Author Topic: چاگردی سلکاریانی سوب چی اِنت؟ شپچراگ ءِ نبشانک  (Read 2136 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7069
  • Karma: 356
    • Baask-Home of Baluchi Language, Literature & Culture

چاگردی سلکاریانی سوب چی اِنت؟
۔۔۔۔۔۔۔۔۔۔۔۔۔۔۔۔۔۔۔۔۔۔۔
مردم چیا سلکار بیت؟ کُشندہ بیت، دومی ءَ کُشیت ءُ وت ءَ گپچلانی دیمپان کَنت؟ ڈُنگی، دُزی ، شپکی ءُ نشہ کَنگ ، اے انچیں نادراھیاں کہ انسان ایشانی آماچ بیت، اے ردا بازیں زانتکار ءُ تب زانشاں جیڑ اِتگ ءُ وتی وتی لیکہ ءُ ھیال دیم ءَ آؤرتگ اَنت کہ ایشانی تھا سگمنڈ فرائیڈ ، کولن ولسن ، ایرک فرام ءُ دگہ بازیں زانوگر ھوار اَنت۔
لھتے قتل ءُ دُزی ءُ چاگردی سلکاری ءُ بیرانکاریاں گوں انسانی چاگرد ءَ ھمگرنچ کَنت۔ بزاں زھگ ھما چاگرد ءَ کہ ردوم زوریت، ھما چاگرد ءَ چہ اثر قبول کنت ءُ وتی تب ءَ ھما چاگرد ءِ مطابق ءَ رَجان کَنت۔ اے لیکہ یک صورتی گوں نفسیاتی عمل ءَ گوں ھمگرنچ اِنت۔ بزاں درکسانی ءَ چاگرد ءِ ھما گپچل، سکی ءُ سوری ءُ یا مات ءُ پتانی یا چاگرد ءِ نیمگ ءَ ھما ذھنی ٹارچر کہ زھگ ءَ رَسنت، آ زھگ ءِ دل ءُ ماژگانی تھا تاں پورھیں زند ءَ نقش بنت ءُ آئی ءَ سلیں راھی ءَ پِریننت۔

نامداریں تب زانت سگمنڈ فرائیڈ ءِ ردا انسان درکسانی ءَ کہ ھما ذھنی گپچل ءُ سکی ءُ سوریاں گوں دُچار بیت تہ ھمے ذھنی گپچل انسان ءِ لاشعور ءِ تھا نقش کِلنت ءُ تاں زند ءَ ھمے گپچل ءُ ذھنی جنجال بنی آدم ءِ ھمراہ اَنت ، وھد وھد ءِ سرا آ انسان ءِ تب ءِ تھا ”تشدد“ ءُ جارحیت ءِ شکل ءَ سر کشان کن اَنت۔

نوکیں دور ءِ سائنس ھم فرائیڈ ءِ اے لیکہ ءِ منوگر اِنت کہ درکسانی ءِ ذھنی ٹارچر ءُ لَٹ ءُ کُٹ تاں سرجمیں زند ءَ زھگ ءِ ذھن ءَ نقش بنت ءُ آئی ءَ سلکاریانی نیمگ ءَ بَرنت ءُ تباہ کن اَنت۔

