زامران ءِ گال ءُ آئی ءِ بزانت۔ قاضی ریحان ءِ پٹ ءُ پول

[Zahida Raees Raji]

زامران ءِ گال ءُ آئی ءِ بزانت

بسم اللہ الرحمن الرحیم

إن الحمد لله نحمده ونستعينه ونستغفره، ونعوذ بالله من شرور أنفسنا ومن سيئات أعمالنا، من يهده الله فلا مضل له، ومن يضلل فلا هادي له، وأشهد أن لا إله إلا الله وحده لا شريك له وأشهد أن محمداً عبده ورسوله.

گپ گوں ملا تْرانی رھبند ءَ بنا کرتگ گوں ساچشتکاریں ھاوند ءِ ساڑا ءَ کہ آئی ءِ پجار چَہ اسلامی نیکراھی رند ءُ راھان بیت ءُ گوں آئی ءِ من اِتگیں ربال ءِ وزبت ءَ ۔ گوں ھمے اُوست ءَ کہ چَہ میان ءَ کینگ ءِ آس تُس اِیت ءُ مھروانی ءِ پلے رُد اِیت ۔

زامر ءِ ھمتواریں گالانی بزانت :

زامِر: [ م ءِ چیر ءَ زیر ] عربی زبان ءِ گالے بزانت ئِے نل جنوک اِنت ۔ [ لسان العرب / لغت نامہ دھخدا فارسی ]

زامری : چَہ ازرائیلی راج ءِ کماشاں یکے اَت ۔ نوسد ءُ ھژدہ سال پیش چَہ مِھتریں عیسی ءِ ودی بوگ ءَ آ وتی راج ءِ مزن منگہ ءُ کماش اَت آئی ءِ بگیردارآں آئی ءِ گس انگیر کُرت ءُ آس مانداشت ، زامری ھمود ءَ بن گیپت ءُ بیران بوت ۔ [ چَہ قاموس الاعلام ترکی ۔ لغت نامہ دھخدا ]

ضامِر: [ م ءِ چیر ءَ زیر ] کمان میان ، بارگ ڈل [ مھذب الاسماء ]

جمل ضامر : بارگبند ءُ لاگریں اُشتر [ منتھی الارب ]

بارگ ڈل ۔ نازرک ، لطیف ، دقیق [ لغت نامہ معین فارسی ]

زامھران : پاد زھر بزاں اَنچیں درمانے کہ زھر ءِ زیانی ءَ ھلاس کنت ، نوشدارو [ لغت نامہ معین فارسی ]

بلوچی زبان ءَ زامر ءِ بزانت :

زامر کاھے کہ تیھران رُد اِیت ءُ آسک ئِے چر اَنت [ اش کُرتگیں ھبرے ]

زامُر : [ زَا ۔ مُ ۔ ر ] درمانکاھے ۔ ھما آسک کہ آئی ءِ کانٹ دراج ءُ شاہ شاہ اَنت ۔ ھپشاھی گورانڈ [ بارہ سنگھا ] ۔۔۔۔۔۔ سیدگنج ، سیدھاشمی

زامران ءِ بزانت :

زامران ءَ ما شما درست زان اِیں کہ کیچ ءِ گوریچانی روکپت ءَ بلوچستان ءِ نام پُرشتگیں کوھدیمی ھلکے ۔ مروچی زامران ءِ نام ءَ ٹکے ھم ھست چَہ ھما مردمانی پدریچان اِنت کہ زمران ءِ نندوک اَنت ۔

وکی پیڈیا ءَ پہ زامران ءِ گال ءِ بزانت ءَ چوش نوشتہ اِنت ؛

زامران ٹکے کہ کیچ ھنکین ءِ گوریچانی روکپت ءَ ءُ روایرنندی بلوچستان ءِ زرباری رودرتک ءَ نشتگ ۔ایشی ءِ نام پُرتاکیں درچک '' زامُر '' ءِ سر ءَ ایرکنگ بوتگ کہ ھمے دمگ ءَ رُد اِیت ۔

دگہ سببے اے بوت کنت کہ اے گال دو بلوچی گال '' زا ءُ مِران '' ءَ ھور کنگ ءَ گوں جوڑ بوتگ بزاں اَنچیں مردم کہ پہ زاہ ءُ بد ءَ وت ءَ را کشارینگ ءَ ھم چک ءُ پد نہ بنت ۔

http://en.wikipedia.org/wiki/Zamoran

منی ھیال :

اے ھبر وَ پدر اِنت کہ اے جاہ ءِ نام چَہ برز ءَ داتگیں عربی گالاں زیرگ نہ بوتگ کہ آ اُود ءَ '' میم '' گوں زیر ءَ وانگ بیت ءُ '' زامُران '' ءِ تہ ءَ گوں پیش ءَ پمیشکا '' ضامران ءُ زعمران یا دگہ رنگے نویسگ پھک ءَ رد اِنت '' ءُ ایشی ءِ بزانت اے ھم نہ اِنت کہ زامرانی پہ زاہ ءَ وت ءَ را کشارین اَنت ءُ ناں کہ زامران چَہ بُندر ءَ ٹکے ءِ نام بوتگ بلکیں ھند ءُ جاھے ءِ نام اِنت ءُ زاہ ءُ بد ھچ بلوچ نہ سگ اِیت۔

گمان اِیش اِنت کہ اے جاہ ءِ نام '' زا مُر '' نامیں درچک ءِ سبب ءَ زامران ایر کنگ بوتگ بلوچی زبان ءِ تہ ءَ '' ان ءُ ین '' پہ سپتنام جوڑ کنگ ءَ نامگالانی تہ ءَ گیش کنگ بنت چوش کہ ؛

ساز : سازین
ماہ : ماھین
مِھر: مِھران

ھمے پیم '' زامُر '' ءِ تہ ءَ '' ان '' گیش کنگ ءُ '' زامران '' جوڑ کنگ بوتگ بزاں ھما جاہ کہ آ اُود ءَ زامر باز اِنت ۔ زامران بلوچی زبان ءَ مردینی نامے ھم آئی ءِ بزانت ھم چَہ ھمد ءَ زیرگ بو تگ اَنچوش کہ بلوچی ءَ دگہ درچک ءُ داری نامانی سر ءَ مردمانی نام ایر کنگ بنت ۔

تمت بالخیر: