نبشتہ کار : پِـردوس یاسمین
رجانکار: سـئید ساهل ( 14 / مولمان / 2017 ، لاشار ناهی
زِند ءِ بے اَشکامیں ءُ بے اَجامیں سَهت ءُ دَمان گْوزان اَنت ، زِند ءِ ڈیوا مِرمِرانکیں چراگ ءِ وڑ ءَ هَر کتره ءِ دُولّابانی دیمپان اِنت ، بَرے بَرے وَ اَنچوش مار آں گْوش ئے اِے دُولّاب منی زِند ءِ مِرمِراکیں ڈیوا ءَ کُش ایت ءُ من ءَ را چہ اُمر ءِ بندیگی ءَ آجو کن اَنت ... ایوکی ءِ دشت ءَ اِے شِنگیں ریکزار منی زِرد ءَ پُرسیگ کَـنَگ ءَ اِنت ... زِند ءِ زْرُمبیں تهاری منی مارِشتاں بے چاڑ کَـنَگ ءَ اَنت ... سانجارو ءِ ڈولداریں وهد ءَ ایرنِندانیں روچ ءِ ندارَگ ءِ گِندگ ءَ پَـد من انچوش مار آں گُشئے کہ منی زِرد ایر روان اِنت ... شپ ءِ بے کِساسیں کِیلّیں تهاری منی زِرد ءِ بے کِساسیں تهاریاں گیشتِر وَدّیـنَگ ءَ اِنت ... سُهب ءَ رودراتک ءِ ندارگ ءِ گِندگ ءَ پَد منی چمّانی دیم ءَ ساهیلیں جمبرانی گْوارگ بِنا بیت ... مروچیگیں روچ پَد ءَ بِنا بُوت سَرجمیں روچ هَر روچ ءِ وڑ ءَ اُمر ءِ بندیگی ءَ گْوازینگ کَپ ایت