آزات
****
كريم بلوچ  ۔ تـَهـل
آزات من هما روچ كه آزات بيت وتن
سُهل بيت و ترانے ، و مه بيت درد و مهن
سر بـُرز ءِ ستا بيت و نگاراں و سَمن
سر سبز بهار بيت و دلاں سبز دَمَن
*
بَشّاں به گوار انت و به شاننت دَمگاں
گانژوك و سير لاپ دراهيں رَمگاں
بـَر نوك و په هر روچ مراداں شـَمـَـگاں
مـَلـّـوك و كهيب گوں كاڑ ءِ چـَمـَـگاں
٭*
دل بود به زور انت و زراں بود ءِ هيال
واهگ چو به مـَلّ انت كه مَه كـُٹـّنت مَـَه و سال
چَنگ بيت و رباب بيت و كوهانی چنال
مردانی زرابانی ستا بيت و همال
*
كوچگ و مه پَٹـّاں به ترڈ انت لـَديگ
آهوگ و كرگوشك ،گـُوَرانڈاں نه شُديگ
كوهانی مزار بنت و پلنگاں وَديگ
كوكو و كپوتانی و سيسوگ پـَديگ
*
چـُرّاں به چـُرّ انت و رَوان كـَؤرانی آپ
ماهيگ كِر و لـَنشاں ترپان بنت مه پيتاپ
دريا و زراں مَؤج گوں گـُوَرمانی زرآپ
وَشّی ءِ بيت جوهاں و به بيت وَشّی ءِ گواپ
*
شهدانی مدام چـَمّـَگ و زِه بنت زهاں
كـَندوك هزار لـُنـٹ و هزار چـَم ماں جهان
استار ماں دلاں بنت و دلاں مَؤج كناں
دلبر په ودار بنت و ودار بنت گـلاں
*
كارانی بـَراں بنت گريبان ءَ په ورد
رنجور مَبات كس ،و كسءَ هچ مَبيت درد
راجانی مدام دود دِرَپش انت و بامرد
آباتی و كار بنت په دُرُستاں نه جـَگـَرد
*
آزات هما روچ كه به بيت نوبت ءِ دَؤر
يك بنت مسلمان و نه مَنّوك گوں گـَؤر
كـَڈّ بنت و دوا بنت پما تهلی و جـَؤر
آپانی تَچـَگ بيت و به رُمبنت مئی كـَؤر

روشن به بنت استار و بــِرَكش انت مدام
ماتانی پدا پهر بيت و روشن به بنت نام
سر برز بلوچ بنت و به جَلـّنت نه شگام
وَشّی ءِ رگام بيت و پما زانت ءِ رَگام
٭
آزات هما روچ كه مئی بيرك بيت دل ءَ
گواڑگ چه دل ءِ هون نه به سبز انت چه گِل ءَ
مهرانی رواداری به بيت هر هَلك ، مِزل ءَ
آبات و جهان جـَلّ و براهدار سِجل ءَ
ماسکو ـ اُرُس
27/03/10