Author Topic: وابـیـں آگـاهــی  (Read 1845 times)

0 Members and 1 Guest are viewing this topic.

Offline Adabi Hakim ادبی ھکیم

  • Balochi Zaantkaar
  • ***
  • Posts: 1183
  • Karma: 44
وابـیـں آگـاهــی
« on: August 28, 2013, 04:04:03 PM »
وابـیـں آگـاهــی
ادبی هکـیـم
----------------------------------------------------------------------
مَـن لـوٹ اِت چـیـزّے بـہ نُـبـیـسّ اوں ، پـریـاتے بـہ کـن اوں ، کـوکّـارے بـہ کـن اوں ، وَتـی هـالءِ سـرا بـہ کـنـداوں ، وتـی هـالءِ سَـرا بـہ گـریـواوں ، هَـر چـا کـہ دل اوں زور پـر دات دلءَ چـہ اے گـپـاں یکّے نـہ مَـنّ اِت ، آئـیءَ چـہ اے گـپـاں یکّے مَـیـل نہ بـوُت ، مـن چـو گـُـشے واب گـیـنَـگ اَت اوں بـہ زاں نَے واب ءُ نَے آگـاه اَت اوں ، پَــدا دل اوں زور پـر دات کـہ پـاد آیـاں بـلے پـاد آتـک اوں نـہ کـرت ، چَـمّ اوں چُـپـت کـرت اَنـت کـہ واب بـہ کـپ اوں بـلے واب نـہ کـپـت اوں ، دسـت اوں چـسـت کـرت اَنـت کـہ وَتءَ بـہ چـونـڈاوں بـلے لَـنـکُـکـاں نـہ مَـنّ اِت ، پـاد اوں زور پـر دات اَنـت کـہ چـہ ادا بـہ مـوکـلّ اَنـت بـلے پـاد چـسـت نـہ بـوُت اَنـت ، شـوُمّـیـں سَـر اوں ٹـپّ اِت کـہ هـوش بـہ کـنـت مـنءَ چـون اِنـت بـلے سَـر گـوں نے اَت سَـرءِ هـوش گـم اَت ، لاپ اوں ٹـپّ اِت بـلـکـیـں شُـدءَ گـپـتَگ بـلے لاپ سـیـراَت هـچّ تَـپےءَ نـہ گـپـتَـگ اَت ، دَپ اوں پَـچ کـرت کـہ کـوکّـار بـہ کـنـت مـردُمے پـہ مـنـی مـدَتءَ بے اَیـت بـلے زبـان مـاں دپءَ هُـشک اَت ، مـنـی چَـمّ پـچ اِت اَنـت بـلے روک اِش مـان نـیـسـت اَت ، نـوں دل شُـبـیـنَـگءَ شُـت ، واب گـنـدَگ اوں کـہ مَـن چَـہ بُـرزءُ بـالادیـں کـوهےءَ لـیـٹ گـرگءَ اوں ، وَتءَ اے نـیـمَـگءُ آ نـیـمَـگءَ دارَگءِ جُـهـدءَ کـنَـگءَاوں بـلے دَسـت گِـرءُ پـاد گِـرءِ جـاهے دَر نـہ کـپـت آسـرا مـن چـہ کـوهءَ مـاں کـَورےءَ کـپـت اوں کـَـورءَ هـار کـُـرتَـگ اَت ، هَـیـال کـپـت اوں کـہ کـَورءِ آسـر مـاں زرءَاِنـت زرءِ تـهـا اوژنـاگ جَـنَـگءُ درکـپَـگ مـنـی کـارے نَے اِنـت اَچـا جُـهــد بـہ کـن اوں کـہ وَتءَ چَـہ کـَـورءِ تـوُپـاں بـہ کـشّ اوں کـہ اودا زرءِ مـاهـیـگـانـی شـام ءُ لاپ مـہ بـاں ، بـلے نـوں کے اِنـت کـہ مـنـی دسـتءَ گـرایـت ءُ چـہ اے زَهـرکـنـیـں