بلوچ اے واستہ جنگءَ نہ اِنت کہ مئے اوشترءُ حراں کس مہ بارت۔۔۔ مئے کڈکاں کس مہ بارت۔ بلکیں بلوچ وتی بانداتءِ عاقبتءِ رُژناہ کنئگءِ جنگءَ اِنت۔آ دومی قومانی برابریءَ اوشتگءِ جنگءَ اَنت۔ آ وتارا چہ تعلیم زبہریءَ رکھنیگءِ جنگ اِنت۔ آ ہمے کوہنیں کشّتگیں لکیرءِ سرا رؤگ نہ لوٹیت بلکیں ہما لکیرءَ کشگ لوٹیت کہ آئیءِ سرا دگہ قوم رؤگءَ اَنت۔۔۔۔۔۔ ما سرجمیں عمرءَ نشتگ وت ماں وت جنگ کتگ۔۔۔۔۔۔۔۔ ما سلطان سعید ۔۔۔۔۔ شیخ زاہد۔۔۔۔۔ رضا شاہ پہلوی ۔۔۔۔۔ ڈاکٹر نجیب اللہ ۔۔۔۔۔۔۔۔ بھٹو ءُ یحیٰءِ غلامی کتگ۔۔۔ مئے ہمساہگیں قوم عرب ءُ فارسیاں علم ءُ عقل زرتگ ءُ پہ وتا ملک پہریزتگ ءُ وتارا دیمروئی داتگ۔۔۔۔۔۔۔۔ ءُ ما جہالتءِ دامن داشت ءُ نشتگں چو وت واجہیں میرءُ بے دستاریں سردارءَ۔۔۔۔۔۔۔۔۔۔۔!

    سر!۔۔۔توسرپدئے!مئے چاگردءِ تہا جنینءَ کرد نیست ۔۔۔۔۔ما مردیناں تہنا وتارا چاگردءِ چوکیدار جوڑ کتگ کہ ہرکارے بیت ماوت اِش کنیں ۔ تُری آ کار یک جنین یےءِ بہ بیت۔۔۔۔۔۔۔۔۔۔۔۔۔۔۔ تو سر!۔۔۔۔ بلکیں سہی نئے بازیں شُلگیں مردیناں جنینی گُدءِ دوچگ اوں دربرتگ ءُ بازیں مردین بلوچی فلمانی تہا ہم وتارا جنین کن اَنت۔۔۔۔۔۔۔ اے یک منفی عمل ایت ءُ من ایشیءِ حقءَ نہ اوں کہ جنینی کاراں ہم مردین بہ کن اَنت۔ چاگرداں جنین ءُ مردین ہور ننداَنت ءُ دیمروئی دئینت۔۔۔۔۔۔۔۔۔۔ بلئے بیا کہ مئے قصّہ دگراں سر! ۔۔۔۔۔۔ ما دگہ قومانی دیمروئی ءِرازاں اوں سرپد نیاں۔۔۔ ما نان ٹیکنیکل قومے یاں۔۔۔۔۔۔۔۔۔۔۔۔۔۔۔۔ سر!
    مئے کرا پہ جنینءَ سورانی سرا سؤتءِ گشئگءِ حق است بلئے ۔۔۔۔۔۔۔۔۔۔۔ آئیءَ سرا پروفیشنل بوہگءِ حق نیست۔
    مئے کرا جنینءَ ترونانی سرا اداکاریءِ حق است بلئے۔۔۔۔۔۔۔۔۔۔۔۔۔۔۔آئیءَ را پروفیشنل بوہگءِ حق نیست۔
    سر!۔۔۔۔۔۔۔۔ من اے چیزاں اوں سرپداں کہ چاگردءِ تہا بازیں بدلی رؤنت ءُ کاینت ءُ چاگرد چاگردیے جوڑ بیت بلئے اگاں چاگردےءِ تہا مردین چوکیدار بہ بنت ءُ چاگردءِ واگاں وتی دستءَ بدار اَنت۔۔۔۔۔۔۔۔۔۔ گڑا چاگرد چے یے جوڑ بیت۔۔۔۔۔۔۔۔۔۔۔۔۔۔۔۔؟
    افریقہءِ جنگلی تعلیم ءُ دیمروئیءَ زبہر انت پمیشکا انگت نزان اَنت کہ گُدءُ پوشاک چے چیزے ۔۔۔۔ دنیا ماہ ءِ سرا اِنت آ انگت گوں وتی جنءُ چکّاں برہنگیءَ درچکانی چیرا نشتگ اَنت۔۔۔۔۔۔۔۔۔۔۔۔۔۔۔۔۔۔۔!

