(آزمانکُک,, ھالو،، قدوس بلوچ )

یک انگت ءَ ھالو ءِ توار بوت، نازینکے بندات بوت ءُ پدا چاپانی توار چو گرند ءَ ٹک ٹک کنگا ات انت- من ھیران بوتاں ءُ پریشان بوتاں کہ یا اللہ اے چی بوھگا انت- میتگ ءِ کُلیں جنیں، مردیں، کسان، مزن، چوریگ درست دیم ھمانگو تچان ات انت- من ھمےرُمب ءِ نیمگا روگ ءَ اتاں-ھرکس دیم پہ ھمے رُمب ءِ پُشت ءَ روان اَت بلے من انگت نزانت کہ کئی سیر ات- بازیں مردماں جست کنگ ءَ رند ھم کس ءَ پسّہ ندات- من دل ءَ جیڑگا اتاں کہ کس نزانت کئی سیر انت؟ من اےھم گندگا اتاں کہ کس کسیگی نہ انت-
ھمےدمان ءَ دھکاں ناکو پیرو گون وتی برد ءُ میتیناں ھمے رُمب ءِ نیمگا تچان ات- من کوکار کت ناکو ناکو بلے منیگی نہ ات- پیسکگ ئِے ھم نہ کت- من ھمے وڑا مُچّی ءِ پُشتاں روان اتاں- دانکہ ھما مُچّی ءِ نزیک ءَ سربوتاں-من انگت نزانت کہ سالونک کئے انت؟ سرجمیں میتگ ھمودا مُچّ ات- نازینک ءُ چاپ ات- تیرانی توار ءَ سرجمیں دنیا سرا زُرتگ ات- دمانے ءَ پد سالونک سنگتان زُرت ءُ دیم پہ لوگ ءَ برگ ءَ اتنت- منی نزانگ انگت برجاہ ات پرچاکہ من کسی سیر ءَ اِنچُکیں مچّی نہ دیستگ ات- تیرانی توار گیش بوان ات-
نازینک ھم بندی ءِ وڑا نہ ات- سالونک وتی جاہ ءَ سربوتگ ات- درستیں مردم تُرْک ءُ نُکّ اتنت- سالونک ءِ لوگ ءِ گوزگ ءَ گون تیرانی توار ءَ سرجمیں میتگ سر ءَ زُرت-کساس نیم سھت ءَ رند تیرانی توار بند بوت ……توار ءِ بند بوھگا گوں من سنگتے جست کت :اے سالونک کَے انت؟ انچو مردم سیر ئِے اتکگ؟
….واجہ گوں ارسیگیں چماں!!! شھید زاھد جان انت کہ شھید کنگ بوتگ ……منی دست ءِ سنگ چہ دست ءَ لگُشت ءُ پاد ءِ سرا کپت-من جیڑگ اتاں- زاھد جان ءَ گُشتگ ات کہ دوزخ ءُ جنّت ءِ گیش ءُ گیوار ھمے دنیا ءِ تھا بیت ۔۔۔۔۔۔گوں ارساں یا الله من ءَ ھمے وڑا سالونک بہ کن ۔۔۔۔۔۔آمین
٭٭٭٭٭٭٭٭٭٭
باسک ءَ ایر کنوک طارق پیشوکانی