آزمانک: دود ءُ ربیدگ ءِ مراگش ءَ الم بیا
آزمانک: دود ءُ ربیدگ ءِ مراگش ءَ الم بیا
آزمانک کار: سکی ساوڑ
سابر ءَ وتی دوستار شاہ گل ءَ کلوھے روان دات ءُ گوشت” ھال کن جگر تو گڑا باندا دود ءُ ربیدگ ءِ مراگش ءَ پیداک ئے “؟
شاہ گل ءَ پسہ دات” ھو جگر الم کایاں تو ھم پیداک ئے”؟
سابر ءَ کندگے جت ءُ پسہ دات” ھو اڑے من الم رو آں پرچاکہ دود ءُ ربیدگ ءِ روچ ءَ جنکانی ناچ من ءَ سک باز دوست بنت کہ ناچ ءِ وھد ءَ وتی سریگ ءَ دَور دے اَنت گڑا ایشانی سینگ ءِ چارگ ءِ کجام مزاہ اللہ اللہ”.
شاہ گُل ءَ کندگے جت ءُ پسہ دات” تو اڑے سکیں بدتمیزے ئے بزاں تو آوانی سینگانی چارگ ءَ رو ئے “؟!
سابر ءَ پسہ دات” اُپ یار تو سینگانی نام ءَ مگر کہ انوں دگہ وڑ بوگ ءَ آں، دل انچوش بوگ ءَ اِنت کہ ناچ انوں شرو بوتیں، ترا یاد نہ بیت پیسری رَند ءَ نوک سینگیں جنکاں کجام ڈول ءَ ناچ کرت، من ءَ سک دوست بوت اَنت پرچاکہ ایشانی پُشت ءُ پد ءَ سینگ سک ڈولدار اِت اَنت، منی دل ءَ باز گوشت بہ رو گوں ھمے شوکیں جنکاں ناچ بہ کن ءُ کمو دست………..آئی ءَ کہ وتی گپ داں ھمد ءَ سر کرت داں شاہ گُل ءَ کندگے جت ءُ جُست کرت” تو سک باز دُور روگ ءَ ئے ، زاناں منی سینگ ھراب انت کہ تو آوانی توسیپ ءَ ئے؟ تو ھرچی گوشتگ من ھما وڑ کرتگ بلے دود ءُ ربیدگ ءِ روچ مھلوک ءِ دیم ءَ ناچ نہ کرتگ پمیشکا منی سینگ ھراب اِنت؟ شاہ گل بزگ ءَ دل آؤرت ءُ بس کرت”.
سابر ءَ زوت زوت پسہ دات” نا اڑے من کدی گوشتگ تئی سینگ ھراب اِنت، تئی سینگ ءِ وَ دگہ مزاھے واللہ”.
شاہ گُل ءَ وتی گپ پد ءَ دیم ءَ برت ءُ گوشت” چوناھا منی دل باز گوش اِیت دود ءُ ربیدگ ءِ روچ ءَ ناچ بہ کن، بلے من ءَ وتی برات ءِ کرّ ءَ ترس اِیت پرچاکہ برات سک ھبر دنت کہ ناچ مہ کن بلے دود ءُ ربیدگ ءِ روچ الم بہ رو ئے کہ مئے بلوچانی پجار اِنت، من گِند ئے ناچ بہ کن آں گڑا کجام چَنڈینگ، ترا یاد نہ بیت مھزیب ءِ آروس ءَ من چون ناچ کرت تو پد ءَ گوشت تئی ناچ سک شوک بوتگ”؟.
سابر ءَ کندگے جت ءُ پسہ دات” اڑے تئی سینگ ناں بلکیں درستیں چیز من ءَ دوست بنت، بلے ھمے یکیں روچ ءَ کہ اے ناچ کن اَنت گڑا دل گوش اِیت آواں ھم بچار کہ کمو نوکیں سامانے ءَ چم کپ اِیت، اڑے من بے ھیال بوت آں واکی مھزیب ءِ آروس ءَ تو باز وش ناچ کرت، رند ءَ کہ مارا کمو موھے رس اِت گڑا منی دست تئی سینگ ءَ کپت اَنت پورا من جنت ءَ اِت آں، کجام مزاہ اڑے، آ شپ مے یادگاریں شپے اَت”. سابر ءَ پد ءَ مزنیں کندگے جت ءُ بس کرت.