تـوُپّـانءَ کـشّ ایـت ، مـن وَتـی دَسـتـاں آپءِ سـرا جَـن اوں کـہ پـہ مَـن بـزّگ بـہ کـنـت مـنءَ یک کِـرّےءَ دَور بـہ دَنـت بـلے آپ گـوں وَتـی تـرُنـدیـں رَواجءَ رَوَگءَاِنـت وَتـی چَـولانءَ مَـسـت کـنَـگءَاِنـت مـنءَ چـولانـی سـرا چـسـتءُ ایـر کـنَـگءَاِنـت ، مـن کـَـورءِ کـَـشءِ درَچـکـانـی لَـمـبّ ءُ شـاهَـڈاں گـرَگءَاوں کـہ وَتءَ چَـہ آپءَ بـہ کـَـشّ اوں بـلے درچـکـانـی لَـمـبّ ءُ شـاهـڈ پـرُش اَنـت مـن پـدا مـاں آپءَ کـپ اوں ، مَـنءَ اوماں بَـیَـگءَاِنـت کـہ هـمے درَچـک هَـم پـہ مـنـی دَرآیَـگءَ رزا نے اَنـت آ مـنءَ وَتـی دُژمـنءُ بَــدواه زانَـگءَاَنـت مـنـی مَـرگءِ لـوٹـوک اَنـت ، تـوُپّـانءِ کـلـِشـتـیـں آپ مـاں مَـنـی دَپءَ رَوَگءَاِنـت لـوٹ اوں کـہ کـُـواک بـہ کـن اوں دَپءِ آپـاں بـہ کـَـشّ اوں تـوُپـان مـنـی دَپءَ پَـتّـار مـاں ریـچَـگءَاِنـت مـنـی اَرواهءَ تـوسـیـنَـگءَاِنـت ، نـوں دَسـتءُ پـاد چـہ سُـرَگءَ دَم بُـرتَـگ ، چَـمّ سُـهــر تـرّاِتـگ ءُ بے روک اَنـت ، سـاه رَوَگءُ آیَـگ اِنـت ، اُمـیـت چـہ زنـدءِ رَکّـگءَ شُـتَـگ ، اودءَ مـن زَهـرکـنـیـں تـوُپـانءِ چَـولانـی سَـرا کـَـپءُ لـیـٹ اَت اوں ادا مـن وَتـی نـرمـیـں گـَـنـدَلءِ سـرا وَپـتَـگ اوں بـلے دَنـیـگـا مـن پـاد آیَـگءِ جُـهــدءَ کـنَـگءَاوں کـہ وَتءَ چَـہ وَپـتَـگـیـں وابءَ آگـاه بـہ کـن اوں ، دریـگـتے اَت کـہ اے وابے بـہ بـوُتـیـں اے مـنـی آگـاهـی اِنـت کـہ چـو واب اِنـت ، مـن مُـدام هَـنچُـش واب اوں ، چَـہ روچے کـہ مَـنـی چَـمّ مـاں اے دُنـیـاءَ پَـچ بـوُتَـگ اَنـت تـاں مـروچـی مـنـی هـال هَـمـیـش اِنـت ، تـبـیـبءَ شـتَـگ اوں کـہ بـچـارایـت مـنءَ چـون اِنـت مـنـی الاجءَ بـہ کـنـت بـلے تـبـیـب گـوَش اَنـت کـہ تـو نـادراه نہ اَے ، مُـلاّهـانـی گـورا شـتَـگ اوں آ گـوَش اَنـت تـو گـنـوک نـہ اَے ، نـہ زان اوں کـہ مـنءَ چـون اِنـت ، بَـرے مـن وَتءَ شـرّیـں مَـردُمـے گـنـداوں ، بـرے وَتءهَـنچـیـں گـنـوکے گـنـداوں کـہ چـہ وَتـی چـارَگءَ مـنءَ وَتءَ تُـرسے مـاں جـانءَ کـپ ایـت ، وَتـی جـانءَ پـرنـچّ اوں کـہ وَتـی دردءَ درگـپـت بـہ کـن اوں بـلے مـنـی جـان درد نـہ کـنـت ، وَتـی سـرَگءَ ٹـپّ اوں کـہ بـلـکـیـں گـنـوک اِنـت بـلے سَـرَگ چـو ڈهــلءَ تـوار کـنـت کـہ مـنءَ هـچ نے اِنت.
