Author Topic: عدنان دلدوست ءِ نبشتانک۔ شپ کدی کُٹیت  (Read 2053 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
الوت ءِ گرانی گوشاں انچو ترندی کنگ ءَ ات کہ گش ئے ھر نپسے یک کسھے...
 اے شپ کدی کُڈ ایت؟
 نہ زاناں اے جست ءَ من چہ وت کنگ ءَ ات اوں ، یا کہ منی باتن ءِ مردم چہ من!!!
 انشپی واب ءَ مارا شمشتگ ات ، بلے ! آ توار منی بے تاھیری ءِ برانز ءَ گیش چہ گیش کنگ ءَ ات.
 یک برے دل ءَ لوٹ اِت توار ءِ شوھاز ءَ در کپاں ، بلےدل ھمراہ داری ءَ سوج نہ گند ایت.
 چو شری ءَ سرپد اتاں ، گوں ترسے ءَ وپتگان ءُ آلیٹ جناں ... پدا ھم ھرچی ھُدایا آورتگ.
 دیوال ءِ دیم ءَ درتکگیں اسپنتان اے تھاری ءِ تہ ءَ کم ءُ گیش چمان اندیم ات انت ، بلے چہ دز رس ءَ دیر .
 چہ دریگ ءَ ھما دیم نزوریں رژنے ءِ مستاگ ات ، ھمے ھیال دمانے دل ءَ چہ گوست کہ بام بلکین ءَ ھمے نزیکی ءَ منی ودار ءَ اِنت ، پد ءَ چم لوگ ءِ سیمی کُنٹ ءِ ھما ساد ءَ کپت کہ بلُک ءَ دائم ءَ وتی نماسگ ماں چادرے ءَ ھمدا جوٹ کرت انت ، داں واب بہ کپ انت ، بلے انشپی اے ساد ھورک ات ءُ لوگ ءِ تھاری ءَ میل ات، بس من ءَ چارگ ءَ ات، چو گش ئے من ءَ گوانک پر دیگ ءَ اِنت.
 واجہ ءَ دوشی ھما شھزادگ ءِ کسہ آورت کہ شیشگ ءِ ماڑی ءَ نشتگ، آئی ءَ مُدام تھاری ءِ شوھاز بوتگ  ، بلکین ءَ تھاری ءَ ھم وشی یے بوت کنت کہ من سرپد نیاں.
 ...اے وھداں توار ھم گار ات،ھاں توار گار ات.
  لوگ ءِ سروک ءَ کپتگیں ھما سیاھیں گرنچ ءَ چارگ ءَ لگ ات اون کہ مُسلہ ءِ سر ءَ ایر ات،  بلکین ءَ گرنچ ءَ گڈگ ماں بہ بیت.
 چہ سرون ءَ چراگ دست ءَ جت ءُ وتی کـر ءَ کش ات، منی ھیال ءَ تیلی نہ کُڈ اِتگ اَنت، بلے پہ دلجم بوھگ ءَ چراگ ءَ سُرینگ ءَ لگ ات اوں؛  داں گنداں شیشگی چراگ ءِ تہ ءَ بالوے پہ بے تاھیری بال بال جنگ ءَ اِنت.
 گوں اے سرپدی ءَ کہ سرجمیں شپ ءِ توار ھمے سوب ءَ بوتگ ، دل ءَ لوٹ ات پہ وت بہ کنداں؛ بلے بالو ءِ بے تاھیری ءَ اے اجازت نہ دات من ءَ.
 چہ وت ءَ جست ءَ ات اوں کہ بالو چہ چراگ ءَ آزاتی لوٹ ایت یا کہ آس.
   
 عدنـان دلدوست
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line