شاہ گل ءِ لُنٹانی سر ءَ ھما شپ ءِ وشیانی تام تالان بوان اِت اَنت ءُ پسہ ئِے دات” راست گوش ئے آ شپ سک وش اَت بلے باندا ھم کمو موھے پَٹ ایں کہ من سک دگہ وڑ آں پرچاکہ دو ھپتگ ءَ بُرز اِنت تُنیگ آں”.
سابر ءَ پسہ دات” من وت برباد آں، یکبرے سابر ءِ دل ءَ ات کہ من شاہ گل ءَ ھال دے آں دوشی من کلسوم ءِ کِرّ ءَ وتی تُن پروشتگ بلے پد ءَ نہ گوشت ئِے کہ شاہ گل سرپد بیت ءُ پد ءَ منی کرّ ءَ تُن پروشگ ءَ نئیت، گڑا سابر ءَ وتی گپ دیم ءَ بُرت ءُ گوشت” بلے تو ھما پیسری رنگ ءَ میا کمو وت ءَ شر بہ کن، منی ھیال ءَ تو سمج اِت من چے گوشگ لوٹگ ءَ آں”؟ ھاھاھاھا
شاہ گل ءَ کندگے جت ءُ پسہ دات” اڑے من زی بازار ءَ پہ ھمے ھاتر ءَ شُتگ اِت آں، باندا تو من ءَ وت گِند ئے، بلے ھمے دود ءُ ربیدگی روچ سک وش اِنت گند ئے”؟
سابر وَ ھمے روچ ءِ لوٹوک اَت گڑا پسہ ئِے دات” من ترا پیسر ءَ چے گوشت؟ بزاں سک وش اِنت.
آ واں ھال ءُ اھوال کنگ ءَ پد بس کرت، دومی روچ ءِ سُھب ءِ دہ ءَ سابر ءِ سنگت جھانزیب ءَ ھال کرت ءُ گوشت” سابر جان مروچی آرٹس کونسل ءَ بیگواھیں مردمانی واستا سے بج ءَ روانک ءُ زھرشانی یے بوگ ءَ اِنت گوں وتی لوگ ءِ مردماں تیار بو بَس مئے لوگانی کرّ ءَ کیت گڑا پد ءَ رو ایں “.
سابر ءَ کندگے جت ءُ پسہ داتگ” اڑے جھانزیب تو نی شر گنوک ئے واللہ ما ناچ ءَ یلہ کن ایں پہ بیگواھیں مردماں توار چِست کن ایں!؟ اد ءَ کَس بیگواہ نہ اِنت اے درست کوہ ءَ شُتگ اَنت، اگاں کمیں.مردم بیگواہ اِنت آ اوں بے گناہ نہ اَنت، ھمد ءَ سابر ءَ گھاری زاھے دات ءُ بس کرت”.
جھانزیب ءَ پسہ دات” تو اڑے سکیں بے گیرتیں مردمے ئے، تو بلوچے نہ ئے کسم اِنت، برو تو گوں وتی لوگ والایاں اکبال ءِ ھمراھی ءَ ناچ بہ کن”.
سابر ءِ دل ءَ اَت دگہ زاھے دے آں داں جھانزیب ءَ پون کَٹ کرت بلے انگت سابر ءَ وتی زاہ دات.
ھمے وھد ءَ سابر ءَ وتی بلوچی چَوٹ پادا ، گُد گور ءَ ءُ دہ گَزی ئیں پاگے سر ءَ بَست ءُ شاہ گل ءِ سر ءَ کلوھے روان ئِے دات ءُ گوشت ” من دود ءُ ربیدگ ءِ جاہ ءَ روگ ءَ آں تو ھم الم بیا”.