نـوں مـن چَـہ وَپـتَـگـیـں وابءَ آگـاه بـیَـگ اوں بـلے دَنـیـگـا تـنـسـاراوں سـرءِ هـوش آیَـگ اِنـت بـلے سَـرءِ مـازَگ یـکـجـاهءَ مُـچّ نے اَنـت هَـمُـک کـسءَ وَتـی دژمـن زانَـگ اَنـت ، زبـان تـرکـگ اِنـت ، چَـمّ پـچ بـیَـگ اَنـت بـلے هَـمُـک کـسءَ وَتـی بَـدواه گـنـدَگ اَنـت ، دل اُهـپارَگ کـشّگ اِنـت هِـمّـتءُ گـیـرَت یـکـپـارُگـی جـاه جَـنَـگ اَنـت ، اَنـاگـاه چـہ وابءَ پـاداتـک اوں اے گـوَرءُ آ گـوَرءَ تَـتـک اوں ، چـو کـوریـں زوُمے وَتـی کـشءُ گـوَرءِ هَـمُـک کـس اوں ڈنـگ جَـت اَنـت ، وَتـی چـاگـردءِ هَـمُـک چـیـزّاوں جَـت ءُ پـروشـت اَنـت ، هـمے هَـیـالءَ اَت اوں کـہ مـن گـوں وَتـی دژمـنـاں جَـنگءَ اوں ، هَـمے هَـیـالءَ اَت اوں کـہ نـوں مـن وَتـی درُهـیـں دژمـن کـشـت اَنـت ، بـلـوچـڈیـہ اوں چـہ بَـداں سَـپـا کـرت ، مـن چـہ هـر بـلـوچےءَ ڈڈتـر بـوُت اوں ، چـہ درُهـیـں راجءَ مـن گـیـشـتـر کـار کـرت ، نـوں مـنـی راج مـنءَ دادے دَنـت ، مـنـی کـَـدرءَ زانـت ، مـنءَ وَتـی رَهــدَربَـر کـنـت ، وَشّ رَنگـیـں کـاڑ مـنءَ نـازیـن اَنـت ، پـرچـا کـہ مـن نـوروزخـان ءُ دادشـاهءِ نـام نـوک کـُـرت اَنـت ، دَنـیـگـا کـسےءَ مـنـی وڑءَ جَـنگ نـہ کـرتَـگ ، رَنـدا وَهـدے کـہ مـن دَم بُـرت نـوں وَتـی دسـت اوں داشـت اَنـت پَـہ وَتـی کـارپَـدانـی چـارَگءَ بے کـرار بـوُت اوں ، چـاراں تـاں چَـہ مـنـی دَسـتءِ سـگارءَ هـون چـکـگ اِنـت ، مـنـی گـُـد چـہ هـونـاں مـیـن اَنـت ، جَـنـگءِ مَـیـدان بے تـرپّ ءُ تـواراِنـت ، نـوں مـنـی سـرءِ هـوش آیَـگ اِنـت ، گـوش پـہ اِشـکُـنَـگءَ تِـجـان اَنـت ، وَتـی دلءِ سـٹـگـانـی تـوارءَ اِشکُـنـگ اوں ، بـلے زارءُ مـوتـک ءِ تـواراِنـت ، وَت اوں جُـسـت کـُـت اے کے اَنـت ءُ پـہ کےءَ زار جَـنَـگءَ اَنـت ، مـن گـلءَ بـال اوں کـہ مـن وَتـی دژمـن کـشـتَـگ اَنـت بـلے وَهـدے کـہ مـنـی چَـمّـانـی مَـیـم روژنـا بـوُت اَنـت ، چـاراِت اوں تـاں اوه پَـہ مـنـی سَـر بـہ بـات مَـن پـہ وَتءَ کـس نَے اِشـتَـگ مـن وَتـی دوُدمـاں تـبـاه کـرتَـگ مـن وَتـی سَـرجَـمـیـں بـرات کـشـتَـگ اَنـت ، آه پـہ مـن بـہ بـات !!!.. مـن چے کـارے کـرتَگ ؟.. مَـن گـوں وَتـی مُـلکءِ دژمـنـاں جَـنگءَاَت اوں مـنـی بـرات چَـہ کـجـا آتک اَنـت؟ مـن چـونـیـں کـارے کـرت ؟ مـن پـرچـا وَتـی بـرات کـشـت اَنـت ؟ نـوں زارءِ تـوار نـزّیـکءَ آیَـگءَ اَنـت ، سـگـار چَـہ مـنـی دسـتءَ کـپـت دل جَکـس اِت ءُ آگـاه بـوُت ، سـاریـں هـوشءَ واتَـرّ کـرت ، چـاراں تـاں مـهـلـوُکءِ مُـچّـی اِنـت ، درُهـا مـنءَ روک روکءَ چـارَگءَ اَنـت ، بـاوَراِش نـہ بـیـت کـہ مـن اے کـارءَ کـرتَـگ ، درُهـا زان اَنـت کـہ اے مـنـی بـرات بـوُتـگ اَنـت ، ایـشـاں مـنءَ بـراتـی ءِ مهـر داتَـگ وَتـی بـوُنـڈک اِش مـنءَ پـر داتَـگ کـہ مـنـی جـانءَ سـارتـی مـہ جَـنـت ، مـروچـی مـن بے گـنـاه ءُ مَـیـارےءَ آیـانی پـاکـیـں ارواه سـسـت اَنـت ، بـلکـیـں آیـانءَ مـنـی دسـتءِ دارَگءَ جُـهـد کـرتَـگ کـہ مـا تـئـی بـرات ایـں تـئـی وَتـی جـان ایـں ، مـارا مـہ کـش کـہ مـا تـئـی ازّتءِ شـلـوارایـں ، بـلے آ وَهـدءَ مـن وابءُ بے هـوش بـوُتَـگ اوں ، چـو مَـسـتـیـں لـیـڈهے کـَـرّ ءُ گـنـوک بـوتَگ اوں ، بـراتـانـی سَـراں وتـی زانءِ سـرا ایـر کـنـاں آیـانءَ گـوَشـاں کـہ مـن شـمـارا نـہ کـشـتَـگ ، مـنـی وابـیـں آگـاهیءَ شـمـارا کـشـتَـگ ، بـلے آ هـچّ نـہ گـوَش اَنـت نـوں وَ مُـرتَگ اَنـت ، آه ، نـوں مـن چـوں بـہ کـن اوں؟ کـجـا بـہ رَواوں ؟ گـلـزمـیـن مـنءَ نـہ زورایـت ، کـوه مـنءَ لـیـٹ نـہ دے اَنـت ، آپ مـنءَ بُکّ نـہ دَنـت ، نـیـلّـیـں آزمان مـنـی سـرا نـہ کـپ ایـت ، آه اِنـت کـہ مـنـی مـات پـیـداک اِنـت ، نـوں آ وَتـی پَـنـچّـاں مـنـی سـرءَ جَـنـت ، مـن وَتـی بـرات هَـم کـشـت اَنـت پَـنـچّ اوں هَـم سَـرءَ بـوُت اَنـت ، نـوں مـن وَتـی مـاتءَ چـوں سـرپَــد بـہ کـن اوں کـہ مَـن اے کـار مـاں وَتـی وابءَ کـرتَـگ اَنـت ، مـات وَتـی هَـکّـاں مـنـی سـرءَ لَـڈگءَ اِنـت آ گـوَشگءَ اِنـت کـہ مـن وَتـی شـیـر سـیَـهـمـارےءَ بـہ داتـیـن اَنـت شـرّ تـراَت پـرچـا کـہ سـیَـهـمـارءَ مـروچـی مـنـی سـرجَـمـیـں بـچّ چـو ڈنـگ نـہ جَـتَـگ اِت اَنـت ، مـنـی بـراتـانـی زال وَتـی سـالـونکـیـں جـودانـی سـَروُنّـاں نـشـتَـگءُ زار جـنَـگءَاَنـت ، مـنـی گـُـهـار وَتـی وَرنـائـیـں بـراتـانـی دَسـت پـہ وَتـی دلاں داشـتَـگ ءُ زار جَـنَـگءَاَنـت ، مـنـی مـات تُـسـتَـگءُ کـپـتَـگ ، آه ، مـن پـرچـا چـو کـرت ؟ مـن وَ واب اَت اوں ، کےءَ مـنءَ چَـہ وَپـتَـگـیـں وابءَ پـاد کـرت ؟ شـرّتراَت کـہ مـن وپـتَـگ اِت اوں ، مـنءَ هَـمـا تـوُپـانءَ مـاں زرءَ چگـل بـہ داتـیـں ، پـرچـا مـن مُـدام واب اوں ؟ پـرچـا وَهــدے کـہ مـن چـہ وابءَ پـاد کـایـوں وَتـی بـراتـانءَ کـش اوں ؟ پـرچـا مُـدام مـنـی هـال هـمـش اِنـت ؟ مـن کے اوں ؟ مـن چـہ کـجـا آتـکـگ اوں ؟ پـرچـا مـنءَ سُـدّ نـیـسـت ؟ زیکّـیـں روچءَ مـن کـجـا بـوُتـگ اوں ؟ مـروچـی مـن کـجـا رَوَگءَاوں ؟ مـنـی مـنـزل کـجـا اِنـت ؟ مـن مـاں هَـمے هَـیـالءَ اَت اوں کـہ زوراکءِ لـشـکـر آتـک اَنـت ، لـشکـرءِ مَـسـتـرءَ گـوَشـت اے گـنـوکءَ تـیـر بـہ کـن اِت ، ایـشـیءَ کـہ پـہ وَتـی بـراتـاں وَپـا نـہ بـوُتـَگ دگے کـس پـہ ایـشـیءَ اوپـار مَـہ کـنـت ، مـن اِش تـیـر کـرت ، مـن اِش کـشـت ، بـلے مـن شـهـمـیـر نـہ بـوُت اوں ، رُزوائـىءِ مـرگءَ مُـرت اوں ، مَـن پَــدا مُـرت اوں ، بـلے دَنـیـگـا زنـدَگ اوں ، دَنـیـگـا وَتءَ جُـسـت کـنَـگءَ اوں کـہ بـاریـں مـن واب اوں یـاں آگـاه اوں ، مـنـی اَرواه مـاں زُمـیـنءُ آزمـانءِ دَرمـیـانءَ تُـرّ وَرَگءَاِنـت پـرچـا کـہ مـنـی دلءَ آجـوئـی لـوٹـتـگ اَت كـہ آ مـنءَ مـاں اے زنـدءَ نـہ رَس اِت ، پـرچـا کـہ مـن واب اَت اوں ، نـوں آزمـان رزا نـہ اِنـت کـہ مـنـی اَرواهءَ بُـرزا جـاگـہ بہ دَنـت ، پـرچـا کـہ مـن دَنـیگـا وَتـی پَـرز مـاں گـلـزمـیـنءِ سـرا پـورَه نـہ کـرتَـگ ، گـلـزُمـیـنءِ سـرا هَـم مـنءَ نـنـدَگءِ هـکّ نـیـسـت پَـرچـا کـہ مـن مـاں وَتـی زنـد گـلـزمـیـنءِ کــدر نہ زانـتَـگ ، نـوں مـنـی اَرواه زُمـیـن ءُ آزمـانءِ درمـیـانءَ لـونـج اِنـت ، دُنـیـاءِ درُهـیـں آجـوئـیـں مُـلکـاں چـہ بُـرزا گـنـدَگءَ اوں ، آجـوئـیـں مُـلکـانـی مَـردُم گـلءُ شـاد اَنـت ، وَتـی جـانـاں پـہ وَتـی مُـلکـاں کـولـیـگ کـنَگءَاَنـت ، کـسے چـو مـنـی وڑءَ چـہ مـرگءَ تُـرسَگ نے اِنـت ، کـسے چـہ زوراکـاں تُـرسَگءَ نے اِنـت ، درُهـا نـشـتَـگءُ وتـی ڈیـهـاں نـازیـنَگءَاَنـت ، وتـی ڈیـہ اِش چـو بـانـوراں سَـمـبَـهـیـنـتـگ اَنـت ، هـاوَنـد چـہ آیـاں رَزا اِنـت کـہ آئـیءِ مُـرواردیـں گـلـزُمـیـن اِش وَتـی مـات کـرتَگ ءُ آئـیءِ دامُـنءِ سـرا لَـیـبءُ گـوازی کـنَگءَاَنـت ، گـلءُ شـاد اَنـت ، هَـمُک کـَـسءَ وَتـی کـَـس هَـمـبـاز کـرتَگ اَنـت ، مات وَشّ ءُ وَشـهـال اَنـت ، گـُـهـار وَتـی بـراتـاں نـازیـنَـگءَاَنـت ، زال سـیـنگـارتـگءُ بـانـوراَنـت ، بـلے دَنـیـگـا مـنـی بـلـوچـڈیـہ هَـمـا وَڑءَ واراِنـت ، مـات پـہ وَتـی چُکّـاں سـوُگـی اَنـت ، بـرات بـراتـانـی پـرسّ داشتَـگ اَنـت ، زال جَـنـوزام اَنـت ، چُـکّ چـورَه