    ’’ شعیب جان !۔۔۔۔۔۔تئی قوم ہمیش اِنت،تئی ملک ہمیش اِنت۔ تئی قوم ءِ نام اِنت۔۔۔بلوچ ءُ تئی ملکءِ نام بلوچستان اِنت۔ناں تئی قوم گاربیت ءُ ناں نامے بدل بیت ءُناں تئی ملک یک دگہ زمینءُ جاگہے جوڑبوت کنت۔بلکیں وہدگوزاَنت کرداربدل بنت ءُ دودانی تہا بدلی کئیت ۔ کارءُ روزگارءِ درءُ وسیلہ بدل بنت۔تو کہ جہلانکیءَ گپ جنئے اے تئی مستقل مزاجی اِنت ءُ تو چاگردءِ جہلانکیءَ دؤرکتگ۔ بلئے تئی اے گپ پہ ہرہمامردمءَ فضول اَنت کہ آ مستقل مزاج نہ اَنت ءُ چاگردءَ گوں کوہنیں روایتاں چاراَنت ءُ بدلی ءِ حقءَ نہ اَنت۔پمیشکا تئی ہمے گپ انوں تئی چاگردءِ ہچ کارءَ نیائنت۔ بلکیں پنجاہ یا ہفتادسالءَ رندتئی ہمے گپ پداہمے مردمانی سمجھ کاینت کہ آ وہدءَ تئی چاگردءِ تہا ہمے چیزعامیں چیزبنت ءُ ایشاں بستارنہ بیت‘‘

    گوستگیں ماہ ءَماں فیس بُکءَ یک فرضی نامے شپ چراگ بلوچءَ وتی والءِ سرا یک سرحالے ایر کتگ اَت کہ ’’بلوچی فلمامی تہا جنک زورگ بہ بنت یا مہ بنت؟‘‘۔۔۔۔۔۔۔۔۔۔۔ کسّءَ ہچ جواب نہ داتگ اَت۔ منا ہمے سرحال دوست بوت گڑا من وتی شوروصلاح دات اَنت کہ ماں دنیاءَ کّلیں قومانی جنکاں حق است ءُ آ وتی جنکاں ماں فلماں کار بنداَنت۔یک قومے ءِ بستارءَ بلوچ انسانانی یک ٹولی ایت آئی ءِ قومءِ جنکاں اوں ہمے یک است اِنت پمیشکا بایدیں بلوچ جنک فلماں کار بہ کن اَنت۔
    دگہ یک فرضی نامے میران بلوچءَ منءَ ہمے جست کتگ اَت کہ ’’ سنگت ۔۔۔۔! گرا تو وتی لوگءِ زالبولاں اجازت دئیے کہ آ فلمانی تہا کار بہ کن اَنت۔ پرچا کہ اے پہ بلوچءَ عیب یے ءُ فلمانی تہ جنکاں وڑوڑیں کردار ہم دئیگ بیت۔۔۔۔ من تئی پسّہ ءِ رہچاراں‘‘

