آزمانک: پیر مرد

آزمانکار: عمرعثمان

پیر مردءَ زندے ایمنیں روچ زھگانی بانداتءَ ندر کتگ ات انت۔آئیءِ عمرے سند کساس 70 سالءَ سر بوتگ ات۔آئیءِ چار جنک ءُ دو مردین چک ات انت۔جنینے کساس دہ سال ساری ھُدامرزی بوتگ ات۔

آئیءَ چاریں جنک عاروس داتگ ات انتءُوتی جودانی لوگءَات انت۔مستریں جنکءِمرد بیران بوتگ ات،بلے گوں وتی چک ءُ نماسگاں ایمنیں زند گوازینگءَ ات،پمشکہ پتءِسرا نہ بوت انت۔ سیمی جنک دومی چکءِ سرءَ بیران بوتءُ آئیءِ جودءَ دگہ سانگے کت ءُ اولی چک وتی کرّءَ برت گوں۔

پیر مردءِ دوئیں بچک گرانءُسنگینءُمیتگءَشرپ مندیں مردم ات انت۔مستریں بچک شریف درملکءَکارءُروزگار اتءُ کستریں بچک سھیل میتگءَسرکاری ملازم اتءُھر دو سورءُسانگ کتگ ات انت۔

پیر مرد ریٹائرڈ زند گوازینگءَات۔الکاپیں پنشنءِگرگءَات۔چکءُنماسگانی چمدار نہ ات،زرءُمالءِتنگی نہ ات،بلے آ وتی زندے گوستگیں روچاں دلجمءُایمن نہ ات،کہ آئیءَ وتی زھگانی جوانیں رستءُردومے کتگءُھرکس وتی لوگءُزندءَدزگلائش انت،بلے چریشیءَ ابید آئیءَ مدام یک ناوشیءِ ھمگرنچ ات۔آئیءَزندمان پہ تماعے گوازینتگ ات،بلے عمرے گڑی سندءَ آئیءَمارتگ ات کہ زند آئیءَ آ پیم گوازینگ لوٹتگ ات،نہ گوازینتگ ات۔پگرءُجیڑگانی بوجیگءَ زندمانءِدریاءَلڈان ات۔تکانسرءُبے تاھیر ات۔آئیءِ شپانی وابءُروچءِ ایمنی زندءَچہ جی شاہ ولایت ات۔

آئیءِ حیالءَ عمرے ھپتادیں سال بے کار گوازینتگ انت۔آئیءَ ھردیں گوستءِدپتر پچ کت،آئیءَ وتارا کسملیکءُوتا گوں پیڑاتگیں مردمے مارت۔بیدے وتی ذاتءَ دگہ کسی پرواءُ غرض نہ بوتگ ات،،، بلے لھتیں وھد ات،آئیءَ ھردیں میتگءِ نیزگارءُبزگیں زھگاناں درتگ پچیءُشپادیءَ دیست،آئیءِچماں ارس شل اتءُسک پدرد بوت۔آئیءَ وتی چکانی وشیءُمیتگءِزھگانی بزگی دیم پہ دیم کت انت،وتارا سک باز ایرجتءُڈوبارت۔

آئیءِ زیادھیں پگرءُوسواساں روچ پہ روچ نزورءُکمزور کت۔آئیءِ پیریں بالاد رنجءُغمانی آماچ ات۔بازیں جیڑگاں آئیءِ دیمءِ براناکی کور دیم کتگ ات۔آئیءَ گشے دیوانگیءُابدالی یے سرترگءَ گپتگ ات۔سدءُسمائے دنیاءَبیگانگ ات۔ ھردیں چکاں تکانسری ءُ بے تاھیریءَ دیست،آئیءِ دست گپت ءُ نادینت، تکانسری ءُ بے تاھیریءِسبب جست کت، بلے آئیءَ چکانی دیما ھچبر زنگ نہ جت۔

یک شپءِ پیر مرد واب گندیت۔آ دریاءِ دیما اوشتاتگ وتی دلءِ درائیں رازاں درانگاز کنگءَانت۔

