Author Topic: شپ! چراگانی تب ءَ پجّاہ بیار۔ زاھدہ رئیس راجی ءِ کہنیں پربندے چمشانک ءِ وداریگ  (Read 1980 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7060
  • Karma: 356
    • Baask-Home of Baluchi Language, Literature & Culture
زاھدہ رئیس راجی ءِ یک کہنیں دستونکے شمئے تچکیں چمشانکانی وداریگ :
گوں بدیں چماں ءَ سگ ءِ کوہ ءَ مہ چار
جمبراں بستگ ، ستر آس ءَ بہ گوار

شپ! چراگانی تب ءَ پجّاہ بیار
بیگہ  ءِ گیمرتگیں رُو ءَ بہ مار

سہبے ءَ بیگاھے ءِ درور مہ کن
شپ نہ بیت رُژنا اگاں روچ انت تہار

ھؤ شپ ءَ وت بامے ءِ ھاجت کُشیت
گوں دل ءِ ستک ءَ کُتگ سہب ءَ ودار

سک گران انت،  یک برے باید بِبیت
گوں پچیں چماں وتی درند ءِ ندار

آزگ ءُ ٹپّانی  زنگانی جنوک
زند ءِ سوگاتاں دل ءِ توک ءَ بہ دار

پروشتگیں ھوشامے ءِ دیم ءَ کپ ایت
انگریں مارشت ءِ تُنّیگیں کرار

ھجبر ءَ واتر نہ کنت اِنت زندگی
اشکُتین ئے یک برے کبر ءِ توار

زندگی پچگپتگیں وامے اگاں
بیا دمے تو ھم وتی ، دستاں شَہار

من ستر دیم ءَ  نہ باں تاں آسرءَ
ساھگ ءَ گندئے ، وتی  چماں لتار

کئے گوشیت چکاس ءِ موسم مٹ اِتہ
چہ ازل یکیں وڑ اِنت ھند ءِ لوار

چہ کجا تئ کینگ ءِ پانگ بیاں
مہر ء باھوٹ انت, دل ءِ کشت ءُ کشار

مئے تب ءِ ھر مردم ءِ آسر ھمیش
ھرکسے بئیت ءُ بہ لڈّیت اِنت میار

منزل ءِ گستائ ءِ نام ءِ گروک
راجی ءِ کِشک ءَ تئ شَنک انت ھوار

زاھدہ رئیس راجی

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
بزانت : شنک =شنک ـــــــ گز ء ِ ٹالاں بر اَنت ھشک کن اَنت کرگیں ءُ کڈوئیں لوگاں شنگ جنت(گوں گنی ابدال ءِ منت ءَ )
وھدے گوشنت ” راہ ءَ شنک مہ جن“ بزاں راہ ءَ مہ دار
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line