    من جواب دات کہ اگاں منی گوہاراں فلمءِ شوق بہ بیت من آہاں نہ داراں بلئے منی گوہار فلمی اداکارہ نہ اَنت۔
    ہمدا من فلمسازیءِ یک لیکچرے کمنٹ کت ۔۔۔۔۔۔۔۔۔۔۔ پدا وتی فیس بُکءِ والءَ شِنگ کت۔
    مرچی ڈاکٹر ناگمانءِ یک کسانیں نبشتانکے ونت کہ آ اوں ہمے بابتءَ اَت کہ ’’ بلوچی تامرانی بے جنکی‘‘ یک برے من جیڑاِت کہ ڈاکٹرءِ نبشتانکءِ سراوتی شوروصلاحاں بدیاں۔
    بلئے من پدا جیڑھ اِت کہ اے یک مزنیں دنیایے پہ کمنٹءِ دئیگا گواز نہ بیت۔ پمیشکا دیمروئی دوستی ءِ سرا من وتی ہمانبشتانکءَ کمّے گیشیءُ بدلیءَ گوں شنگ کنئگاآں۔۔۔۔۔۔۔۔ اے نبشتانک ڈاکٹر ناگمان ءِ نبشتانکءِ جواب نہ اِنت بلکیں گوں آئیءَ ہمگام بوہگءُ آئیءِ مارِشتانی منزل ءِ سفرءَ ہمراہدار بوہوکیں یک بے توشگیں مسافرے ءِ گیشی اِنت۔
    ایشیءَ چہ پیش کسے ڈاکٹر ناگمانءَ ہما جستءَ بہ کنت ۔۔۔۔۔۔۔من وتی لیکچراں دیاں۔۔۔۔۔۔۔۔!

    نوں من گشگ لوٹاں کہ فلم سازی یک کامیابیں شعبہ ایت ءُ دنیاءِ تہا کروڈاں چہ گیش انسانءِ روزگارءُ ہزاراں چاگردانی جیڑھانی شونداریءُ گیشءُ گیوارءِ وسیلہ اِنتءُ پہ دنیاءَ فلم سازی یک کوہنیں ہنرءُ کوہنیں گپ ایت۔ دنیاءِ بازیں یونیوسٹیانی تہا بی ایس ءَ بگرماسٹرءُ ایم ایس ءُ پی ایچ ڈیءِ ڈگری ہم فلم سازیءِ شعبہءَ کروڈوں مردم گرگءَ اَنت ءُ فلم سازی روان اِنت۔نیکہ لہتیں مردم بہ نندیت وت ماں وتءَ چندہ بہ کنت ءُ کیمرہ باڑہ بزوریتءُ فلم جوڑ بہ کنت۔۔۔۔۔۔۔ اے شوق ءُ فن عارضی یے یا دو سے روچءِ کارنہ اِنت ۔ بلکیں اے زندگی ءِ بہرے ءُ چاگردءِ دیمروئی وسیلہ یے۔

    ما چوکہ پسماندہیں قومیاں ءُچہ دنیاءَ بازدیرکپتگاںءُ مااے چیزنوکی دیستگاں ۔پمیشکہ فلم سازیءِ شبعہءَ ماباز لیٹاں۔ دومی مئے کرا الیکٹرونک میڈیانہ بوتگ۔ (اگاں است گڑا،ما ہمائیءِ اوں بندکنئگءِ رندءَ کپتگاں)۔
    فلمانی تہا ہما مردم کارکن اَنت کہ آہانی پروفیشنل فیلڈاِنتءُ آہانی روزگاراِنتءُ آہاں ہمے شعبہءَ فن دربرتگ۔
    ماں کوئٹہ ءَ بازیں خاندانی بلوچ جنکاں ہم ہمے شعبہ وتی پروفیشن ءُ روزگارجوڑکتگ ءُ بلوچی ءُ اردو ڈرامہ آنی تہا کارکنگءَ اَنت۔ ناں آہانی سراپابندی است ءُ ناں کہ واجب القتل اَنت۔
    چو کہ مئے ہندءَ پروفشنل ایکٹریس نیست ءُ اگاں بہ بیت گڑا آ واجب القتل اِنت۔اگاں کسے وتی فلمےءِ تہا بلوچی جنکےءَ کرداردئیگ بلوٹیت ۔ گڑا آ سرمایہ بہ جنت ءُ ہما کوئٹہءِ بلوچ ایکٹریساں آہانی کارءِ مُزءَ بہ دنت ءُ آہاں وتی فلمانی تہا سائن بہ کنتءُ کوئٹہءَ وتی شوٹنگاں بہ کنت۔ ایشیءِ تہا ہچ وڑیں جیڑھ نیست۔
    وہدے کہ ہمے چیزعام بیت پبلکءِ قتلءِ فتواہ ءُ تژن ءُ بہتاماں آسرنہ بیت گڑامئے ہنداں ہم ہمے چیزعام بنت ءُ ہرکسی پہم ءَ کاینت۔
    بلے نیکہ چو شریفءِ بے وس ئیگاں مردینی جاگہءَ جنکی پوشاک گورابہ کنت ءُ وتارا جنک یے پیش بہ داریت۔ اگاں بلوچ جنکاں فلمانی تہا کارکنئگءِ حق نیست گڑا شریف بے وسءَ کئے اجازت داتگ کہ آ چاگردءِ تہا ردیں رُجحان دیما بیاریت ءُ مردینی جاگہ ءَ جنکی گدُ گورا بہ کنت۔۔۔۔۔؟ اے پہ فلم سازیءَ یک ناکامیں حربہ یےءُ یک مزنیں عیب یے ۔ پرچاکہ ہما مردین جنینی گد گوراکن اَنت کہ چاگردپراہاں یک نامے ایر کنت ءُ ۔۔۔۔۔۔۔۔۔۔ آ نام اِنت ۔۔۔۔۔۔۔ بگا۔

