Author Topic: زاهدكريم رئيسى ءِ آزمانک.....كـِتابى اِيں پوشاك  (Read 1014 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7058
  • Karma: 356
    • Baask-Home of Baluchi Language, Literature & Culture
آزمانك.....كـِتابى اِيں پوشاك
زاهدكريم رئيسى
آ اوں وهدے اَت كہ واجہ ءِ پت دبئى ءَ شرّيں كارے ءِ سرا الكاپيں مـُژده"تنخواهے" گـِرگ ءَ اَت-اِدا واجہ اِيں چـُك ءِ شاه هرچى آنى در ور هم نہ گواه اِت-ريمب ءِ مان چـِنگ ءِ واستہ گرم ءُ تازگيں وراكى، لـُدّهيں بالاد ءِ رژناك كنـَگ ءِ هاتر ءَ نوك ءُ پتـّاكيں پوشاك، راڈو گهڑى, چشمك ءُ چـَوٹ، پہ سوارى نوك ءُ تركـّوكيں ايرانى هـُنڈايے ءُ لـِپـّڑ جنگ ءِ واستہ بےدرد ءُ نشہ آماچيں سنگت! چـُك پت ءِ زرّاں انچوش كـُتگ اَت كہ كـس هم پجـّا نياؤرتے-واجہ اِيں چـُك ءَ ماں مكتباں وانـَگ اوں در برتگ اَت بلے پہ دُزى ءُ نكل! پمشكا مرچى آ (ب) ءَ وا زانت بلے (الف) ءَ پـَجـّا نياريت، مثل ءِ دلوت! ہما دار ءِ هساب كہ گـِندگ ءَ سلامتيں بلے توك ءِ "سٹـِنگ" رميزاں هراب كـُتگ-چہ پت ءِ زرّاں واجہ ءَ سور اوں كـُتگ اَت، الله ءَ دو گونڈيں زهگ هم داتگ اَت- بلے مات ءُ پت ءِ بے دروريں مہراں چہ چـُك ساواتى ءِ سيمسراں ہما ديم سر اَت-ذرّانى بازى ءَ پت ءَ اے نہ مار اِتگ اَت كہ چـُك ءَ آؤكيں وهدے است ءُ آئى ءَ پت ءِ پنت ءُ رهبرى ءِ گيش ءَ چہ گيش زلورتيں، نہ كہ مات ءَ وتى مہرانى گرنچ كمے كمتر بست كہ لوگ واجہ ءِ ساڑى نہ بوهگ ءِ وهد ءَ چـُك ءِ رهبرى كنـَگ ءَ مات ءُ پت دوہينانى هك ءَ پيلو بہ كنت-بلے سد كـُہتيگ كہ آہاں اے گپ ہچ نہ مار اِت ءُ چـُك چو باكلينك پـُلـّيں اشتر ءِ پئيم مست اَت-
مرچى ہما پـِت اَت كہ مـُدّتے بوتگ اِتے چہ دبئى ءَ كينسل اَت ءُ دهكاں كارى كنـَگ ءَ اَت، هيلت ءُ بلا چـُك ءُ نـُماسگ آنى لاپ ءُ پسانى شام ءَ در گيجگ ءَ اَت-اے امر"عمر" مــَچ ءِ سر كپگ ءُ كاه ءِ بڈا كنـَگ ءِ نہ اَت، بلے پت مجبورى ءَ گور جتگ اَت كہ چـُك لاپ لوٹ اَنت-درملك ءِ كـٹ ءُ كمائى بے سماهيں چـُك ءَ وتى هرجاں جت-باهد و هميش اَت كہ پت ءِ كپگ ءَ رند اے برى آشوب چـُك ءَ بہ آؤرتيں-بلے آئى ءِ زانت ءِ دام مشكاں چـِتئگ اَت-نوں آئى ءَ تـُرس اِت كہ كتابى اِيں پوشاك هاك ءَ سل مہ بنت، نوں آئى ءَ لجے وتى سرا پانـَگ كـُتگ اَت كہ لـِچ كارى ءُ دهكاں كارى بہ كناں سنگت كـلاگ زور اَنت- ءُ كـُرشى ءِ سرا اوں كس ءَ نہ نادينت كہ وانگ ءِ ساہت ءَ مكتب ءِ پشت ءَ نشت گوں سنگتاں مـُشوك ئے دپ كـُت-پشت كپتگيں كار اول ايش اَت كہ مـِسترى شمبے ءِ كـِرّا تگارى بہ كش اِتيں، وگہ نہ كور ءَ دارے پروشت ءُ بہا كتيں، يا وا پت ءِ وڑا دهكاں كار ے بوتيں! اے كار ائيب نہ اَنت، بلے واجہ ءَ دركسانى واجہى كـُت نوں آئى ءَ مڑاهے ماں سرا پانگ اَت-
گـُشنت: دز ءِ مات داں چـُنت ءَ پيگ پچ كنت-مہ كں مہ كں يك روچے واجہ ءِ پت ءَ اے كودكيں دنيا يل دات ءُ هـُدا مـُرزى بوت-پت ءِ وپاتى ءَ رند وهدے ذمہ واريانى آيات يك يك ءَ واجہ ءِ سرا نازل بوهان بوتنت، گـُڑا كتابى اِيں پوشاكانى اِسترى اوں پرُشت-
(هلاس)
12/04/2013
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line