Author Topic: (آزمانک - اُبینگ - انور صدیق )  (Read 3199 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7062
  • Karma: 356
    • Baask-Home of Baluchi Language, Literature & Culture
(آزمانک - اُبینگ - انور صدیق )
« on: February 04, 2016, 10:12:35 PM »
(آزمانک - اُبینگ - انور صدیق )
من گشادی ءَ لوگ ءِ دروازگ ءَ چہ سر کشت-من لوٹت کہ ڈنّ ءَ در بیاھاں،بلے ڈن ءِ ترسناکیں ندارگ ءَ منی پاد بست انت،زمین یک گوش ءَ چنڈگا ات،منی لوگ شیک شیک ورگا ات،من وتی چم آزمان ءَ شانک دات انت داں استال وت ماں وت ٹکّر ورگا انت،چو گردک ءِ وڑ ءَ تیزیں رژنے زمین ءِ سر ءَ تالان انت ،زمین چو آس ءَ روک انت،بلا بلاھیں کوہ چہ زمین ءَ سستگ ءُ آزمان ءَ بال ءَ اتنت ،گرند ءَ چہ ھم ترند تریں توارے مچتگ ات،ھنچو گمان بئیگا ات کہ زمین ترکّگا انت، گوات ھنچو ترند ترند ءَ کشگا ات،درچک چہ ھنڈالاں درایگا اتاں ،درچکانی تاک گوات ءَ گون اتاں-
من پدا یک برے لوگ ءِ تھا پُترتاں دروازگ بند کت ،پہ دعا ءَ دست برزا کتاں ،زوت زوت ءَ چہ قران پاک چہ کباٹ ءَ کشت ءُ آئی ءِ وانگ بنا کت،منی جان چو زندگیں ماھیگ ءَ دْرھگا ات،منی چمّاں گشے قیامت ات،من ءَ گمان بوت کہ منی لوگ نی منی سر ءَ اُرجگا ات، من قران پاک وتی دل ءِ سر ءَ داشت ءُ دروازگ ءِ دپ ءَ اتکاں دان ڈن گیشتر ترسناک تر ات،میتگ ءِ مردمانی کوکار ءُ سر ءَ زرتگ ات،من چارت داں لوگ ءِ برز ءَ ایریں سامان بُن ءَ کپگا اتاں ،ال من الماری گوں کتاباں سر جھل اتاں ،لوگ ءِ دیم ءَ درتکگیں منی پت ءِ ورنائی ءِ عکس کپتگ ءُ چور چور ات-
اے یک ھنچیں ترسناکیں عذابے ات کہ ھچ وڑا تم بئیگ ءِ نام ءَ نزانگا ات ،منی دل ءَ قیامت ءِ آھگ ءِ شک گیشتر مھکم بیان ات ءُ نی من ھنچو لاچار بیتاں کہ لوگ ءَ چہ در بیاھاں پرچا کہ لوگ نی نندگ ءِ وڑ ءَ نہ ات ، ھنچو گمان بئیگا ات کہ لوگ انّی انّی منی سرا اُرجیت ،من قران پاک وتی دل ءِ سر ءَ داشت ءُ تچگا لگ اتاں،گوات ءِ ترنْدی ءَ برے منی پاد زمین ءَ سر ءَ اتاں ءُ برے چشت اتاں ،درچکانی تاک ءُ لمباں منی پاد اڑان اتاں ، منی ھوش ھنچو شتگ ات من نزانگ ءَ اتاں کہ من کجانگو رؤگاھاں ،گوں گوات ءِ ھیژّاب ءَ منی نپس گٹّ بئیگا ات،منی گوش آزمان ءِ دل ترْک کنوکیں توار ءَ کرّ بئیگا اتاں ،اناگت ءَ گوات ءِ یک ترْندیں کولی ءَ من ءَ برت ءُ یک لوگی ءِ دروازگ ءَ تکہ دات ،من وتی یک دستی ءَ گوں قران پاک مھر داشت ءُ دومی دست ھما لوگ ءِ دروازگ ءِ کڑی ءَ بند دات ءُ دروازگ ءِ جنگ بنا کت،دمانی رند دروازگ پچ بیت-
"ھاں کیا لوٹے؟،،ھما لوگ ءَ واجہ ءَ من ءَ جست کت-
,,قیامت انت.... قیامت ،،
"کئے گشیت قیامت انت.... ادا قیامت کن انت،،
"تو کمّے ڈنّ ءَ درا...... دروازگ ءَ چہ سر ءَ کش بچار قیامت انت ،،
آئی ءَ منی اے جستانی پسو دت ءُ گشادی ءَ دروازگ بند کت-من آ شری سر ءَ پجاہ آؤرت بلے آ من ءَ پجاہ آرگ ءَ نہ ات آ من ءَ گنوکے لیکگا ات-من پدا پشت ءَ چک ترّینت داں ھد چیز انسرتگ-منی وتی لوگ ءِ نیمگا رھادگ بیتاں-اے وھد ءَ نہ گوت ترْند کشگا ات،نہ آزمان ءََ چہ قھریں توار پیداک ات-درچک وتی جاگہ وَ سلامت اتنت-ھر چیز ھما وتی وار ءَ سالم ات- منی لوگ ءِ ھر چیز وتہ پیشی وڑ ءَ ایر ات- کتاب الماری تھا ایر اتنت بلے منی پت ءِ عکس ءِ کانچ ءِ ٹکر لوگ ءِ دل ءَ انگت شنگ ءُ تالان اتنت-
من آگاہ بیتاں ءُ سما کت داں میّتے منی دیما ایر انت-
 (F)

گوں طارق پشوکانی ءِ منہ واری ءَ[/size]
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line