Author Topic: ملا فاضل ءِ راج تپاکی ءِ سکین۔ شپچراگ ءِ نبشتانک  (Read 1162 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7083
  • Karma: 356
    • Baask-Home of Baluchi Language, Literature & Culture


ملا فاضل ءِ راج تپاکی ءِ سکین
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
1837 ءَ انگریز بلوچانی نامئیں حاکم میر محراب ءَ شھید کنت۔ بلوچانی یک ٹوھیں نوابے ءِ انگریز ءِ لشکر ءِ دیما پروش ورگ ءِ مستریں سوب بلوچ ءِ وحدت ءِ کمزوری بیت۔ انگریز لھتے وتگڑیں میر ءُ نوابانی وسیلت ءَ پندل سازیت ءُ بلوچ ءِ میان ءَ قبائلی ناتپاکی ءِ آس ءَ بُن دَنت۔ چر ایشی ءَ بازیں میر ءُ نوابانی چمّاں انگریز ءِ مراعات کور کن انت ءُ آ خان صاحب ءِ ھمراھداری ءَ نہ کن انت ءُ خان محراب گوں لھتے سنگتاں جنگ کنت ءَ شھید بیت۔

1898 ءَ انگریز مکران ءِ سرا ارش کنت، بلوچ خان نوشروانی اے جنگ ءَ شھید بیت۔ اے جنگ ءَ بازیں سردار بلوچ خان ءَ یل دینت ءُ تچ انت کہ آھانی تھا مکران ءِ حاکم میر محراب خان ھم گون بیت۔ انگریز لھتے زر دوستیں میر ءُ سردارانی کمک ءَ بلوچستان ءِ بازیں ھنداں ارش کنت ءُ قبضہ کنت۔
ملا فاضل بلوچستان ءِ شاعر ھمے وھدا ءُ نوبتاں ودی بیت کہ انگریز بازیں جاھاں بلوچ ءِ ناتپاکی ءِ سرا نپ چست کنت ءُ وتی قبضہ ءَ برجاہ داریت۔ پہ فاضل ءَ اے سرجمیں تاوانانی مستریں سوب بلوچ ناتپاکی انت کہ اے آس ءَ انگریز بن دیان کنت۔ فاضل ءَ 1820 تاں 1860 ءِ سال ءُ سیماں زند گوازینتگ۔ پمیشا اے کواسیں بلوچ شاعر اے جاوراں وتی شعرانی تھا بیان کنت ءُ بلوچ ءَ تپاکی ءِ سکین ءَ دَنت۔
ھرچی کہ بیلاں بر حقیقت ھمراہ بیت
مھر ءُ دوستی ءُ تپاک ءُ یکجاہ بیت
تیھریں گٹے چو تلاراں بے راہ بیت
ناکہ ماں شاھانی گورا دست کوتاہ بیت
پلیں مستاگاں ماں بشارتاں گواہ بیت۔

سی ھزار برات ءِ واجہ گر سُستی کنت ردیں
ناتپاکی ءَ چی شُمارا کٹ ءُ نپیں

ایر شُتگ روچ ءُ رند ء من دُنیا ءَ شپ انت
ماں ھمک کُنڈاں گور جتگ آساں گپگپیں
بازیں پہ چیواہ ءُ کلاگاں گج ءُ گپیں
چہ شُمئے کاراں آھنیں دربندی درپیں

بلے کئے انت آ وھد ءَ چوشیں دانا ءِ اے پنتانی سرا عمل بہ کنت ءُ یکجاہ بہ بیت۔پمیشا آ گُشیت
بس کن او فاضل عاقلاں کس یار نہ کنت
تیشگ ماں پولاتیں کڑیاں کار نہ کنت
چہ ترا رند شاعر چوشیں گُفتار نہ کنت
لیڑھی جونگیں پہ ھبر وشبار نہ کنت
فاضل وتی راج ءِ ناتپاکی ءَ گِندیت، ھمے آس کہ لھتے نواب ءُ سردارانی وسیلت ءَ ماندارگ بوتگ، تہ چوشیں ساھتاں آئی ءِ شاعری ءِ دامن ءَ بیمناکیں ھیال سر کشّاں کن اَنت۔ آ بلوچ ءِ عاقبت ءَ چمّان ء وت گِندیت، ماریت ءُ گُشیت۔

انچیں باریگے کئیت منی ھوش ءَ ھوش ءَ
زھم جنیں مرداں ، گِر اَنت گوش ءَ
چابک ءُ شھمات اِش بَر اَنت ھوش ءَ
قید ءُ زندان بنت بے وتی کوش ءَ

مرچی اے راجی ناتپاکی ءِ آسر ھرکسی چمانی دیما اِنت کہ فاضل ءَ سد سال پیسر ءَ اے آسر ڈس اِتگ ءُ راج تپاکی ءِ سکین داتگ۔۔۔۔۔۔۔۔۔۔۔۔۔
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line