کولن ولسن ءِ گُشگ ءِ ردا چاگردی سلکاری انسان ءِ سرجم نہ بیوکیں واھگانی پُژگرد ءَ ردوم زورنت۔ ولسن ءِ لیکہ اِنت کہ انسان واجھی ءِ واھگ دار اِنت۔ اے ”ترم خانے“ ءِ واھگ گوں انسان ءِ ابرم ءَ ھمگرنچ اِنت۔ انسان مدام چہ دومی ءَ دیم ءَ روگ ءِ جھد ءَ کَنت۔ بازی ءَ کَٹگ ءِ جھد ءَ کَنت۔ انسان سوب مند بیئگ لوٹیت۔ نام کَشگ لوٹیت۔ چاگردی اڑاند یا ابرمی نزوری انسان ءِ اے واھگانی دیم ءَ اڑاند جوڑ بہ بنت تہ انسان ری ایکشن ءَ رؤت۔ نودربر اسکول ءِ وانگ ءِ وھد ءَ ھمے واھگ ءَ داریت کہ من سوبمندیں انجنئیرے بہ باں یا ڈاکٹرے بہ باں، یا موسیقی ءُ فنکاری ءِ سنچ ءُ کمال آئی ءِ تھا بہ بیت، آ ھمے واھگ ءَ بہ داریت۔ آ مزنیں انسانے جوڑ بیئگ ءِ واھگ دار بہ بیت۔ بلے بازیں جاورانی سوب ءَ آئی ءِ واھگ سرجم نہ بنت۔ ھما انسان کہ قابل ءُ باصلاحیت بہ بیت، آ بے صبر بیت ، دیم ءَ رؤگ ءِ جھد ءَ کنت، نام کَشگ ءِ جھد ءَ کَنت، تہ بازیں جنجال کہ آئی ءِ دیم ءَ اڑاند جوڑ بہ بنت ، تہ آ وتی ناکامی ءِ سرا گریوگ ءَ لگیت، آئی ءَ وتی سرا رحم کئیت۔ جیڑیت کہ چاگرد منی دُژمن اِنت۔ منی واھگانی دیم ءَ اڑاند اِنت۔ ھمے گپچلاں کہ آئی ءَ وتی جند ءِ دُژمن جوڑ کن اَنت۔ پرآئی ءَ آئی ءِ زند ھچ وڑیں بستارے نہ داریت، زندگی پوچ اِنت۔ ھمے ذات ءِ دُژمنی آئی ءَ چاگرد دُژمن جوڑ کَنت۔ انسان دُژمن جوڑ کَنت۔ اے ھما مرحلہ اِنت کہ انسان وتی زند ءِ ببا دیگ ءُ دومی ءِ کُشگ ءِ ھاترا ھچ چک ءُ پد نہ بیت۔ وتی واھگان ءَ ”شارٹ کَٹ“ رھبندے دات۔ ولسن ءِ ردا

”چوشیں مردمانی مستریں جنجال ھمیش اِنت کہ آ ھمے سرپد بنت کہ چاگرد ءَ مئے گُما انساف نہ کُتگ۔ بے انصافیانی ھلاپ ءَ ”نارمل“ انسان ءِ ”رد عمل“ وتی جند ءِ سرا ”رحم آیگ“ اِنت۔ ھمے بے انصافی ءُ ”خود رحمی“ آیان ءَ کم مارشتی ءِ شکار کنت۔ چوشیں مردم وتی جند ءِ مستریں دُژمن جوڑ بنت۔ جیڑگ ءَ آھانی تب ءِ تھا زوت دلرنجی ودی بیت ءُ آ ”جارحیت پسند“ بنت۔ چر ایشی ءَ مردم چرآھاں چہ وت ءَ گِستا دارَنت۔

قابلیں ناکامیں انسان چہ دومیاں گیشتر بے صبر بنت، چیاکہ آھانی تھا گیشتر قوت ءُ تونائی بیت۔ بے صبری ءِ سوب اِنت کہ آ ”شارٹ کَٹ“ رھبندی ءِ درگیجگ ءِ جھد ءَ کن اَنت۔ ( ءُ شارٹ کَٹ رھبندے گچین کن اِنت ءُ قاتل ءُ غنڈہ جوڑ بنت، نو ھمے سوب اِنت کہ انسانی چاگرد ءَ گیشتر بودناکیں زھگ قاتل، دُز ءُ ڈنگ ، نشہی ءُ منشیات فروش جوڑ بنت، نابود ناں)‘‘۔۔۔۔۔۔۔۔

