Author Topic: سرتگیں باجیگ ۔ ندای زاهدان - وهاب ایران نژاد -  (Read 1870 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7083
  • Karma: 356
    • Baask-Home of Baluchi Language, Literature & Culture
سرتگیں باجیگ
ندای زاهدان - وهاب ایران نژاد -

 چیزے روچ پیش دوستے منءَ هال دات که فلان کسءَ یک هپتگی تاکے اجازت نامه گپتگءُ دلمانگ اِنت شنگ ۓ به کنتءُ چه ماءُ شما که بلوچی زبانءَ نبیسیں لوٹ اِیت که اے کارءَ گون آئی دز کمک به بئیں. مئے ملکءَ بازین قانونے هست که اثر اِش گون وهدءِ گوزگءَ بے اثر بوتگ یکے چه همے قانونان مطبوعاتءِ قانون اِنتءُ خاص اجازت نامهءِ گرگ که گون نوکین میڈیا چون مجازی جهانءُ الکترونیک میڈیاءَ چٹ بے اثر بوتگ چه انقلاب اول بگر دانکه اصلاحات دور زمانگءَ بلوچی زبان چه اے وتی قانونی حقءَ زبهر اِنت خاتمی دولت که قومیتاں آئیءِ گچینءَ مزنین بهرے هست اَت مئے زبان استانی منصب دارانی کستءُ کینگءَ ڈالچار بوت. منءَ یات اِنت خاتمیءِ زمانگءَ که مطبوعاتءِ بهارگاه دور گوشگ بوت مئے زبانءُ بلوچین ندکار اِش اجازت نامه نه دات اَنت من وتءُ بازین دوستے اجازت نامهءِ لوٹوک بوت اَنت بلے قول مردءَ وتی هر لچی داسی مردمے که نبیسگءِ نام اِش نه زانتءُ چه روچ مروچی انگت بلکے نبیسگءَ انگار جوانین وانوک هم نه اَنت بازین اجازت نامهے واهند انت که لهتے دگه ندکاران کریهـ اِش داتگ انت هیر اے دور هم گوستءُ شت بلے قول بلوچی بتلءَ «هست خداے که نام ۓ رحمان انت» الکترونیک میڈیاءِ سوبءَ مروچی کاغذی مطبوعات هورکین جاگه پر بوتگ تهنا اصلاحاتءِ گڈی سالان واجه دکتر باقر کردءَ یک اجازت نامهے بلوچی ءُ فارسی زبانءَ دیگ بوتءُ آئی هم دراجیں قصهے هست که ادءَ آرگ نه بیت.