اَنـت ، گـُـهـار زار جَـنَـگءُ مـوتـک کارَگ اَنـت ، رَهـدَربَـرءُ مُـلاّ پـہ ٹـگی ءُ ٹـوری گـلائـیـش اَنـت ، اَدیـبءُ نـدکـار تُـرسَگءَاَنـت ، زانـتـکـارانـی دَپـاں مـولـو جَـتَـگ ، وَرنـا سـیـاهءُ اسـپـیـتـیـں دَوا کـشـتَـگ ءُ مُـرداراَنـت ، بـلـوچـڈیـہ پُـرسـیـگ اِنـت ، کـوه هُـشک اَنـت ، دوُر سَـریـں کــَور بے آپ اَنـت ، ڈگـاراں سـورَگ گِـپـتَـگ ، درُهـیـں رَسـتَـر تـچَـگءُ روَگءَاَنـت ، زِر گــنـوک اِنـت ، مـاهـیـگ مَـزَن هـورءَ رَوَگ ءَاَنـت ، نـاتـُپـاکـیءَ مـنـی راجءِ دسـت بـسـتَـگ اَنـت ، پـاد زوراکـاں اشـکـیـل کـرتَگ اَنـت ، زوراک چـو مـدَگءَ سُـرَگءَ اَنـت ، مـنـی راج گـنـوک اِنـت ، وَت سـرا کـنـدیـت ، وَت سـرا گـراِیـت ، نہ زانـت کـہ چے بـہ کـنـت ، دوسـتءَ وَتـی دژمـن زانَگءَ اِنـت ، دژمـنءَ وَتـی دوسـت زانَگ ءَاِنـت ، تُـرسَگءَ اِنـت ، چہ گـیـبـیـں مَـرگءَ تـرسَگءَ اِنـت ، چہ بـازیـں تُـرسءَ واب اِنـت ، پـہ هـمے اُمـیـتءَ نـشـتَـگ کہ هـاوَنـدءِ پـریـشـتَـگ بـیـا اَنـت آئـیءِ دژمـنـاں گـار بہ کـن اَنـت آئـیءِ ڈیـہءَ آبـاد بہ کـن اَنـت رَنـدا آرا چَـہ وَپـتَـگـیـں وابءَ پـاد بہ کـن اَنـت ، مـروچـی روچ چے اِنـت ؟ کـجـام مـاه اِنـت ؟ وَهـدءِ چُـنـتُـمـی سـال اِنـت ؟ کـجـام دَهـراِنـت ؟ نـہ زان اوں ، مـن وَ مُـرتَـگ اوں ، مـنءَ گـوں هـاوَنـدءِ مـاهءُ روچـاں چے کـاراِنـت ، مـنءَ چـہ سـالءُ دَهـراں چے ازکـاراِنـت ، اے پـہ زنـدَگـیـں راجـاں جـواں بـوُتَـگ اَنـت ، مـن پـرچـا مـاں اے دُنـیـاءَ آتـکگ اوں ؟ ماں اے دُنـیـاءَ مـنـی آیَـگءِ سَـوَب چے اِنـت ؟ مـن کے اوں ؟ آهـاں !!!.. نـوں مـن هَـیـال کـپـت اوں ، مَـن ادَبـی هَـکـیـم اوں ، مـن بـلـوچی زبـانءِ نـدکـارےاوں ، مـن گـُـلائـیـش اَت اوں کـہ چـیـزّے پـہ وَتـی راجءَ بـہ نُـبـیـسّ اوں ، وَتـی راجءَ سـرپَـدی بہ دے اوں بـلے واب کـپـت اوں ، بـلے مـن پـہ کےءَ بـہ نُـبـیـسّ اوں ؟ مـنـی راجءَ وَ دیـراِنـت کـہ مُـرتَـگ ءُ بـار گـپـتَـگ ، مـا ادیـب ءُ نـدکـاراں گـنـوکـیـں وَت سَـرا نُـبـیـسّ ایـں ، پَـدا وَت اِش وانـیـں پَـدا پـہ وَتـی نُبشتانکانی سـرءَ کـنـدایـں رَنـدا وَتـی سرءَ گـریـوایـں ، اے گـپءَ هـم زانـیـں کـہ لَـهـتے چـہ مـئے وَتـی مَـهـلـوُک گـوں دژمـنـاں مـئے سـوداءَ پـہ تـرَمـپے نَـپـت ءُ بـاکـسءِ ڈیـلّے جَـنَگءَاِنـت.
(((((( آسَــــــر ))))))
[/b]