زاھ۔۔د سلیمان،،،،،،،،،،،،،،مہرانی بندیگ
رو دَر آتک ءَ مَھپر گونَگیں سیاہ ءُ بَزیں جَمبراں مانشانتگ اَت. . سیاہ و بَزین جمبرانی پُشتا اسپیتیں کوکرۓ سر کشّان اَت و جَہلا سیا ہ و تہار و جِن کول گونگیں لُوڑۓ مستیں لیڑہ ءِ ڈئولا گُجّ ءُ کپ اَت۔
دَمانۓ ءَ پد سیاہ گْوات ءَ دْراھیں میتگ مانپتات . . .من ذوت ذوت کوٹی ءِ دَپ بَست ءُ تَہت ءِ سرا دْراجکشّ بوتاں. . .ڈَنّا چہ سیاہ گْوات ءِ دَنزو گُباران ہرنیمگا تھامورئیا مانشانتگ اَت و کوٹی ہم تہار بوّان ات. . .سیاہ گوات ءِ شیکانی توار تُرسناک اَت و گْوشئے جاتوگ جاک و جَگّا کنگا اِتنت۔ دْراجئین ساہتئیا رَند لُوڑ و سیاہگْواتے زور پْرُشت و کوٹی کمے روژنا بوت۔
جمبران نرمین شَنزگے بنا کت ولَہم لَہمئین سرگْوات ئے کشّگا لَگئت۔ سَرگْواتے لہمین شیک گْوشئے گون منا ھلوت کنگ و مولد ئے ریک ئے سئیلا رَوگئے سکین دَیگا اَتنت۔ گْوشئے یک نَدیتئین زور و کوّوت ئے منا پہ مولد ئے ریک ءَ رَوگ ءَ واہدارکنگا اَت۔
ھئور شنزگا اَت، گْوات لَہم لہما کشگا اَت، بوم و ھوا وَش اَت، زید بْراھدار اَت ۔ من بی نیّت و ارادہ پہ بیتاھیری مولد ءِ ریک ءِ سئیل و سواد ءَ دَرکپتان۔ دیم پہ مولد ءِ ریک ءَ آپ دُرکے لَمب ءَ سَبزتاکین چِگرد ئیے سر ءَ کپوت ئے نِشتگ اَت و پہ زَھیر ئی نالگا اَت۔ کپوت ءِ پُرزیمرئین نالگانی اِشکنگا من پاد داشتنت و کپوت ءِ نیمگا چارگا لگتان، بلئے پدا رَھادگ بوتان۔ یک اَناگہ تِلاہ دْروشمین ریکانی تہا چَمّون پہ دَرپشوکین چیزئی ءَ کپت کہ ہئور ءِ شنزان چہ ریکانی چیرا پَدّر کتگ اَت و شُشتگ اَت۔ دَست اون شہارت و چہ ریکان دَرکت و چارِت، نُگرہ ءِ پُرنَکشین پادینک ئیے اَت۔ پہ ھورت چارت و صدیق آزات ءِ پِربند ئیے لہتین بندانی تْرانگا کپتون:۔ ”
زندءِ اے دْراجیں دیگر ءَ
شَہم ایت زَھیرانی گــِرو ک
مــھکان ئیے زَرّین ھَـــــیال ـــــــ
دْرپش ایت چـــــو ماہ ءَ چاردھی
گـــیمرتگیں ســــــاہ ءَ منی
”پیـــــــراں دوبــر وَرنـــاء باں
دِلون جیڑ اِت ۔۔۔۔ چو بیت آئیا ھم انچیں پادینک ۓ دیستگ ءُ اے لچہ ئی پر بستگ ؟ بلکن آ ھم چہ منا پیسرگون انچین جاوران دُچار کپتگ۔ ۔۔۔ بازین پِگر و سَسّایا رَند زَرّئین پادینک ئے تاء پَلگارت و کیسگا کت کہ بِگندئے راھا ایشئیے ھدابُند دیست۔