مئے ملکءِ بازین قانونے هنچو مردمءِ دستءُ پادءَ ٹٹاینتءُ بند اَنت که بازینے مجبور بنت که آ قانونءَ کار مه بند اَنت ءُ گڈ سرءَ اے قانون وت چه وتی اثرءَ کپ اَنتءُ بے رنگ بنت اگاں همے اجازت نامه اِش ده سال پیش به داتیں بازین کارے بوتگ اَت بلے هنوگیں وهدءَ اے اجازت نامه هچ دردے درمان نه کنت بلکے بازین چیزے بدل بوگءِ سوبءَ اے اجازت نامهءِ واهند وتی تاکبندءَ شنگ کت مه کنت اگاں وامءُ بدلءُ بانداتے به کنت نو پیسریگیں وانوکاں درگپت نه کنت مارا شری یات اِنت که انقلابءِ اولی سالاں تا بازین مدتے وی سی آر (ویدئو) مئے ملکءَ گرءُ بند اَتءُ هر کسءِ گورءَ گرگ بوتیں مجرم حساب کنگ بوت دانکه وی سی آر ءِ دور کُٹّ اِتءُ ماهوارهءُ دگه الکترونیک میڈیا دورءَ جهان سرا زرت گڑا مئے ملکءَ چیزے سال پیسر نوکی وی سی آر اِش آزات کت. نوں اے وهدءَ کس وی سی آر نه چار ایت مئے بازین قانونے مردمانی هنوگیں لوٹاں پوره نه کن انتءُ یا هنچیں قانون هست که وتی وهدءُ زمانگءَ کار بندگ نه بنت هما وهدءَ اے قانون کارمرز بنت که دگه آیانی وهدءُ اثرمندی گوستگءُ شتگ سالانی سال اِنت که قانون اساسی پانزدهمی اصل که ماتین زبانانی وانگ اِنت عملی رنگ دیگ نه بیت. هم خاتمی دولتءَ اے قانونءِ عمل کنگ قول داتءُ هم احمدی نژاد ءِ دولت جار جت که من اے قانونءَ کارمرز کناں بلے انگت هچ نه بوتگ باندا اگاں یک دوستے لانکءَ به بند ایت اے قانونءِ لوٹوکانءَ دگه اے قانون راضی نه کنت اے بابتءَ بلوچی زبانءَ باز جوانین بتلے هست که: "سرتگین باجیگ مان دل زپ اِیت" بلے من ادا چیزے مشورت وتی همے دوستاں دیان امیت اِنت آیاں کار بند اَنت داں که دگه جنجالءُ دلسیاهی ے مه کپ اَنت اے واجهین برات اے گپءَ بزان اَنت که دگه کاغذی تاکبند انت شنگ کنگ یک مزنین جهدے ءُ یک زانتکارءُ تجربه کارین تیمے لوٹ ایتءُ هر نودربرے کار نه اِنت قول مولوی عبدالله "بار هما جنگین لیڑو زیر اَنت / کار نه اِنت کواروکیں کواٹءِ یار" ءُ المءَ تجربه کاریں مردم گون هوشءُ گوش اے پڑءَ دور کن اَنتءُ اگاں هم بیا اَنت زان اَنت که چونین مشکلءُ گرانین بارے وتی کوپگان اِش زرتگ دومی گپ ایش اِنت که اے کار یک مزنین زرءُ مالی بنمالے لوٹ ایت که کم چه کم یک سالے وتءَ گون وتی مالی وسءُ واک دیمءَ شت به کنتءُ چه سالے رند گون مزنین جهدے نوکی بلکے پر وت یک مالی درءُ وسیلهے پچ به کنت مشکل ترین گپ اِش اِنت که وانوکءِ در گیجگ اے وهدءَ سک مشکل اِنت. من یک درورے پیش کناں دانکه بزان انت اے وهدءَ وانوکانی کساسءُ تب چی اِنت. چهبارءَ گوستگیں سالءَ چه تهرانءَ همک روچ اگاں 100 دانگ شرقءِ روتاک آتکگ سرجمءَ بها بوتگ اَنت بلے رند چه شرقءِ بندگءَ ءُپدءَ شنگ بوگءَ نی اے شهرءَ 20 دانگ شرق کیت بلے همے هم نیم اِش پدءَ بها کنوکءِ دستءَ پشت کپ اَنت نی شما وت کساس به کن اِت اے دگه روتاک ، ماهتاکءُ تاکبندانی هال چی اِنت؟ روتاک زاهدانءِ یک تاکے هم چهبار شهرءَ بها نه بیت! مرزپرگهرءِ حال انگت بدتر انت اے چهبارءِ وانوکانی هال اِنت که ادا همک روچ چه تهرانءُ زاهدانءَ اے روتاکءُ هالتاک ءُ ماهتاک سر بنت بلوچستانءِ اے دگه شهراں انگت جاور بدتر اَنت گڑا یک تاکبندے کامیاب کنگ اے دورءَ باز گرانین کارے ءُ هر کسی کار نه اِنت.

البت منی مولءُ مراد چه اے گپّاں واجهانی ناامیت کنگ نه اِنت بلکے چه وتی تجربهءُ سرگوستاں واجهان زانتکار کناں که بے تجربهیءِ سوبءَ جنجالءُ گپچلے مه کپ انت اگاں وتی لانک اِش په اے کارءَ بستگ گڑا اے راهءِ مشکلءُ دلسیاهیانی بزان اَنت اگان نه راهءِ نیم دلپروشءُ نا اُمیت بنت دگه برے په دگه چشین کارے تهم کرت نه کن انت

گوں خسرو ملا زئ ءِ منہ واری ءَ
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line