Author Topic: آزمانک --- ھیڈ فون -- خالد ارس )  (Read 4663 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
آزمانک --- ھیڈ فون -- خالد ارس )
« on: July 23, 2015, 09:08:08 AM »
آزمانک --- ھیڈ فون -- خالد ارس )

"منی مرچگیں شپ باریں چتور بانگواہ بیت- ،، من نِشتگ ءُ گیشتر ھمے پکر ءِ تہا بیگواہ اتاں- چیاکہ گم مصیبتانی تہا منا سکّ واب کیت- بلے وھدے وشّیانی ساعت کہ کاینت گڑا منی جند ءِ ساہ ءَ واب ھرام بات- من اِشکتگ کہ مردماں گیشتر گم ءُ سکّیانی تہا واب نئیت ،بلے من چوشیں ساعتاں واب ءَ سیر نہ کناں- بلے منی واب ءَ یک کسانیں وشی یے ھم بیگواہ کت کنت- مرچی وَ اللہ ءِ لک شکر انت- کہ سے وشی پجّی ءَ منا رستگ ،گڑا منی چمّاں واب کجا کیت- اولی وشی ایش انت کہ مروچی منی ساہ ءِ کپّ سمیرہ ءَ چار ماھاں رند منا فون کتگ اتے آئی ءَ گشت,, منا پہل کن دیریگیں وھدے ءَ مئے گند ءُ نند ءُ گپّ تران نہ بوتگ- چیاکہ منی گھار سمر ءِ سوب ءَ پت ءَ فون بند کتگ- پمیشکا گھار ءِ آس ءَ منا ھم سوتکگ- تئی جتائی ءِ نہ سگّوکیں ساعت من چہ پیم گوازینتگاں ،ایشی ءَ بید منا دگہ کے زانت کنت- بلے عید ءِ وشیانی وھد ءَ لوگ ءِ مردماں من چیزے زرّ داتگ ءُ من پہ وتی واستہ موبائل بھا زرتگ- ،،
دومی وشی ایش انت کہ سھبی منا منی بنک منیجر ءَ وتی کارگس ءَ لوٹائینت ءُ گشت,, کہ ترا مبارک بہ بیت ،تئی شرّیں کارانی سبب ءَ ترا ترقی دئیگ بوتگ ءُ چرے ماہ ءَ پد تئی پگار ھم گیش بیت- ،،
سیمی وشی اے وڑ انت کہ گوسگّیں ماہ ءَ کہ رمزان ات،من پہ وتی نوکیں گاڑی یے زرتگ ات ءُ منا کمپنی ءِ نیمگا لاٹری ٹکٹے ھم رستگ ات، مروچی لاٹری ءِ لسٹ ءَ منی نام گون ات ءُ دگہ گاڑی یے چہ لاٹری ءَ کٹتگ ات- گڑا نوں منا چتور واب کیت کہ سے جوانیں وشی یکپارگی منا رستگ- من گوں وتی وشّیاں مان گیشّتگ اتاں- داں شپ ءِ دو بج ءخ وشّیاں منا واب ءَ نئیشت-من پہ واب ءَ بازیں جہد کت بلے ھچ پہ ھچ- واب ءِ نیاھگ ءَ من باز پریشان اتاں چیاکہ سھب ءَ منا مہلہ پاد آھگی ات ءُ گاڑی کمپنی چہ گاڑی زورگی ات ءُ پدا گاڑی کمو ارزان ءَ بھا کنگی ءُ زرّ زورگی اتنت- بنک ءَ نوکیں پوسٹ ءِ اولی روچ ات ءُ گوں سمیرہ ءَ نند ءُ نیاد ھم کنگی ات- گاڑی ءِ زرّاں چہ وتی لوگ رنگ ءُ روگن کنگی ات- مات ءِ علاج کنگی ات- گوں سمیرہ ءَ سور کنگی ات- پمیشکا منا پہ ھر کار ءَ اشتاپ ات- من ھمے وسواسانی زِر ءَ گار اتاں کہ ملا ءَ فجر ءِ بانگ دات- من گیشتر پریشان بوتاں- پدا کم کم ءَ واب ءَ منا وتی امبازاں زرت-بلے نیم ساعت ءَ پد گڑیال ءَ منا پاد کت- پرچاکہ من گڑیال ٹیم ءَ کتگ ات- کہ آئی ءَ جمعہ ءَ ابید ھمک سھب منا چہ واب ءَ پاد کتگ ات- منی چم چہ واب ءَ پُر اتنت چیاکہ سرجمیں شپ ءَ واب نیاتکگ ات- شیطان ھم سر ءَ اوشتاتگ ات کہ وپس بلے من وتی وشیّانی دزگرگ ءَ گشاد ءَ جان ششت ،گد بدل کتاں ،پیالہ یے چاہ نوش ات ءُ گاڑی اسٹارٹ کت-بلے منی بے وابی ژندی است ات ، گش ئے نوں واب ءِ دل ءَ نہ ات کہ چہ چماں برؤت -من گاڑی مین روڈ ءَ کہ تاب دات موبائل ءِ گنٹی ءَ توار کت ،دومی نیمگا سیمرہ ات- ھیڈ فون من اشتاپ اشتاپی ءَ لوگ ءَ شموشتگ ات- پمیشکا موبائل ءظ جند گوش ءَ کت ءُ من ءُ سیمرہ واھگانی باگ ءِ وشّیانی تہاری گار بوتیں- اناگت ءَ گنداں کہ یک مردمے ءَ دؤر کت کہ روڈ پاس بکنت ،یکے منی انان گوں سمیرہ ءَ ات ءُ دومی من گاڑی ءَ را تیز تاچگا اتان- پمیشکا گاڑی چہ منی کنٹرول ءَقڈنّ بوت- ھمنچو گنداں کہ گاڑی ءَ مرد بڈّ ءَ کت- مب تُرند تُرند ءَ گاڑی ءِ بریک جتاں ،گاڑی چپّی نیمگا گوں دگہ گاڑی یے ءَ لگّ ات ءُ پدا مین روڈ ءِ مزنیں لیٹانی کمبہ ءَ گوں ڈیکّ ئی وارت- من نزاناں کہ رندا چے بوت- وھدے چم پچ کتاں داں گنداں اسپتال ءَ وپتگاں- چہ ڈاکٹر ءَ جست ءُ پُرس ءَ معلوم بوت کہ ھما مردم کہ منی گاڑی ءَ جتگ ات ،آئی ءَ ھما جاہ ءَ ساہ داتگ ات- پولیس ءَ وتی رپورٹ ءِ تہا نبشتہ کتگ ات کہ گاڑی ءِ واہند تیز روگا بوتگ ،پمیشکا غلطی ایشی ءِ جندئینگ انت ءُ دومی آئی ءَ موبائل بید ھیڈ فون ءَ کارمرز کتگ کہ اے ھم کانود ءِ تہا جرم انت- سے چار روچاں پد وھدے منا ڈاکٹر ءَ اجازت دات تہ پولیس ءَ کوش ءِ جرم ءَ منا بند کت- مرد ءِ ھون ینی زرّ وَ چہ منی لاٹری والا گاڑی ءِ زرّاں پورا بوتنت ،بلے لاپروائی ءِ سوب ءَ منا دو سال ءِ سزا دئیگ بوت ءُ منی نوکری ھم چہ منی دست ءَ شت- وھدے قید ءِ دوئیں سال من سرجم کتاں تہ در آھگ ءَ پد منا معلوم بیت کہ سمیرہ ءِ سور ءَ سالے ءَ گیش انت ءُ آ مروچی چکّے ءِ مات انت-...
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line