من دیما روان اِتان، بلوچ گلزمین ءِ شہشنابین ڈنّ و ملگزارئین کوچگ، سرْمگین کوہ و ڈَلپادئین پَرگِنگانی دُرّئیں دْروشم گْوشئے دِلا نوکین ھُلّ و مَزنشہارین واہگ سئوگات کنگا اِتنت۔
ہمے دمانءَ ھور ءِ شنزگ بند بوت بلے گوات انگت کشَگ ءَ ات۔ گْواتا یک آزمان رنگیں نیلین گشانے بال دَیان آئورت و منی دیم ءَ دئور دات۔ گْوشئے یک نیکین آزمانی ملائکت ئیا منا امبازاں ذُرت . . .من گون وتی راستی دست ءَ گشان چہ وتی دیما دور کت ء دست ءَ کت. . .گشان ءِ یک لَمب ئے کمے نمب ات. . .بلے تر نہ ات. . .نہ گشۓ ھور ءِ سرا بوتگ اَت۔ گْوشئے زانان کسئیا گْریتگ اَت و چَمّانی ارس پَہک کتگ اِتنت. . .
من ھیران بوت ءُ جیڑگ ءَ لگت اتاں، باریں اے کئے انت کہ گُشان ئے گْواتا گون اِنت ۔ نون من مولد ءِ ریک ءِ سئیل ءِ ارادہ بَدل کت وگُشان ءِ بانُک ءِ شوھاز ءِ نیّت بَست . بلے نزانت کہ کجا و چتئور گشان ءِ بانُکان بِگندان۔. . . روان بیتان . . . گوات لہم لہما شیک وران اَت۔
گْوشنت کہ ھورانی وہدا مولد ءِ ریک ڈولدار بیت، بلئے پہ منی چمان گْوشئے چو بانوری سَمبہتگ اَت۔
مولد ءِ ریک و گُشان ءِ بانُک ءِ پِگرانی زِرا اوژناگ اِتان کہ یک اناگہ ھسکارگ ئیے توارئیا منا پَچلرزینت۔ کسئے گریوگا اَت۔ کمئے ترسگا اِتاں کہ بارین کے انت گریوگا اِنت۔ پادان گِران نِزّیکا شُتان ۔۔۔۔ جِنک ئے دیست کہ سر ئی کونڈان اَت گریوگا اَت۔
من پہ تُرس و لَرز جُست کت:
’’ تو کئے، ادا چیا نِشتگے ‘‘ ؟
ہمےسَہتا نیل رَنگین گُشان و نُگرہ ئین پادینک ءِ تْرانگا کپتان۔ چہ آئیے نیمگا پَسّئو ءِ اِشکنگا پیسر پدا جُست کت:
’’ اے پادینک تئگیں‘‘ ؟ آئیے دیما نِشت و چہ وتی کیسگ ءَ گوں لرزوکیں دَستاں پادینک دَرکت وآئیے دیما ایر کت. . .
آ ھیسکارگ ءَ ات. . .
من پدا جُست کت: ’’اے گشان تئیگ اِنت‘‘
بلئے آ ئیا منا ہچ پَسّئونہ دات۔ سیمی رَندا من گون آئیا تْران کت و پہ آئی ءِ پَسّئو ءَ ودارکت۔ . . ساھتۓ ءَ پد اڑسکگے جتے ءُ سے کُچکے منی دیما دور دات ھر کُچکے سرا منی نام نبشتگ ات۔۔۔۔۔۔۔ من زوت زوت آھی ءِ سر چست کت و چارت ، چہ آئیے گِندگا من گڑاتاں. . .منی دیما مَنی مِھرانی بندیگ مہنو اَت کہ من پانزدہ سال ساری دروھتگ ات۔
ھلاس بوت ۔۔۔۔۔۔. . .