    اگاں اداا گپ فلمانی تہا جنکانی کردارءِ بہ بیت اوں ہچ جیڑھ نہ اِنت پرچاکہ فلمانی تہا ہما کردار پیش دارگ بنت کہ آ چاگردءِ بہر اَنت ءُ چاگردءِ ٹوہیں بالاد ہمے پادگانی سرا مِک اِنت۔۔۔۔۔۔۔۔۔۔۔۔۔۔۔ اگاں فلمانی تہا ہمے کردار ’’قابلِ اعتراض‘‘ اَنت۔۔۔۔۔۔۔۔۔۔۔۔۔۔ گڑا چاگردءِ تہا پرچا نہ اَنت۔ پمشیکا فلمانی تہا ہمےکردار جائز اَنت کہ چاگردءِ وتی میراس اَنت چہ چاگردءَ ڈنّ آرگ نہ بنت۔ بلکیں چہ چاگردءَ زورگ ءُ گچین کنئگ بنت۔ پدا پروفیشنل ایکٹریسءِ واستہ ماں فلماں کسےءِ جن بوہگ یا گوں کسےءَ نکاح کنئگ۔ ہچ مسلہ نہ اِنت۔۔۔۔۔۔۔۔۔۔۔۔!
    ایشیءَ چہ ابید اے یک مزنیں بے غیرتی ءُ شرم ءِ گپّ یے کہ یک بچکے جنکی پوشاک گْورا بہ کنت ، وتارا کریم ءُ پوڈر بہ جنت، وتی دپءَ تلگ بہ کنت ۔۔۔۔۔۔۔۔۔۔۔۔۔۔۔ پدا گوں بچکےءَ نکاح بہ کنت ءُ آئیءِ جن بہ بیت۔۔۔۔۔۔۔۔۔۔۔۔!
    ماں دنیاءَاے رجحان ہم جنس پرستی ءِ رداچارگءُ ٹپّاسگ بیت۔اگاں ہمے رجحان گوں مئے جاہلیں فلمسازاں،ہمے رنگءَ دیما بروت گڑا بازیں بچکے فلمانی تہا آہگ ءُ وتی پیشدارگ ءُ مشہورکنئگءِ حاترا چاگردءِ تہا وتی اصلی کردارءَ چہ درکئیتءُ مستقبلءَ چپ ءَ رؤت۔۔۔۔۔۔۔۔۔۔!
    دومی حبر اگاں مئے ہمساہگیں قوم سہی بہ بنت کہ بیست و یکمی قرنءَ بلوچ وتی فلمانی تہا مردیناں جنینی گد گورءَ دئینت ءُ جنین پیش داراَنت گڑاآ مئے جاہلتءِ سرا گوں کندگ مراَنت۔
    ۔۔
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline Asghar Zaheer Baloch

  • Baluchi Nadkaar بلوچی ندکار
  • ***
  • Posts: 203
  • Karma: 26

شعیب جان!داں کہ اے راج سرپد بہ بیت مئے ہڈ ریزنت۔منا اوں ہمے پسو راست کہ ترا دئیگ بوتگ۔