Author Topic: بلوچی ءِ آزات لچّہ ءُ اے سہیں ورنا  (Read 3549 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7062
  • Karma: 356
    • Baask-Home of Baluchi Language, Literature & Culture
بلوچی ءِ آزات لچّہ ءُ اے سہیں ورنا
« on: January 30, 2015, 09:17:14 PM »
گوں کاروان بلوچ ءِ منہ واری ءَ


بلوچی ءِ آزات لچّہ ءَ اے سہیں ورناہاں توانائیں ساچشتی تبے بکشاتگ. چریشانی لچّہاں چہ زانگ بیت اے وتی زبان ءَ چہ ابید ایندگہ زبانانی ساچشتاں اوں واننت ءُ اے اوں سرپد بنت ساچشت ءِ مزنی ءُ بستار چی ءَ گوشنت. چوناہا سہیں یکّیں زمانگ ءِ مردم انت. امبر سمین کمے پیش ءُ مجیب ءُ آصف شفیق رند اَنت. سہیں جتائیں شاعر اَنت. یک چیزے سہینانی تہ ءَ ھست گوناپ کشی{امیج سازی} ءُ وت جیڑگی اوں اشانی یک اَنت،
امبر سمین ءِ گورا کوھن ءُ نوک ءِ دوئیں تب گندگ ءَ کاینت. برے آ ایوک انچیں زبانے ءَ شعر گوشیت کہ چد ءُ پیش مئے شاعری ءِ تہ ءَ کارمرز نہ بوتگ.
ما چو سیاہ ءُ بزیں جمبر ءَ
آسمان ءِ دیم ءَ
گوارگ ءِ ودار ءَ نشتگیں
چو کہ اوشتوک انت کارست
باسکوپی مرد ءِ سر ءُ سوجی
ھکم ءِ پدا
قصہ دیما جنزان اِنت

برے برے آ وت ءَ بارت گوں وتی کوھنیں شاعری ءَ گوں بندوک کنت کہ آئی ءِ بولی گوں عطا ءَ نزیک بیت، بلے آئی ءِ گوناپ کشی ءُ ندارگ جُتا آئی ءِ وتیگ اَنت.
من زاناں تو درچک ءِ میار جلّی ءَ
وتی نگاھ شموشت اَنت
ءُ دل انگراں پتاتگ ءُ راہ گپتگ ئے
مئے میانجین ءَ زمانگ ءِ قہر زرے
دل مست اَت
بلے تو بزان
شہشنابیں بوجیگاں شکست وارتگ
ءُ آمگیں جالگاں کٹ اِتگ زر ءِ جنگ

امبر سمین وتی لچّہانی تہ ءَ نوکیں چہر ءُ شبین اوں باز کارمرز کنت بلکیں ھمے گمان بیت کہ آ ہر وھد نوک گوشگ ءِ جہد ءَ کنت.
مجیب مجاہد ءِ لچّہانی تہا بلوچی رنگ ءُ عہدی کسّہاں چہ نوکیں معنا کشّگ ءِ تب گیشتر اِنت.
دتکیں سبز سپوران
یک سبز ءُ دو مرورد
چو اندیمیں گناہ ءَ
منی پالیگ ءِ امانت
اے سال پرا سال
چو ویرانگ ءِ تن ءَ
چو عمر ءِ دغا بازیں
شیطان ءِ سرون ءَ

یا کہ اے لچہ
گشنت، من
سر تہ سر آپ ءِ تہایاں
بلے انگت منی ران ءِ تہا
ہڑ ءِ چڑکہ
زمین ءِ ساہن ءَ
بے وانکی ءِ شیزارگاں بُرّیت
منی واب ءِ حرامیں
سنگتی ءِ واھگاں بُرّیت

مجیب ھم نوکیں لبز سازی کنت چو کہ " زمین ءِ ساہن ءَ " " بے وانکی ءِ شیزارگ " اے نوکیں لچہ کارانی لبز سازی سرجم ءَ گوناپ کشی ءَ دیم ءَ کاینت کہ اچ اشاں دنیا ءِ اندری درد ءُ ڈوھ چو عکس ءَ دیم ءَ کاینت اوشتنت.
آصف شفیق اوں وتی جتائیں کشکے رندگ ءِ جہد ءَ اِنت. اشی ءِ گورا اگاں چہ لبز سازی ءِ چوشیں جہدے گندگ ءَ نئیت بلے سرجمیں لچہ عکس کاری ءِ جوانیں نمونگے بیت ءُ وانوکاں ہر دمک، دریا، یا ساعتانی سیل ءَ کنائینیت.
ما دریا پردات ءُ واب کپتیں
مئے دیم ءَ کرنے اوشتاتگ اَت
پدا مارا سفری بوجیگانی
شش تکیں آچاراں پتاھگ بوت
مئے تہا کماشے
پہ وتی نماسگ ءَ زہیری اَت
واب وشبو ئے سچان اِنت
وھد ءِ آکوٹ ءِ سرا
تاک گوات ءَ
سر دیان اَنت میتگ ءَ
دریا پیر ءُ عاجز اِنت
راھاں شموشیت
لوگ ءِ کشک ءَ گار کن

آصف شفیق ءِ لچّہانی تہا تکنیک ءُ تبانی اوں بازیں رنگے ءَ گندگ ءَ کیت. آئی ءِ گیشتریں لچّہ واب یا امپریشنٹ ءِ تب ءَ گوں ساچ اتگنت. آ کسان کسانیں چیزاں چہ وتی ھیال ءِ دنیا ءَ سازیت، آ کاگدے بیت کہ گوات ءَ گون اِنت یا آکوٹے ءِ سرا چیزے ءِ سچگ ءِ ندارگ اِنت. البت اے سہیں لچّہ کار سئے جتائیں کشکانی مساپر اَنت. مجیب مجاہد کوہ یا بورّے ءِ گندگ ءَ وتی راجدپتر ءِ سیل ءَ درکیت. امبر سمین درچکے ءِ یا آپے ءِ گندگ ءَ گوں آئی ءِ ہستی ءِ معنا ءَ در جنگ ءِ جہد ءَ کنت. آصف شفیق رھسراں کپتگیں ہما چیز ءِ زوال ءَ پیش داریت کہ زیک آئی ءِ بستارے بوتگ. وھدے ما چہ آئی ءَ کار نہ گپتگ اَت. سئے دگہ ساچشتی کرد اوں اشاں چہ یک دومیگ ءَ جتا کنت. امبر ڈنّی ندارگے ءِ گندگ ءَ گوں ہمائی ءِ بیت چہ آ آئی ءَ وتی زند ءِ کدھ ءَ وشّی ءَ چکار کنت. نپ ءُ پائدگ ءَ چہ دور تچیت. آصف چاران چاران ءَ گوزان اِنت جیڑان اِنت، ہمک ندارگ پُشت ءَ پَشت کپان اِنت. مجاہد ہمے ندارگ ءُ دری چیزاں چہ آسرے اوں کشّگ لوٹیت. بلوچی ءِ نوکیں لچّہ اے سپر ءَ چندیں نوکیں اوں نام ھست بلے آھاں باز وانگ ءُ زانگ کپیت، چیزانی چارگ ءُ چماہاں چہ نوکیں معنا کشّگ کپیت البت اے سہیں لچہ کار ہمے گشت ءَ گوں دیم ءَ جنزان بہ بنت تہ بلوچی ءِ نوکیں لچہ ءِ راجدپتر باندا نِما دار بیت.

" استاد اے آر داد "
سہ ماہی دْرد گوادر، جنوری تا جون
" ۲۰۰۴"
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line