بازیں کَس چاگردی سلکاری ءُ کُشت ءُ کوش ءِ سوب ءَ بے تعلیمی گُشنت۔ بے تعلیمی ءَ چہ جاھلی ردوم گیپت ءُ انسان قاتل ءُ دُز جوڑ بیت۔ بلے اے گپ ءَ ھچ وڑیں راستی نیست، ولسن گُشیت کہ بے تعلیمی انسان ءِ قاتل ءُ دُز جوڑ بیئگ ءِ سوب بیت نہ کَنت، بلکیں تعلیم وانگ ءُ دیم ءَ رؤگ ءِ واھگاں چہ بے سوبے انسان ءَ قاتل جوڑ کَنت۔ باز جاہ ءَ تعلیم مردم ءَ زانت ءُ سرپدی دات بلے انسان ءِ داشتگیں واھگاں پیلہ کُت نہ کَنت۔ ولسن ھمے حوالہ ءَ دَنت کہ اسکول ءِ پنچ صد زھگانی تھا بیست ءُ پنچ اگاں ٹاپ لیول ءَ آیگ ءِ جھد ءَ بہ کناں، لھتے سوبمند بیت، بلے ھما بودناکیں زھگ کہ وتی داشتگیں واھگان ءَ بے سوب بہ بیت تہ شارٹ کَٹ رھبند ءَ گچین کَنت۔ ویلسن ءِ اے لیکہ ءَ اگاں من بلوچ چاگرد ءَ گوں ھمگرنچ بہ کناں ءُ بہ چاراں تہ بازیں مثال ھست اَنت کہ ولسن ءِ لیکہ ءَ راست ثابت کن اَنت۔ مئے اسکول ءَ ایف۔ایس۔سی یے کلاساں دو انچیں سنگت بوتگ اَنت کہ من آھانی نام ءَ زاھر نہ کناں، آ وانگ ءَ باز بودناک ءُ زبر بوتگ اَنت، ایف،ایس ،سی ءِ چکاس ءَ گوں جوانیں نمبراں سوب مند بیتگ اَنت۔ بلے رندا قاتل جوڑ بیتاں، یکے کُشگ بوت ءُ دومی ھست اِنت۔ دومی من ھمے گپ ھم نوٹ کُتگ کہ مئے سماج ءِ تھا ھما سنگت کہ وانگ ءُ زانگ ءَ گیشتر ذھین بوتگ، آ نشہ ءُ دگہ چاگردی گندگیانی آماچ بوتگ۔

ولسن یک راستیں مثالے ءَ ھمے گپ ءِ گواچن ءَ منارینیت کہ امریکا ءِ نامیئں قاتل ”پینزم“ کہ سی زھگ ءُ مردمانی قتلے کُتگ، لھتے کتابانی مصنف اِنت۔ پینزم ءِ یک کتابے کہ آئی ءَ کرائم ءِ سرھال ءَ نبشتہ کُتگ دُنیا ءِ مشھوریں کتاباں گوں ھساب بیت۔ پمیشا ویلسن ءِ ءِ اے لیکہ راست اِنت کہ ” قتل ءُ دُزی ءُ ڈُنگی ءُ دگہ بازیں سلکاری انسانی ناسرجم بوتگیں واھگانی پژگرد ءَ ودی بنت“۔۔۔۔۔۔۔۔۔۔۔۔۔

نو گپ ایش اِنت کہ اے نادراھی ءِ گر ءُ دار ءِ ھاترا چی کَنگ بہ بیت۔ قاتل ءِ شر کنگ ءُ چاگردی درچ ءَ آرگ ءَ کجام دوا کارمرز کنگ بہ بیت۔ اے ردا اگاں ما بچاریں نفسیاتی ءُ چاگردی سائنس ھما علم اِنت کہ اے راستی ءَ ڈس ایت کہ انسان ءِ قاتل ءُ دُز بیئگ ءِ سوب چی اِنت۔ انسان چیا چاگردی سلکاریانی آماچ بیت۔ بلے سائنس اے گپ ءَ نہ جَنت کہ چاگردی ءِ اجتماعی سلکاریانی گر ءُ دار ءِ ھاترا کجام رھبند کارمرز کنگ بہ بیت کہ چاگرد چرے بیمناکیں نادراھی ءَ بہ رَکیت۔

