آزمانک لاچاری۔۔۔۔۔۔۔ موپاساں، رجانک : انام رزا
آزمانک
لاچاری۔۔۔۔۔۔۔ موپاساں
رجانک۔۔۔۔۔۔ انام رزا
دو لاچارانی دردناکیں کسھے ، یکے ءَ وتی آدت پیلوکنگی ات ءُ دومی ءَ وتی گژن پروشگی ات ۔ چوٹ ءُ پرتروکیں کوہ یکشل ءَ روان ات انت ۔ ریل ءِ پٹی دریا ءُ سیاہ ڈنانی میان ریکانی سر ءَ چیرگیجگ بوتگ ات ۔ ریل ھمے دمان ات کہ چہ جنو آ ءَ در کپتگ ات ءُ نوں پٹی ءِ سر ءَ چو سیاہ مارے ءَ شیپ گران ات ۔ آ برے برے گارے ءَ پترتگیں رسترے ءِ وڑ ءَ ھونڈے ءِ تہ ءَ گار بوت ءُ کمے دیم ءَ روگ ءَ رند پد ءَ گندگ بوت۔
لاری ءِ گڈی ڈبہ ءَ یک شرنگ ءُ ورنائیں جنینے نشتگ ات۔ آئی ءِ دیم پہ دیم ءَ یک ورنائیں مردینے نشتگ ات ۔ آ دویں بے توار ات انت ۔ بلے برے برے یکے ءَ دومی ءِ نیمگ ءَ چمے چمے جت ۔ جنین ءِ امر کساس بیست ءُ پنچ سال بوتگ ات۔ آ تاکچہ ءِ دپ ءَ نشتگ ات ءُ ڈن ءِ ندارگ ءَ وت ءَ وشنود کنگ ءَ ات ