Author Topic: کوئٹہ ءَ آس مہ بیت دوزہ بیت ۔ چندن ساچ ءِ سپرنامگ  (Read 1131 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7059
  • Karma: 356
    • Baask-Home of Baluchi Language, Literature & Culture
شال ءِ سفر۔۔۔۔1
کوئٹہ ءَ آس مہ بیت دوزہ بیت
چندن ساچ
برے برے دل گشیت کہ وتی جند ءَ وہد بدئے۔ تر ءُ تاب بہ کن۔ اِے دنیا ءِ اڑ ءُ جنجال مُدام ہست اَنت۔ اِے سر دردی، اے کار، اے دز گٹی مُدامی اَنت۔ چے بیت زاناں مردم یک ہفتگے وتی جند ءِ واستا بہ گوازینیت؟ زاناں زندگ بوہگ ءِ واستا المی اِنت کہ مردم ہر وہد دز گٹ بہ بیت؟ ناں، منی جند اِے دز گٹی آں کِمار نہ کنت۔ اِے کار اِے دزگٹی ہمے وڑا ہست اَنت مردم باندا چرے کوڑوئیں امبروز ءَ سفر کنت۔ درستیں گلگ ءُ زنگ، درستیں امیت ءُ ودار ہلاس بنت۔ بس یات پشکپ اَنت۔ تہلیں یات، وشیں یات، بے معنائیں یات۔۔۔۔۔ زند ءَ کُجام وہد ءَ ہم سفر کنئگ ءِ موہ رسیت مردم پہ سفر ءَ ہچ مہتل مہ بیت۔ بلکیں تئی ہمے سفر اِے دنیا ءَ چہ آ دنیا ءِ سفر بوت بلئے سفر وَ کنگی اِنت پرچا کہ سفر۔۔۔ سفر اِنت۔
ابن بطوطہ سفر ءِ باروا گشیت کہ ’’سفر ترا یکبرے گنگ کنت ءُ پدا ترا کسہ آروکیں انسانے ءِ دروشم ءَ دیما کاریت‘‘
دگہ جاہے گشیت کہ ’’سفر ترا بے شمار درآمدیں دیاراں بارت ءُ پدا ترا وتی جند ءِ ہند ءُ دیاراں درآمد کنت‘‘
من چو ابن بطوطہ ءَ دُوریں دیاراں سفر ءُ نہ کُتگ، پمیشکا انگت وتی دمگ ءَ درآمد نیاں۔ چونا ءَ منی واہگ اِنت کہ پیسر ءَ وتی ہند ءُ دمگاں بہ گنداں۔۔۔ دنیا ءِ سفر رندی اِنت۔۔۔۔۔
اناگہ ءَ سنگت نور ءَ من ءَ گشت چندن مروچی کوئٹہ ءَ روگ اِنت۔ یکبرے من کمو مکر ءُ ہیلہ کُت کہ ناں مروچی نہ بیت باندا روئیں بَلے نور ءَ زور کُت کہ مرگے زندے مروچی روگی اِنت۔ من پہ کوئٹہ ءِ روگ ءَ ساڈی بوتاں۔ پرچا کہ من کوئٹہ نہ دیستگ اَت۔ مُدام منی دل ءَ بوتگ کہ کوئٹہ ءَ بہ گنداں بَلے کوئٹہ ءِ دیدار نصیب نہ بوتگ۔ مروچی ہمے واہگ سرجم بوہگ ءَ ات۔
ما دوئیں شپ ءِ کوچ ءَ کش ماں کش نشتیں ءُ پہ سفر ءَ رہادگ بوتیں۔ بس ءِ دراہیں مسافر مردین اتنت۔ یک جنیں آدمے ہم پہ دوائی گون نہ ات۔ من وتی ہمراہ ءِ نیمگا چارِت ءُ گشت۔ ’’شپ ءِ سفر ءَ کوچ ءِ تہا جنین گون مہ بیت گڑا سفر سک بے لذت بیت گندئے‘‘ آئی ءَ ہم منی کاسگ ءَ آپ وارتگ ات ءُ سر ئِے پہ ہو سُرینت ہو یار من ءَ ہم بے جنین آدمیں سفر وش نہ بیت۔۔
حیر نوں ما دوئیں بس ءَ اتیں ءُ بس رہادگ ات۔ دیم پہ شال ءِ گلیں بازار۔۔۔۔۔۔
راہ ءَ ہوٹلے ءَ داشت۔ ما ورگ لوٹائینت۔ بَلے ورگ ورگ ءِ وڑا نہ اتنت۔ چونا ءَ راہاں ہوٹلانی ورگ ورگ ءِ وڑا نہ اَنت۔ آ مکران کوسٹل ہائی وے ءَ اوماڑہ ءِ ہوٹل بہ بیت یا کوئٹہ ءِ راہانی ہوٹل بہ بنت۔ معنا یک۔۔۔۔۔
نوں سفر ات۔ بے جنین آدمیں کوچ اَت ءُ بے تواری ات۔ کوچ والا ءَ یک جوانیں کارے کُتگ ات کہ راہ ءَ ہچ وڑیں گانا مانا چالو ئِے نہ کُت اگاں ناں پٹھانی گانایے چالوئِے بہ کتیں گڑا بزانکہ سر گوں کوئٹہ ءِ ڈاکٹران اَت۔
باریں شپ چونکائی ہلاس بوت۔ نوں روچ ءِ سہری ات ءُ بام ءَ داتگ ات۔ ہمراہ ءَ چم پچ کُت اَنت۔ چندن اِے کلات اِنت۔ بَلے ڈن ءَ من شش ہفت دکان ءَ ابید دگہ کلات ءُ ملات ہچ نہ دیست۔ ڈٖن ءَ لہتیں مردم گندگ بوت کہ آیاں وت ءَ چادر مانپوشتگ اَت۔ گمان بوت کہ ڈن سرد اِنت۔ کوچ جنزان ات۔ نوں سبز ءُ آبادیں زمین پدر اَت۔ ندارگ وش اتنت۔ درچک پدر اتنت ہمراہ ءَ گشت آ سروپ ءِ درچک اَنت۔ چم شانک داتنت ہو تاں سروپ ءِ درچک اَنت۔ بر اَتنت۔ ما جنزان اتیں۔ راہ ہم ہلاس بُوان اَت۔ جاہے ’’کوہ ٹنگ‘‘ کنئگ بوتگ اَت ما ہمے کوہ ءِ ٹنگ ءَ پترتیں تاں موسم بدل بوت۔ چونا ءَ بس ءِ تہا اِے گمان نہ بیت کہ موسم بدل بوت بلئے آزمان ءُ زمین ءَ گواہی دات کہ اِدا موسم دگہ موسمے۔۔۔۔ نوں کوئٹہ اَت۔۔۔ نہ دیستگیں جاہانی سئیل ءُ سواد ءِ وتی یک لذتے۔۔۔۔۔ کوئٹہ ءَ منی اولی رند اَت۔ کوئٹہ منی وابانی شہر کہ من مُدام لوٹ اتگ کہ کوئٹہ ءَ بہ گنداں ءُ مروچی من کوئٹہ ءَ اتاں۔
کوئٹہ ءِ باروا گشنت کہ اِے لبز چہ کوئٹ ءَ در اتکگ کہ پٹھانی زبان ءِ لبزے ءُ ایشی معنا اِنت کلات۔۔۔۔ اسل ءَ کوئٹہ چاریں نیمگا کوہانی تہا اِنت ہنچش کہ یک کلاتے چاریں نیمگا دیوال ءَ بہ بیت۔ کوئٹہ ہم ہنچش اِنت۔ انگریز واجہ اَنت آ کہ ہرجاہ اتکگ اَنت آیاں جاہانی نام وتی وڑا کتگ اَنت۔ پٹھانی زبان ءِ کوٹہ ہم بدل کتگ ءُ کوئٹہ کتگ۔ گشنت کہ کوئٹہ ءِ نام ہما وہد ءَ بدل کنئگ بوتگ کہ انگریزاں میری ءِ کش ءُ گوراں آبادیں مردم پاد کتگ انت ءُ ہمدا آورتگ ءُ آباد کتگ انت۔
ایم عثمان حسن ’’بلوچستان اضلاع اور تاریخ‘‘ ءِ تہا کوئٹہ ءِ بابت ءَ نبشتہ کنت کہ ’’کوئٹہ ءِ کوہنیں نام کواٹا بوتگ کہ اے پٹھانی زبان ءِ لبزے ءُ آئی ءِ بزانت اِنت کلات۔ یک زمانگے ءَ اے قندھار ءِ بہر بوتگ ءُ مروچی ہم کوئٹہ ءَ اوگانی جہ منند اَنت‘‘
بلوچ نبشتہ کار کوئٹہ ءَ مُدام شال گشنت۔ من ءَ بلال خالد نامیں سنگتے ءَ پاؤلو کولو ءِ کتابے ندر کُت آئی ءَ ہم کتاب ءِ سرا شال نبشتہ کُت۔ بلوچی ءَ چاپ بوتگیں کتابانی تہا من مُدام کوئٹہ ءِ جاہ ءَ شال ونتگ ءُ دیستگ۔۔۔ منیر احمد بادینی ءِ گدار ’’شال ءِ گلیں بازار‘‘ وَ سک مہشور اِنت۔ اِے گدار بگندئے بازیں مردماں نہ ونتگ بَلئے نام ئِے الم اشکتگ۔
آئین اکبری ءِ تہا ہم کوئٹہ ءِ نام شال نبشتہ کنئگ بوتگ۔ بزانکہ اِے نام یک کوہنیں نامے۔ لہتیں زانتکار گشیت کہ درستاں پیسر اِے دمگ ءِ نام شال بوتگ ءُ پدا شال کوٹ، شال کوٹ ءَ چہ کوٹ ءُ کوٹ ءَ چہ کوئٹہ ءَ بوتگ۔
چونا ءَ شال اسل ءَ پٹھانی لبزے ءُ آئی ءِ بزانت سبز ءُ آبادیں زمین اِنت۔ کوئٹہ یک دلکشیں جاہے۔ یک نیمگے اِدا موسمی ہوراں گورتگ ءُ دومی نیمگا اِدا مُدام برف گواری بوتگ۔ کوئٹہ ہر وہد سبز ءُ آباد بوتگ۔ پمیشکا چہ بندات ءَ کوئٹہ ءِ نام شال بوتگ۔ حیر اِے نامانی بدل ءُ سدلی نوں بوتگ اَنت۔ چہ شال ءَ کوئٹہ گیشتر نامدار اِنت پرچا کہ کوئٹہ مارکیٹ ءُ میڈیا ءَ وتی کتگ۔ شال ایشاں اچ وت سستگ ءُ درآمد اِنت۔ بَلے لبزانکی مردمانی دپ ءَ شال چہ کوئٹہ ءَ وشتر اِنت۔ پمیشکا کوئٹہ ءِ جاہ ءَ شال نبشتہ کن اَنت۔ راستیں گپے بگشاں؟ منی جند ءَ ہم شال چہ کوئٹہ ءَ دوستر بیت۔۔۔۔۔۔
(روان اِنت)
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line