اے ردا بازیں جیڑگ ءَ پد ، من بِذات خود یک آسرے ءَ سر بوتگ اَنت کہ قتل، دُزی ءُ دگہ بازیں چاگردی سلکاریانی گر ءُ دار ءِ ھاترا ھما علم کہ سوب مند بیت کَنت آ ”مذھب“ اِنت۔ مذھب ءِ ”حیات بعد الموت“ ءِ تصور، جنت ءُ جہنم ءِ تصور، انسان ءِ ھمک کردانی سرا جُست ءُ پُرس ءُ جزا ءُ سزا ءِ تصور، چاگردی سلکاریانی دارگ ءِ ھاترا انسان ءِ رھدربری ءَ کُت کن اَنت۔ واجھی ءِ شوق ، ترم خانے ءِ واھگ دارگ، وتی ”من“ ءِ برجم دارگ ءَ دومیانی سرا زلم ءُ زوارکی ءُ قتل کنگ، اے ھمے شارٹ کٹیں رھبند اَنت کہ انسان ءِ گچین کَنت۔ بنکی چیز ھمے ”من“ اِنت کہ انسان ”ترم خانے“ ءِ شوق ءَ داریت ءُ ناسرجمیں واھگانی آسرا چاگردی سلکاریانی آماچ بیت۔ یکیں علم مذھب اِنت کہ انسان ءَ وتی ذات ءِ تھا سَرُک کنگ ءُ ھمے ”من“ ءِ ھتم کنگ ءِ سکین ءَ دَنت۔ من گُشاں مذھب اے ردا جوانتریں وسیلت اِنت کہ انسانی چاگرد ءَ چہ سلکاریاں رکینیت۔۔۔۔۔۔۔۔۔۔۔۔۔۔۔۔۔
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line

