Author Topic: عہد۔ ولید گربونی ءِ بلوچی آزمانک پہ چمشانک  (Read 798 times)

0 Members and 2 Guests are viewing this topic.

Offline Zahida Raees Raji

  • Administrator
  • *****
  • Posts: 7058
  • Karma: 356
    • Baask-Home of Baluchi Language, Literature & Culture

عهد
آزمانک: ولید گربۆنی

سیاستا مان نه دیگ ۆ وتی کارا کار دارگءِ عهدا کنگ ۆ ویسکیءِ چار یا پنچ پێک جنگا رند وتی إیمێلاں چاراں پیردادءِ چم شهید کمبر چاکرءِ ٹپ ٹؤرێں لاشءِ عکسءِ سرا کپت أنت. لپ ٹاپءِ دیم ئی سنگتانی نێمگا ترّێنگ ۆ گۆشت ئی "کلام إے سیاستکاراں غرق به کنت. إیش مئے نایاپتێں ورناں بکشؤشگێں فوجیانی دستا کؤشارینگا أنت. إے سیاستکارانی هواریا فوجی هم گوں وتی مۆلکا برباد بات أنت."
سنگتاں عکس چار إت. یکێا وتی لۆنٹ گٹ پاتک، دۆمےءِ إرس چمانی تها گۆلگۆل بوت أنت ۆ دگرێا وتی زنوک بۆرزکایی بورت ۆ گینے ساه ئی پۆر کۆت. چارۆمیا گۆشت "مردۆمءِ لاپ إدا گێشتر سوچیت که وتی ملکءِ تها ورنایاں ترتاب کنگءِ إجازت نیست. ورنایے أگر چه یک مێتگێا دگه مێتگے به روت، راها چست کنگ بیت ۆ پدا ماهاں ماه بێگواه بیت. چدا رند آزاد بیگءِ بدلا به گندئے پاکێں لاش ئی شێپ دپ ۆ کور کرّێا کپتگ."
پیردادءَ گیر آتگ که کمبر چاکرءَ کویٹه زانتجاهءِ دیما په وانوکانی حقاں شۆدکشـّی کوتگ أت. "چونێں نایاپتێں ورنایے أت. گندگا أمن دوستے أت. أگر جنگ جدلءِ پلانگری زیرؤکے بیتێں أت، په وتی لوٹانی منـّێنگا إێمنێں راه ئی گچێں نه کۆتگ أت." پیردادءَ دلا گۆشت.
"اۆڑے، إے زوراکیانی دیما دارگا راهے وا بیگ لوٹیت. مارا إے راه درگێجگی إنت." پیرداد چه گِیرانی هنکێنا در کپت ۆ دردانی درمانءِ باروا مانگیشتگێں راهانی ترانگا کپت.
"پیرداد جان إے گرانێں جێڑوے إنت. ما إے جمعهءِ بیگاه شراب تها بۆک وراں به گوازێنێں پدا هم گوں همے سربتگیا در گپێں" یک سنگتێا گۆشت.
دگه سنگتێا إشاره کۆت که بحث ألمّی إنت، بله بحث کنوکانی سراں گرم دیگءِ تؤشگ پکار أت. یکـێں بوتلءِ ویسکی وا کۆٹتگ أت ۆ إیشیءِ بروَرد أندوه ۆ آهانی درشانیا گوں سرجم بوت.
دگه سنگتێا هم په هَو سر سۆرێنت ۆ یک یک هزار کلدار إش هوار کۆت، ۆ کسترێں سنگت إش په دۆ بوتل 'بلیک لێبل' ویسکیءِ زیرگا راهی کۆت.
شراب ورانا سنگتاں په زوراکیانی دیما دارگا راهے درگێجگءِ واهگا وتی سر جوڑێنت أنت. ألبت، بروَرد سر کن ۆ پرکن، هۆپ کن هچ بوت. چه فوج، پولیس، لیویز، هندی ۆ مرکزی سیاستکار ۆ سلاحبندێں جۆهدکار؛ پهکانی کارکرد إش چار إتنت، بله پٹِتگێں بندیکءِ وڑا رشتگءِ سر گار أت. سیاسی گل إش یک یکـّا وتی بحثءِ سرحال جوڑ کۆت أنت، بله هچ په هچ. سرمچارانی کارکرد إش چار إتنت ۆ نتیجوے نه رس إت.
آیانی گمانا سیاسی گل ۆ سرمچار بے شپانکێں رمگےءِ وڑا چه رستراں پۆرّێں گرێشگاں یله إتنت. ۆ رسترانی کارکرد تلپێں پڑاں کپتگێں لاشانی درؤشما پدّر إتنت.
ألبت، پیرداد ۆ آئیءِ سنگت یک راهےءِ سرا پَت بوت أنت که گمراهێں راهانی سکێں دیوکێں بٹاکیانی دروغانی بون ٹونک کنگ به بنت. همے مقصدا إیشاں وتی نداں کاربندگءِ عهد کۆت.
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line