آتکگ اَنت گرانیں نوبت ءُ جنگانی بهار
آتکگ اَنت گرانیں نوبت ءُ جنگانی بهار
دیم پہ ماتکوھاں رپتگ اَنت ملّیں سرمچار
گوانک جتگ ڈیھ ءِ مادریں ھاک ءَ بزّگی
جہہ جتگ پیراں بستگ انت ورناھاں کتار
مُلک بلوچانی پہ ھلو ھالوآں نہ رؤت
مشکتی حلوایے نہ اِنت رندانی دیار
داں جھان ھست انت نام مئےدھرءَھست بیت
وھد ءِ دلبند ءَ نقش اَنت مئے پیشی یادگار
کهن ءُ کُمبانی آپ مئے آپ ءِ زم زم انت
چو بهشت ءَ انت مئے چراگاه ءُ ملگزار
زِر چو آدینک ءَ درپش دنت روچ ءِ دیگر ءَ
گوات منی ڈیھ ءِ باڑئی بھنگانی ملار
دژمن ءَ داشتگ چم وتی پہ مئے بُندر ءَ
کوه بہ بنت یاکہ تیاب دپ ءِ سورآپیں ڈگار
یا بہ بنت دار ءُ ڈنگر ءُ بوچ ءُ ڈوک ءُ ڈل
گِل بہ بنت یا کہ بندن ءِ زبریں ریگبار
کلمتی چِھبّ ءَ جوڑ کنت بان ءُ بادگیر
بُرز ماں باتیل ءَ شنگ بنت رنگانی گُبار
شپدرے مانیت پہ وتی پدریچاں نلینٹ
کُبلیں پاسگاھاں بند بنت آجوئیں تلار
پہ بلوچانی پُشپداں دنیا تنگ بیت
المّ ءَ روچے مئے گوں بدواھاں جنگ بیت
مبارک کازی