هَور گواریت، بخیل دستاں چێرا داریت
آزمانک: ولید گربۆنی
بخشیءَ داد رسگءِ حالا وانگا رند دلاورءَ وتی دلدوستێں حالتاکءِ تاک چول چول کۆت ۆ دور دات. پدا زهر گِنکـّی چه جاگها چست بوت ۆ همے کپتگێں تاک ئی پادانی چێرا لتار إت. همے درگتا پێشانی ئی هنچۆش شوندیگا أت که گۆشێگا پاد ئی بخشیءِ گۆٹا داتگ ۆ آئیا ناگۆٹ کنگا أت. هنچۆناها مردۆم که زهر گر أنت وتی چێری لۆنٹا گٹ پاچ أنت، بله دلاورءَ وتی سری لؤس دپا کۆت ۆ لێڑهءِ ڈولا گچ ئی کۆت.
إنچۆک بیان ئی داتگ أت، بڈے پرێس کانفرنساں گپ ئی جتگ أت، بازیں چێر ۆ سرظاهرێں دیواناں مردۆم، ۆ حالکار ئی سوج داتگ إتنت. همے سوجانی ردا آئیءِ پلانگری زیرؤکێں ندکاراں دراجکشێں سیاهگ نبیستگ ۆ حالتاک "گونـْگ'ءَ شنگ کناێنتگ إتنت. دادءِ حالا إے پهکێں جهد زوال شوندات أنت.
دلاور أبکه أت که إے داد دیوکاں پرچا مێم نه کۆتگ، بخشیءِ باروا پولکاری إش نه کۆتگ! آئیءِ گمانا أگر پولکاری إش به کۆتێن أت، گۆڑا آئیءِ حالتاکی بیان ۆ همخیالانی دراج ۆ دلکشێں سیاهگ إش ألمّا وانتگ إتنت. أگر ملکءِ سرجمێں تاکبند ۆ حالتاکاں چارگ گران أت، دیارءِ وتی روچتاک 'گونـْگ' وا آیان به چار إتێن أت. دلاور دلا دلجم أت که روچتاک گۆنگءِ چارگا رند هچ سما په بخشیءِ داد دیگا ساجه نه بیتگ أت.
گوں وت کمۆک سر چێر بیگا رند وهدے دلاورءِ جؤش سِرت، گۆڑا خیال ئی کۆت که پرچا نه وتی جند ئی یک رپورٹے سرجم مه کنت ۆ بخشیءَ داد دیوکانی سرا راه مه دات داں آ داد دیگءِ فێصلوا دوارچاری به کن أنت!؟
چه دگه دراں چیزے هوار کنگءِ دسترس دلاورءَ وا نیست أت. پرچاکه آئیءِ دنیا روچتاک 'گونگ'ءِ چپ چاگردا پرتر مانترگا أت. پمیشا دلاورءَ بخشیءِ باروا همے روچتاکا شنگ بیتگێں سرجمێں بیان، شونگال ۆ سیاهگ سرجم کۆت، دیمدات أنت. گوں إیشان یک نمدیے هوار کۆت ۆ نبیس إتی "دادے دیگ فیصله که شما کۆتگ، گندگا إیشی إشتاپیے بیتگ. من دلجموں که هوارێں شاهدیانی وانگا رند شما وتی فیصلوا ترّێں إت."
دێر نه گوَست که چه آ دیما پسۆے دلاورءَ سر بۆت. پسّوا نبیستگ أت "مڑادارێں واجه، شمئے سرجمێں گپ ۆ سیاهگ ما ساری دیسته بیتگ أنت. تئی سیاهگانی کشا ما بخشیءِ باروا دَهاں کتاب چارتگ أنت ۆ ملکءِ صداں سساساچ جۆست کۆتگ أنت. چه پهکاں رستگێں سرپدی یکێں راستیا درا کنگا أنت که بخشیءَ په وتی قوم ۆ إنسانءِ سربلندیا وتی زند گوازێنتگ. آئیءِ کۆرتگێں نێکیانی دیما إے کسانێں داد سک کم إنت."
په دادءِ زیرگا وهدے بخشی لوٹاێنگ بوت، گۆڑا همودا دلاورءِ لاپسوچی بیگءِ باروا سهیگ بوت. آئیءِ دلا آتـْک "هور کواریت، بخیل دستاں چیرا داریت!"