Offline Zahida Raees Raji

  • Administrator
  • *****
  • Posts: 7069
  • Karma: 356
    • Baask-Home of Baluchi Language, Literature & Culture
زُلم، زالم ءِ تباھی ءِ نشانی اِنت۔
~~~~~~~~~~~~~~

زُلم ءَ اگاں ما عام بزانت ءَ بزوریں ، زُلم ابرم ءِ ھلاپ ءَ کار کنگ اِنت۔ پمشا پَشت کَپت نہ کنت۔ اگاں ایشی ءَ ما یک راجی ءِ دومی راج ءِ لُٹ ءُ پُل، جنَگ ءُ کُشگ یا یک زوراکیں ٹکے ءِ دومی نزوریں ٹکے ءِ ایرموش کنگ ءُ واجہ کار ءِ غریبیں مھلوک ءِ سرا زلم ءُ زوراکی ءِ ردا بزوریں ، تہ ادا مدام یک گپے سیاسی حوالہ ءَ گُشگ بیئگ اِنت ﴿ اے گوست ءِ انسانی راجدپتر ءَ چہ ناپوھی ئے﴾ کہ ھما راج ءِ سرا کہ زُلم بیت، ایردستیں راج ءِ پجار ءِ جیڑہ دیم ءَ کٰئیت۔ بلے اے لیکہ ءَ ھچ وڑیں راستی نیست، بیگواہ ھما راج بیت کہ آ ابرم ءِ ھلاپ ءَ کار کَنت۔ دُنیا ءِ زوراکیں راج آشورین، ہن، قدیم یونانی ، قدیم رومی، اہل سبا، عاد، ثمود ، مغل ءُ دگہ بازیں راج پدریں مثال اَنت۔

زُلم ءِ بازیں تھر بنت۔ پاکیں قرآن ھمک چاگردی سلکاری ءُ ابرم ءِ ھلاپ ءَ کار کنگ ءَ زُلم ھساب کنت۔ خدا ءِ داتگیں طبعی علم ءِ نہ مَنگ ءَ بگر تاں راجانی کُشت ءُ کوش، عام چاگردی سلکاری شپکی، دُزی، جوا ءُ ھر ھما کار کہ چرآئی ءَ دومی انسان ءِ حق جنی  ءِ گمان ھست ، آ ابرم ءِ ھلاپ ءُ زلم اِنت۔ جھان ءِ کُلیں مذھبانی ردا رنڈی گری، ہم جنس پرستی، بچک ءِ گوں بچگ ءَ سوار بیئگ ءُ وتی نفسی واھگاں پیلہ کنگ ھم ابرم ءِ ھلاپ اِنت ءُ زُلم ھساب بیت۔ خدا ءِ داتگیں طبعی علم

ألا تطغوا في الميزان وأقيموا الوزن بالقسط

گوں شاھگانیں بزانت ءَ انسانی ابرم ءَ گوں ھمگرنچیں ، بدیں ءُ نیکیں واھگانی تورگ ءُ گیشینگ ءِ ، بدیں نفسی واھگانی ایرموش کنگ ءُ نیکیں راہ ءِ سرا گام جنَگ ءُ انسانی چاگرد ءَ برابری ءِ چماں گوں چارگ ءِ ھما ابرمی رھبند اِنت کہ ھمک انسان اے رھبند ءِ سرا روگ ءِ واھگ ءَ داریت ، بلے ذاتی واھگ، کینگ ءُ دُنیاٰئی لَب ءُ لالچ ، من ءِ بادشاھی ءُ زوراکی بنی آدم ءَ چہ ابرمی راہ ءَ گِسر کَنت۔

دُنیا ءِ تاریخ ءِ تھا بازیں زوراکیں راج گوستگ اَنت کہ آ ابرمی علم ءِ ھلاپ ءَ شُتگ اَنت ۔ آ چہ تباھی ءَ نہ رک اِتگ اَنت۔ غیر فطری عمل، یا ابرم ءِ ھلاپ ءَ کار کنگ ءِ آسرا کہ راج تباہ ءُ برباد بوتگ اَنت۔ گار ءُ بیگواہ بیتگ اَنت تہ ایشانی تاریخ دو شکلاں مئے دیما اِنت۔ یکے دومی راجانی حق جنی ، کُشت ءُ کوش، لگتمالی ءُ دومی راجی اندری تکاں زلم، شپکی، دُزی ءُ دگہ بازیں چاگردی سلکاری اَنت کہ راجانی بربادی ءُ تباھی  ءِ آسر جوڑ بنت۔

زُلم ءُ چاگردی سلکاریانی چاگردی ءُ نفسیاتی تپاس؛

اے ردا اگاں ما انسانی چاگرد ءِ سرا چماں شانک بدئیں، تہ مارا ھمے نشون رسیت کہ زلم، زوراکی ، شپکی ءُ دزی ، شبرھی کُشت ءُ کوش اگاں یک راجی ئے یا چاگردی ئے تھا ردوم بزور اَنت۔ یک حدے انچیں کئیت کہ پدا ایشانی دارگ نہ بیتگیں گپے جوڑ بیت۔ آخر ھما راج ءُ چاگرد ءِ تباھی ءِ سوب جوڑ بنت۔ چوشیں کردانی اگاں دارگ ءِ جُھد مہ بیت تہ ھما راج ءُ چاگرد ءِ تب ءِ بھر جوڑ بنت۔ چوشیں کردانی آسر ھمیش اِنت کہ آ راج تاریخ ءِ دنزانی تھا بیگواہ بیت۔ نفسیات دان ١۲ صد پیش مسیح تاں ۳ صد پنجاہ عیسوی ءَ رومی راج ءِ بربادی ءِ سوب ءَ دومی راجانی سرا زلم ءُ چاگردی سلکاریانی سوب گُشنت۔ رومی دری راجانی سرا زلم کنگ ءَ گیش اندری چاگردی سلکاریانی آماچ بیتگ اَنت۔ دُزی، شپکی ، ھم جنس پرستی، افیون ءُ شراب ءِ نوش کنگ ھما ابرم ءِ ھلاپ ءَ کار کرد بیتگ اَنت کہ تاریخ زانت ، ایشاں رومی راج ءِ یا رومی تہذیب ءِ پُرشت ءُ پروش ءِ سوب سرپد بنت۔ تانکہ رومیانی آخری بادشاھاں وتی شرم ءُ ننگ بُرتگ اَنت ءُ گوں بچکاں سانگ کُتگ ءُ شراب ءُ افیون نوشی رومی راج ءِ عادت جوڑ بیتگ ءُ ھمے سلکاری رومیانی بربادی ءِ سوب جوڑ جوڑ بیتگ اَنت۔ دومی رومیاں حضرت عیسیٰ ءِ منوگر ھزارانی ھساب ءَ بستگ ءُ زندھاتی مانداشتگ اَنت۔ تاریخ گواہ اِنت حضرت عیسیٰ منوگر روچ ء مروچی کروڑانی ھساب ءَ ھست اَنت ءُ رومیانی ھما حاکمیت تاریخ ءِ تھا بیگواہ اِنت۔ چیاکہ رومیاں ابرم ءِ ھلاپ ءِ کار کُتگ۔

چاگردی سلکاری ءُ زلم راج ءُ چاگردانی تب ءِ بھر چون جوڑ بنت؟

ھما چاگرد یا راج ءِ تھا یک نسلے ردوم زورگ اِنت۔ ھما زھگ یا نسل ءِ تب ءُ سنچ  ، ھما کردارانی دیستگیں عملانی بنیاد ءِ  سرا وتی تب ساچی ءَ کَنت۔ ھما فلم ءِ کردارانی ھمک عمل ءَ وتی ذھن ءِ تھا نقش کنان کنت ءُ ردوم گیپت، بدیں چاگرد ءِ زھگ بدیں کردانی  سرا وتی سنچ ءِ ساچان کنت ءُ جوانیں چاگرد ءِ زھگ نیکیں کردانی سرا اثر زوران کنت۔ زھگ ءِ ذھنی عمر دوازدہ سالاں سرجم بیت۔ دوازدہ سالانی تھا زھگ ھما چاگرد ءِ ھما کرداں گوں دوچار کپیت ، ھما کردار آئی ءَ دل ءُ ذھن ءِ سرا نقش کِلنت۔ اگاں بدیں کرد زھگ ءِ ذھن ءِ سرا نقش بہ بنت تہ پدا آ زھگ ءِ ساٹگ ءُ پلگارگ دروگیں ھیالے۔۔ دومی ھمک کرد راج یا چاگرد ءِ موروثی سوغاتی جوڑ بنت۔ ﴿اوشو گرورجنیش﴾ گُشیت

جَن ءُ مرد وپت ءُ واب ءِ وھد ءَ بدنی ھواری ءَ ھوار ذھنی ءُ روحانی کمیونیکیشنے ءَ گوں دُچار بنت، اے ردا مرد ءِ تب ءُ ھیلانی اثرات پیدا بیوکیں زھگ ءِ سرا ھم کَپت اَنت

نفسیات ءِ ردا اگاں ما بچاریں  اے منی چکاس اِتگیں راستی ئے، چاگرد ءَ مردم کہ ھما کارانی واھند اِنت۔ کُشت ءُ کوش ءِ وھد ءَ ، دُزی ءُ شپکی وھد ءَ، ھمک چاگردی سلکاریانی کنگ ءِ وھد ءَ انسان ھما نفسی تناؤ  ءُ ذھنی گپچلانی آماچ بیت۔ اے گپچل انسان ءِ موروثی CELL آنی سرا اثر انداز بنت۔ ھما CELL آں ھمے ھیل ءُ عادتانی قالب ءَ گوں رجان کنت، چیاکہ انسان یک مھلوکے ءَ ھوار یک میکانکی مشینے ھم ھست اِنت۔ سائنس ءِ ردا ھمے ھیل ءُ عادت D.N.A ءِ موروثی بھرانی وسیلت ءَ جن ءُ مرد ءِ وپت ءُ واب ءِ وھد ءَ پیدا بیوکیں زھگ ءَ منتقل بنت ءُ ھما ھیل ءُ عادتانی ردا زھگ ءِ تب ساچی بیت۔ پمیشا من پیشی بلوچانی اے بتل ءَ سائنسی راستی ئے سرپد باں کہ

اصل ءَ کار کَنت آدم ذات

اے گُشتگیں  گپانی آسرا من ھمے گُشاں کہ ھما راج دومی راجانی سرا زُلم ءُ زوراکی بہ کَنت۔ یا ھما راج کہ تہہ ءُ توکی تکاں چاگردی سلکاری، کُشت ءُ کوش، نشہ ءُ دگہ شومیں نادراھیانی آماچ بہ بیت۔ اے ھیل ءُ عادت نسل در نسل ھما راج یا چاگرد ءِ تھا ردوم گران کن اَنت۔ دانکہ اے ھیل ءُ عادت ھما راج ءُ چاگرد ءِ تب ءُ سنچ ءِ بھر جوڑ بنت ءُ آ راج یا چاگرد انچیں حدے ءَ سر بیت کہ پدا آئی ءِ شر بئیگ دروگے ءُ ھمے ھیل ءُ عادت ھما راج یا چاگرد ءِ تباھی ءُ بربادی ءِ آسرا سرجم بنت ءُ آ راج تاریخ ءِ دنزانی تھا بیگواہ بیت کہ انچو جھان ءِ بازیں راج بیگواہ بیتگ اَنت ءُ آھانی نام ءُ نشان نیست اِنتﺍ
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line