آزمانک۔ بیگواہ ۔ آزمانکار: الطاف بلوچ
آزمانک
*بیگواہ*
الطاف بلوچ
(کونجاں سستگیں ہمراھےءِ تاکدیم 50ءَ چہ)
آئی زانتء ُ سماءِ زِر ہمنکس جُہل اَت کہ دریاءِ نیلیں زِرءِ جُہلانکی اَت۔مردُم شُناسی ءَ آئی ءِ دَرور نیست اَت۔یکء ُ دو کلاک ءَ اگں کسےءَ گوں دیوانء ُ مجلس یے بہ کُتین ہما دمان ءَ زانتگ اَتے کہ دیم ءِ مردُم تچکء ُ ایمانداریں مردمے یا ٹَگّء ُ لُچّیں مردمے،بلے آئی ءَ کدی اوں اے ھبر کسےءَ گوں پدّر نہ کت کہ آئی ءِ مارشتء ُ مردُم شناسیءِ کَچّء ُ جُہلانکی اے کدّءَ سر اِنت۔
شہرءِ چارراہء ُ دَگّانی سرا لس مھلوک ءِ بے چاڈیء ُ زہر شانی بہ بنت یا کہ مُلکء ُ ڈگارانی سرا بزگرء ُ دھکانانی جاور بہ بنت،میاں اُستمانی چِستء ُ ایر بہ بنت یا کہ راجی سیاست ءِ نزوری بہ بنت،معاشیات،فلسفہ،راجدپتر،لبزانکء ُ زندءِ ہر تک ءَ آئی ءِ پوائنٹ آف ویو ے اَست اَتء ُ آئی ءَ اے بابت ءَ مزنیں زانتء ُ سرپدی ءَ ابید اوں اے جیڑہانی گیشواری ءَ مزنیں آئیڈیاء ُ دزرس یے اَست اَت۔بلے آئی ءِ اے علم و زانت ءَ ناں کسےءَ را نپے دات کُتگ اَت ء ُ ناں کہ نُکسےءِ سبب بوتگ اَت۔بس آئی ءَ مدام اے مار اِت کہ من ہِچ نہ زاناںء ُ وتارءَ چہ اندگراں نزانت کارء ُ کمتریں مردمے لیک اِت۔
برے برے وتی زانتء ُ زانگے گوں اِندِگراں دیم پہ دیمے کُت تہ گوں وت لبج اِتے کہ میران تو باز، زانے، بلے افسوز کہ تو احساس کمتری ءِ آماچ ئے۔وتی زانتء ُ زانگ ءَ ہچ کاربست نہ کنے،بلے یکبرے پدا پہ اے ھبرءَ گلء ُ وَش اَت کہ منی اے زانتء ُ زانگ ءَ کسے سرپد نہ اِنتء ُ ہمے سبب اِنت کہ وہدءِ سردء ُ گرمیں آلاڑاں انگت سلامت اِنتء ُ دم کَشّگا اِنت۔
نمروؔز مدام چارراہانی سرا گشتانک دئیگا اَت،من آئی ءَ را سرپد کنگ ءِ بازیں جُہدے کُت کہ رھبند اے نہ اِنت۔اے مھلوک اے رنگ ءَ پہ چارراہ ءِ اوشتگء ُ گُشتانک ءَ سرپد نہ بیتء ُ بدواہ پروش نہ ور اَنت،دگہ توجیلے سازگ لوٹ ایت، بلے آئی ءَ من ءَ لگور گُشت ء ُ گوں بدواہاں ہمراہ داری ءِ تیِرُک پرداشت اَنت۔بلے نمروز کُج اِنت؟ عبدُل کہ کمپیوٹرء ُ ٹیکنالوجی ءِ زانتء ُ زانگ ءَ سرریچیں ورنایے اَت، آئی ءَ را من باز براں گُشت کہ تئی کار دگرےء ُ تو دگہ کارےءَ وتی انرجی ءَ زوال کنگائے۔آئی ءَ اوں یکبرے پدا ہما تیِرُک منی دل ءَ پِرداشت اَنت کہ چِدء ُ پیسریگیں سنگتاں کُتگ اَت۔بلے عبدُل ءِ اوں گْواہ نیست کہ کجا شُت۔؟میران وتی دل ءَ یک پہ یکءَ جاوراں جیڑگ ءَ اَت۔
یک زمانگے انچیں اَتک کہ میران ءَ را ہر یکےءَ کہ دیست وتی راہ اِش تاب داتء ُ آئی ءِ جندء ُ گپّ کسےءَ کِمار نہ کُت اَنت ۔بازینےءَ آئی ءَ را مُرتد ء ُ بازینےءَ آئی ءَ را بدواہانی چارُو لیک اِت۔بازینےءَ چمّء ُ دو چمّ کُتگ اَت کہ آئی ءِ جندءَ گْوازیناں، بلے ہما بوھگی اَت کہ آئی ءِ بَھت ءَ نبشتہ اَت۔!
