Author Topic: مھر ءِ شیرکنی. شپ چراگ ءِ نبشتانک  (Read 1312 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7064
  • Karma: 356
    • Baask-Home of Baluchi Language, Literature & Culture
مھر ءِ شیرکنی. شپ چراگ ءِ نبشتانک
« on: August 31, 2012, 08:05:03 AM »

مھر ءِ شیرکنی

انسان ءِ شعوری پختگی ءِ گُڈی سیمسر ھمیش اِنت کہ آ چہ ھمک ذاتی، مذھبی، نسلی ءُ قومی گر ءُ بنداں سرگوز بہ کنت ءُ وت ءَ مھر ءِ ابدمانیں مارشتانی تھا زندگ بِداریت۔ آ بس ھمے بہ ماریت کہ اے جھان ءِ کُلیں شر رنگیانی علامت انسان اِنت ءُ بس انسان۔۔۔۔۔ اگاں جھان ساپ کنگی اِنت۔ ڈولدار کنگی اِنت۔ پلگارگی اِنت۔ بس پہ انسان ءَ۔۔۔۔ انسان ءِ سرا زُلم۔ راجانی حق جنی ۔۔۔۔۔۔۔۔۔۔۔۔۔۔ مذھب ءِ نام ءِ سرا دومی مذھب ءِ منوگرانی کُشت ءُ کوش۔۔ قومی تعصب، راجانی غلام دارگ، پہ مھر ءِ لِذت ءَ سرخیلیں انسان ءَ، بنی آدم ءِ شعوری ناپختگی ءُ جھان ءِ بدرنگی ءِ علامت زانگ بیت۔ دگہ راستیں مھر ءَ چہ آشنائیں انسان مذھبی ءُ راجی ءُ چاگردی گر ءُ بنداں ھوار، زند ءُ مرگ ءِ قید ءَ چہ ھم آجو بیت۔ پمیشا منصور پاھو ءَ سر بیت ءُ سقراط زھر وارت۔۔۔۔۔۔ اے سقراط ءِ مھر ءُ مرگ ءُ زند ءِ گر ءُ بنداں آجو بیئگ ءِ مستریں علامت اِنت کہ آ زھر جوڑ کنوکیں مرد ءَ گُشیت تو زھر ءِ جوڑ کنگ ءَ بلد نہ یے ءُ سک دیر بوئگ اِنت۔ مرد درائینت کہ من زھر ءِ جوڑ کنگ ءَ سک بلداں۔ من ھزاراں مردمانی مرگ ءِ ھاترا زھر چُپتگ ءُ جوڑ کُتگ۔ بلے من لوٹاں کہ تئی وڑیں زانوگراں گیشتر زندگی بہ رسیت ءُ تئی زند ءِ یک ساھتے ھم پہ انسان ءَ سیت مند اِنت۔ سقراط گُشیت ، بزگ من چہ مرگ ءُ زند ءِ قید ءُ بند ءَ آجوآں۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ اے ھمے انسان ءِ شعوری پختگی ءُ مھر اِنت کہ چہ مذھبی ءُ نسلی گر ءُ بند ءَ پاک اِنت کہ ملا چہ ھمے مھر ءَ ناآشنا اِنت۔ پمیشا ملا مذھب ءِ نام ءِ سرا جنگ کنت ءُ ھزاراں بے گناھیں کودک ءُ بزگیں انسانانی قتل عام ءَ کنت۔۔ انسان جھان ءِ شررنگی ءِ صفت اِنت، چہ کُل چیز ءَ مقدس اِنت۔۔ مذھب جوڑ بیت پہ انسان ءِ گھبودی ءِ ھاترا، انسان پہ مذھب ءِ ھاترا جوڑ نہ بیتگ۔۔۔۔۔ پاکستانی ملایاں ‘‘رِمشا مسیح‘‘ ءِ وڑیں پُل دروشمیں زھگے زندہ درگور کُتگ۔ ماں بلوچستان ءَ پاکستانی ملا ھزارانی ھساب ءَ بلوچیں انساناں سوچگ ءُ ماندارگ ءَ اَنت۔ پہ ھمے ھاترا کہ ما اسلامی ملک ءِ نگھپانی ءَ کنیں۔۔۔۔ چیاکہ پاکستانی ملا چہ انسانی صفت ءُ ابدمانیں مھر ءِ لِذت ءَ چہ زبھر اَنت ءُ آ وتی ذاتی نپ ءُ وتی خدا ءِ وش کنگ ءَ ھر وڑیں کار کن اَنت ءُ آھاں زر چہ وتی کستریں خدا امریکا ءِ نیمگ ءَ رسگ اِنت۔۔۔۔۔۔۔