”او دریا ! منی ءُ تئی عمر ھر دو پیر انت، من وتی زندے بھاراں کدی نہ مارتگ کہ یک روچءِ کیت، من پیرءُعاجز باں،کپتہ کار باں،،، تو اوں منی پیما وتی زندمان محکمیں چولاں گوں چیزانی لیپگ کنگ گوازینتگ۔۔۔ اشکن دریا ! چے بنی آدمے زندگی ایوک ھمیش انت کہ آ بس پہ وت زندگ بہ بیت۔تئی جلگھیں باتنءَوڑ وڑیں لانچءُمیل کائینت ءُ رونت،ماھیگءُ پاگاس زند گوازینگءَانت۔ منی ھم زندءَبازیں بیلءُآلاڑ دیستگ،،، بلے من پہ وتا چے کتگ،اے باوست جبینءَقولنج انت۔۔۔ جی بات پہ تو،،، انگت انسانءَ زندگ دارگے توجیل دارئے،،،اخ خ خ من باتاں ؟؟؟ ایوکا چادر وتی پاداں پرّ داتگ، نوں من شر زاناں کہ دور گار کتگ،زندءِگڈی سندءَ دلءِایمن کنگءَ دستءُپاد ھمراہ داری نہ کن انت۔۔۔ حیف سد حیف، چے بنی آدم بس وتی واھشانی پلہ مرزیءَ زندگیءَ بہ گوازینیت ؟

او درریا،بیا دریا منا وتی اندرءَاوگار،،، اَے دریا من اے لائق نہ آں، کہ زندمانءِلنککءَبہ گراںءُ زند گوازینگے توجیل بہ ساچ آں۔“

ھمے گپءَ گوں دریاءَ وتی چولانی بانزل پچ کت انتءُپیر مرد امبازءَزرت،انچش پیر مرد چہ وابءَ جھسر ات،تحتءِسرا نشت،چمءِآزمانءَسک دات انت۔آزمان استالاں براھدار کتگ ات،،، بلے پیر مردءِ دلءَ استال اشکر انتءُ چہ آزمانءَ یک یکءَ آئیءِچماں ایر روان انت۔

پیر مرد تحتءَایر اتک،سواسءِ پادا کت انتءُلٹءَ جک دیان بوتءُچہ کمپانءَدراتک۔ سر شپءِ حاموشیءَپیر مردءِ لٹءِ جک دئیگءُبرے برے کچکانی چانگگءُکروسانی بانگاں ابید دگہ ھچی حرام بات گوشاں نہ کپت۔

پیر مرد جنزان ات،شپ ایر دیان ات،استال یک پہ یکءَ ٹمبان ات انت،داں گوربامءَ پیر مرد آپ بندےءَ سر بوت،ساعت ئے مھتل بوت،چمدا پیر مرد کاروانےءَگون کپتءُمیتگءَگارءُبیگواہ بوت۔

سہبءَ وھدے پیر مردءِ چکءُ نشار پاد اتک انت۔پتءِتحتءُنپاد ہورک انتءُآئیءِ پادانی نشان کمپانءَداں ڈنّ روان انت۔ چکاں پتءِشوھازءَپدءُپدگیری کت،کشءُکرّئے میتگ دو میتگ کت انت،بلے بے سوب بوت انت۔ پتءَ وتارا ملکءِ دریاءَ سر کت۔ دریاءِ ابیلءَ اوشتاتءُترانءَ بنا بوت،کہ دور ماں دریاءَ سنگار سھرا بوت۔ سنگار پیر مردءِنیمگءَ آھان بوت،آزمانءَ پیر مردءِ آتراپءَ دو ھیلی کاپٹر بال ات انت۔ ھیلی کاپٹر جل بوھان بوت انتءُلانچ تیابءَنزیک کنان بوت انت۔ ھیلی کاپٹرءَ فوجی ئِے دور گندءَات ءُ لانچءَ چہ ھم یک فوجیءِ دور گندءَ ات۔

پیر مردءَ وتی راستیں دست زرتءُ پیشانیءَ گومب کت،چشمکءِپُشتءَچماناں زور پرداتءُسنگار چارت کہ چونیں لانچ انت،چپیں دستءَلٹءِ چست کت کہ آھاں اشارہ کناں،انچش چہ برزا تیرءِ سست پہ پیر مردءَءُآئیءِ چپیں نیمگءَدلءَپیوست بوت۔پیر مردءِ دستے لٹ پہ راھےءُ جندءِ زمینءَ آریاہ بوتءُ چاریں آتراپاں سنگارءِلشکراں پیر مردءِ لاش انگر کت۔***