Author Topic: اسپیت زوت سیاہ بوتنت. آزمانک ۔ چندن ساچ  (Read 1295 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7055
  • Karma: 356
    • Baask-Home of Baluchi Language, Literature & Culture

آزمانک۔۔۔۔۔
اسپیت زوت سیاہ بوتنت
چندن ساچ
آئی ءِ آیگ ءَ پد مئے کوہنیں چاگرد بدل بوت۔ ہمایاں کہ پیسر ءَ وت ءَ اسپیت گشتگ ات۔ آ دراہ سیاہ بوت اَنت۔ ہمایاں کہ وت ءَ سہریں رنگانی ربالکار گشتگ ات۔ آیاں وتی وھد گوں عیش ءُ دھیشاں گوازینت۔ منی ہمراہ ءَ من ءَ اشارہ کُت ءُ گوشت کہ کامریڈ ٹولی نوں بیگواہ بیت۔ من وتی ہمراہ ءِ گپ اے گوش ءَ ھش کُت ءُ دومی گوش ءَ کش ات۔۔۔۔ ہمراہ ءَ منی نادلگوشی وش نہ بوت ءُ پدا گپ ءَ بوت۔ بیا روئیں کتاب جاہ ءَ روتاک ئِے وانیں۔ من ءُ ہمراہ راہ کپتیں۔۔۔۔۔ ما دوئیں نیوز سیکشن ءَ رستیں تاں اودا کس نیست ات۔ روتاک شنگ ءُ شانگ اتنت۔ ما کرشیانی سرا نشتیں کہ روتاک وانیں بَلے دراہیں روتاک کوہن اتنت۔ ما روتاک یکرّا ائیر کُت اَنت۔
باریں چونکائی مروچی منی ہمراہ گپ جَنگ لوٹگ ءَ اَت۔ ہمراہ ءَ منی چمانی تہا چار اِت ءُ گپ بندات کُت۔ من ترا یک گپے گوشاں اِے کہ اتکگ نوں کامریڈ ٹولی گار ءُ بیگواہ بیت۔۔۔۔ من ہمراہ جُست کُت۔ بُگش باریں چوں کامریڈ ٹولی گار ءُ بیگواہ بیت؟ کامریڈ ٹولی ءِ تہا در محمد، مہر اللہ، گنج داد، رژن ءُ فیض ءِ وڑیں مردم ہوار انت ءُ پدا ایشانی سروک حان محمد ملازئی انت۔ حان محمد ملازئی وَ سکیں مزنیں سیاست دانے۔۔۔ منی گپانی ھش کنگ ءَ پد گشئے زاناں منی ہمراہ آس گپت۔ اوھے اے بات اَنت اے شرّیں اوھے ہم نہ کرز انت۔ اِے کُجا ءُ سیاست کُجا؟ من وَ ایشاں سیاست ءِ نودربرے ہم شمار نہ کناں۔۔۔ نوکیں زمانگ ءَ ہر چیز ءَ وتی وڑ ءُ پئیم بدل کُتگ۔ انسانی چاگرد بہ بیت یا انسان ءِ ہمروچی زند ءَ گوں ھمگرنچیں چیز بہ بنت۔ ہر چیز بدل بوتگ۔ ایشاں وتی جند ءِ سُدھ نیست۔۔۔۔ برو ایشاں جُست کن کہ شما نوکیں دَور ءِ جاورانی بدلی ءُ سدلی ءِ سرا گپ ءُ تران کُت کن اِت؟ اے وَ وتی کش ءُ گور ءِ چاگرد ءِ بابت ءَ ہم ہچ نہ زان اَنت۔ ایشاں ناں وتی راجدپتر ءِ باروا سرپدی ہست ناں کہ کتاب ءَ گوں مہر ءُ دوستی ءِ زانت ءُ سنچ۔۔۔۔ سیاست ءِ تہا چالاکی ءَ اینچکیں مزنیں ارزشت نیست۔ سیاست ءِ دنیا ءَ سنگینی ءَ گوں جیڑگ ءُ چیزاں شّریں وڑے ءَ سرپد بوّگ مزنیں ارزشت داریت۔ چوشیں مردم موسمی مگسک بنت۔ چیزے روچ ءَ رمب ءُ ریچ کن انت۔ پدا ھنچو گار ءُ بیگواہ بنت چشکہ گوریچ ءِ گوات ءِ تہا ریک ءِ سرا گونڈار ءِ پد۔
منی ہمراہ ءِ گپ ہلاس نہ اتنت۔۔۔۔۔ بلے من پاد اتک ءُ کتاب جاہ ءَ چہ ڈن دراتکاں۔ دیما چم شانک داتنت، تاں ھو واکی کامریڈ ٹولی ءَ وتی جاہ یلہ داتگ ات ءُ آیانی نند جاہ سیاہ باطنیں سیاہ پوشاں پُشت ءَ کش اتگ ات۔۔۔۔۔۔
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line