میران ءِ ملوریء ُ جیڑگانی ھال ایش اَت کہ آئی ءَ یکبرے پدا وتی کوْہنیں پرتگء ُ پُتینکانی پَٹّگ بنا کُت۔آئی ءَ را وتی پجّار کنگی اَتء ُ وتی کارست درگیجگی اَت ۔آئی ءِ ہَستی( وجود) زمانگ ءِ دنزء ُ گُبارانی چیرا چیر تَرّ اِتگ اَت۔بلے آ اے پُتینکانی تہا وتی پجّارءِ شوہازگ ءَ سوبین نہ بوت۔آ چہ وتی کمپان ءَ ڈن دَر اَتکء ُ شہرءِ چارراہ ءِ نیمگ ءَ رھادگ بوت۔آئی ءَ پجّاروکے ءَ ڈیِکّ وارت ء ُ گوں آئی ءَ دست ءُ دْروہ بوت، بلئے آئی ءَ ہچ کِمار نہ کُتء ُ میران پجّہ نیا ئورت۔دیما جُنزاں ہما ہوٹل ءَ پُتِرت کہ اے ہوٹل ءَ سہب ءِ سرا داں کہ شپ آئی ءَ گوں سنگتاں نِشتگء ُ بحث و باوست کُتگ۔بلے ہوٹل ءِ کاردار۔منیجرء ُ ہچ کسےءَ آئی ءَ را جاہ نیائورت۔!آئی ءَ انگت پروش نہ منّ اِتء ُ وتی شوھازءَ دیما جنزاں بوت داں شہرءِ مزن چارراہ ءِ سرا یک مزنیں مُچّی یے دیستے کہ یک سیاسی گل یےءِ جلسہ بوھگا اَت۔آئی ءِ چمّ روژناہ بوت اَنت کہ اِدا الّم کسے آئی ءَ پجّہ کار ایت۔بلے اے مُچّی ءَ اوں کسےءَ آئی ءَ را جاہ نیائورت۔اے مُچّی ءِ کش ءَ جتگیں کُرسیانی سرا روتاکء ُ ھال تاکانی جہگیر نِشتگ اِتاں آئی ءَ جیڑ اِت کہ اے وَ الّم ءَ منی کُمک ءَ کن اَنتء ُ من ءَ پجّہ کار اَنت۔بلے اشاں اوں کسےءَ آئی ءَ را جاہ نیائورتء ُ ہر یکےءَ گوں وت ءَ سُک سُک کُتء ُ گُشت کہ ُامیت ایں چیریں چارُویے ء ُ مئے رندپدان اِنت،وتا چریشی ءَ رکھّین اِت۔
میران سکّ دلپروش اَت کہ شہرءَ کسے اوں نیست کہ آئی ءِ جندءِ شوہازءَ آئی ءِ کُمک ءَ کُت بہ کنت۔آ یکبرے پدا دیم پہ وتی کمپان ءَ رَھادَگ بوتء ُ جیڑان اَت کہ مرچی الّم ءَ من وتی کمپان ءَ ٹال ٹا ل کناںء ُ ہر رنگ ءَ وتی پجّارءَ کناں کہ من کئے اوں کہ اے شہرءَ ایوک اوں کسے اوں، منی بابت ءَ ہچ نزانت۔
آ، لوگ ءَ سر بوھگ ءَ گوں دْرَہیں کُوٹی،امبارانی پُتینکاں یک یک کنت، بلئے بے سوب بیت ء ُ آئی ءَ ہچ چیز دست نہ کپیت۔ بے سوبیء ُ مایوسی ءِ گُڈّی سیمسراں سر بوھگ ءَ پد آئی ءِ چم پرُشتگیں ڈلونکےءَ کپت اَنت کہ اِشی ءِ لمب ءَ کسانیں آدینکی ٹُکُّرے چیر تَرّ اِتگ اَت۔میران ءَآدینک کش اِتء ُ ساپ کُت داں آئی ءَ آدینک کہ چار اِت تہ آئی ءَ وتارا پجّہ آئورت۔میران گل ءَ بال بوتء ُ آئی دل ءَ اَت کہ آ چہ گل ءَ کُوکارے جنت کہ آ بازیں جہدےءَ پد وتی شوہازگ ءَ سوبین بوتگ۔بلے ہمے دمان ءَ چہ کمپان ءِ دیوالاں مزنیں سِلہہ بندےءَ دور کُتء ُ آئی ءِ دیم گوں سیاھیں پُچّے ءَ بستء ُ گوں وتءَ بُرت۔
٭٭٭
