ماھتاک گدروشیا ءِ سنگتانی نام ءَ
داں ھست انت بلوچے دل ءَ دلجم آں
نـہ بـیـت طـائر روزرد مـنـی شـائـری
[استاد تاج محمد طائر]
لھتے وھد پیسرترءَ من بے تاھیرین ندے لوگ ءِ کش ءُ گوران در گیتک، ند گون من ھمے بزگی ءَ کنگ ءَ ات کہ من ءَ دیرگین وھد ءُ زمانگے بیت کہ من ھاک وران تو من ءَ بہ زیر ءُ چیزے نبشت ءَ بہ کن.
دان وھدے من وت نہ زانت کہ من چے نبشت ءَ بہ کنان کہ بیچارگین ند ءِ ارواہ شات بہ بیت ءُکیامت ءَ ھم بازین جست ءُ پرسے ءَ گون گور جیگ مہ بیت.
ھمے گپ یات ات کہ گوستگین سالان ما استاد تاج محمد طائر ءِ گندگ ءَ شُتین اودا چہ استاد ءِ گپان وتی اندر ءَ بدلی یـے ما گندگ ءَ اِتین ، ھمے ھیال دمانے دل ءَ چہ گوست کہ آ پگری ساچشتے کہ استاد ءِ گپان مئے اندر ءَ پیداک کتگ بوت کنت گون نبشتانکے ءَ اے گپ ءَ گون وتی باسک ءُ لبزانک ءِ دوست داروکانی نیام بھر بانگ بہ کناں، کہ نہ ند بہ رنج ایت نہ من.
استاد تاج محمد طائر ءِ یک دستونکے منی دیم ءَ گوست کہ " پہ من وشترین درد منی شائری " ھمے بن گپ ءِ سر ءَ من گونڈین نبشتانکے(رم) نبشت ءُ پہ گدروشیا ءِ ماھتاک راہ دات کہ ند ءَ گیشین دلبڈی یے دات بہ کنان .
اے گپ بوت انت ءُ ھمے درگت ءَ مئے واجھین استاد واجہ "مھر اللہ مھر" قاسم آبادی ءِ نیمگ ءَ ھمے ھال آتک کہ آوکین سال ءِ بزان 2015 اولی سران شمئے نبشتانک چاپ بوتگ بلے اشی تہ ءَ گونڈین ردی یے بوتگ چہ ماھتاک ءِ سنگتانی نیمگ ءَ.
وھد گوست ءُ اے ماھتاک کہ پروری ءِ ماہ ءَ آتکگ ات آتک ءُ آتک مارچ ءِ ماہ ءَ بزان ھمے دو سہ روچ بیت مئے دست ءَ کپت.
ھمے ماھتاک تاک دیم 36 ءَمنی نام ءَ شئیرے آتکگ ات کہ من ءَ ھیرانی کت ، استاد تاج محمد طائر ءِ ھما دستونک ات کہ آئی ءِ سرا من وتی نبشتانک داتگ ات اے گپ ھم گوشگی انت کہ دستونک اولی دوین بند منی پُلین سنگتان نہ زانان کجا شموشتگ انت، پد ءَ ھم منی سر پر نہ بیت اے زنڈین نبشتانک کہ من داتگ ات اے درمیان ءَ کجا شت استاد دستونک بس آ نبشتانک ءِ سرجم کنوک ات.
اے گونڈین ردی نہ انت بلکین اے بلوچی لبزانک بالاد ءَ ھما شل سرین تیر انت، کہ کم کم ءَ شیشمین شار ءَ بے رنگ کن انت.
بلے من ھمینچو زانان مئے بلوچی لبزانک ھر واھگ دارے کہ استاد تاج محمد ءِ نام ھر کجا بہ گند ایت آئی ءِ دست ھم پہ ادارے اوشت انت کہ اے وڑین شئیران گون استاد ءِ گلنام ءَ دگرے ءِ نام ءَ مہ کن انت .
اے نبشتانک ءِ نشان یک کس یا یک مردمے ءِ ایر جنگ ءُ بد رنگ کنگ نہ انت، بلے باید انت کہ گون کرگوشک وابی ءُ بے سدی اے کار کنگ مہ بنت، دان دیمتر ءَ گدروشیا ءِ جھد پر رنگتر ءُ شاھگانتر بہ بیت.
"شمئے کستر عدنان دلدوست"
