Author Topic: ڈۆکالءِ علاج۔ ۔ ۔ ولید گربنی ءِ آزمانک ندر پہ باسکاں  (Read 852 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7058
  • Karma: 356
    • Baask-Home of Baluchi Language, Literature & Culture
ڈۆکالءِ علاج
آزمانک: ولید گربۆنی

ڈۆکال أت. دلوت چه شۆدا گرّا گپتگ إتنت. وتی ڈگاراں کشار نه کنگءِ سببا مردۆم چه درمۆلکاں سرکارءِ آرتگێں سبزی ۆ نیبگاں زیرگا إتنت. پیسری زمانگا که سرکاری اۆمیدے نیست أت ۆ مردۆمانی ملکت همے ملک ۆ مچ إتنت، گۆڑا هوار بوت أنت تشـْک إش بست ۆ کشار إش هم کۆت. روچے یا دۆ روچءِ سرا تشک إش إیرجت ۆ همے آپءَ لهتے ڈکار کموک میسێنت أنت. همے درگتا نیبگی درچک ۆ مچانی بۆن هم نمب بۆت أنت. ألبت، هنی مردۆمی آبادی باز بیتگ. ڈگار ۆ مچانی باز واجه بیگءِ سببا پهک تلـْپ إتنت. دهقاناں هم کۆلندوی کنگ یله داتگ أت.
همے درگتا هاتم چه درمۆلکا گس منند بیتگ أت ۆ وتی سرجمێں پنشن ئی زۆرتگ إتنت، ۆ چهْر ئی کۆتگ أت. ملک ئی که دیست، آئیا وتی کسانی یاد آتک. کسانیا ڈۆکالا چه ڈۆکالتریں سالاں سبزی ۆ نیبگ په ورگا بیتگ. باز پدرد بوت که پرچا ملک بے سبزیں ڈگار ۆ درچک أت ۆ گۆشێگا پیلوشتگ أت!
آئیا جاور سرکچ وارت أنت که ڈگارانی باز واجهیءِ سببا هچ کس إش جۆست نه کنت. پرچاکه یک ڈگارے صد یا دۆصد کساں سێر نه کنت. نێکه مچ ۆ دگه نیبگ هرجاگه رس إت کن أنت. پمیشا آئیا خیالے آتـْک. همے خیالءِ همردیا وتی ٹکءِ مردۆم ئی توار کۆت أنت.
وهدے که درۆستێں مردۆم سرجم بوت أنت، آئیا گۆشت: مئے پت ۆ پیرۆکی ڈگار تلپ أنت. مچ ۆ نیبگی درچک مۆرتگ أنت. مئے مێتگءِ کش گورا سبزێں چیزے ظاهر نه إنت. چپ چاگرد گندگا مانداشتگ أنت. سبزیانی نه بیگءِ سببا شۆمئے دلوتاں گرّ إنت. شۆمئے جند ۆ زهگ باندات هنچۆشێں نادراهیانی آماچ بیت کن إنت. په إے ڈۆکالءِ علاجا بیا إت هوار بییں، تشکا بندێں ۆ وتی پیرۆکی ڈگاراں کشار کنێں داں شهر پدا آباد به بیت.
یک په یکـّا پهکێں مردۆماں هاتم ڈوبار إت ۆ گۆشت إش که په پیرۆکی ڈگارءِ چۆنڈءِ آباد کنگا آ وتی دستاں ترانْبل نه کن أنت. وهدے که پهکاں إنکار کۆت، گۆڑا هاتمءَ کاگد آرت ۆ ندے چه کیسگا در کۆت. چه پهکاں دست نشان ئی لوٹ إت داں پهک قبول به کن أنت که أگر آئیا تشک بست ۆ ڈگار ئی آباد کۆت أنت؛ په بهرءِ لؤٹگا هچ کس نه رَوت.
پهکاں دست نشان جت أنت ۆ پشت إش ماندات. هاتمءَ چه وتی گس منندی زرّاں لهتے مردۆم پگار دات ۆ گوں وت په تشکءِ جوڑ کنگا بۆرت أنت. تشک ساڑی بۆت. ڈگار ئی گردێنت ۆ شؤم جن ئی کۆت أنت. آیانی توکا وڑ وڑێں سبزی ئی کشت. لهتے ماهانی نیاما په آئیءِ پساں إسپۆسْت هست أت. په لۆگا وڑ وڑیں سبزی. ۆ چه پهکاں گێش مێتگءِ مردۆمانی چم په سبزیے گپگا لگ إتنت. پیرۆکی زمینانی آبادیءِ گندگا بازێں سیاد گل بوت أنت. بلی تورێں آیانی لاپا کٹ روگا نه أت، بله شهر آباد أت.
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line