حضرت امیر حسرو ءِ اے بند ھمے ابدمانیں مھر ءِ درنگازی ءَ کن اَنت کہ مھر چہ ھمک مذھبی ءُ لیکہی گر ءُ بند ءَ پاک اِنت۔

کافر عشقم ، مسلمانی مرا درکار نیست
ہر رگِ من تار گَشتہ ، حاجتِ زُنار نیست
ما و عشقِ یار اگر در قبلہ گر در بت کدہ
عاشقانِ دوست را با کفر و ایمان کار نیست

صوفی ایں کارل مارکس بہ بیت یا جھان ءِ کجام صوفی دروشمیں اسکالر، آ ھمے مھر ءِ سوداگر بیتگ اَنت۔ پَر آھاں جھان شررنگ تریں ھستی انسان بوتگ ءُ بس انسان۔ پمیشا آھاں پہ انسانیت ءِ ھاترا وتی سرجمیں ذاتی چیزانی قُربانی داتگ۔ ڈاکٹر چے گویرا چہ مھر ءَ آشنا بوتگ، پمیشا آئی ءِ لیکہ چہ مذھبی گر ءُ بنداں گِستا بوتگ۔ آئی ءَ پہ کُلیں انسانانی ھاترا جنگ کُتگ۔ آ اے ابدمانیں مھر ءِ لِذتاں آشنا بوتگ۔ آئی ءَ پہ انسان ءِ گھبودی ءَ وت ءَ قُربان کُتگ۔ تاریخ ءَ ھست اِنت کہ مسلمانانی پیغمبر محمد (ص) طائفہ ءِ نزانتکاریں مردماں سنگ ریچ کُتگ، آئی ءِ چمپل چہ ھون ءَ پُر بیتگ اَنت۔ بلے آئی ءِ زبان ءَ بد دعا در نیاتکگ۔۔۔۔ ھمیش اِنت مھر۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بلے ملا چہ مھر ءِ لِذتاں ناآشنا اِنت۔ ملا ءَ انسانیت ءِ دروشم نہ جنت۔ ملا نیت ءِ سرا کُنٹگ رُستگ۔ آ انسانیت ءِ دُشمن اِنت۔ اقبال ھندوستان ءِ شاعری بیتگ۔ آئی ءَ ملایانی بابت ءَ گُشتگ

مکتب و ملا و اسرار کتاب
کور مادر زاد و نور آفتاب
دین کافر فکر و تدبیر جهاد
دین ملا فی سبیل الله فساد

اقبال ادا نفسی جھاد ءِ گپ ءَ جنت۔ بزاں ابدمانیں جھاد ھمے چیز ءِ نام اِنت کہ انسان چہ ذاتی کست ءُ کینگانی قید ءَ درکئیت ءُ ھمے ابدمانیں مھر ءَ آشنا بیت۔ بلے ملایاں ناں اقبال پھم اِتگ ءُ ناں آئی ءِ زانگ ءِ جھد کُتگ، چیاکہ ملا کور اَنت ءُ انسانیت ءِ دُژمن۔۔۔۔۔۔۔۔۔۔
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line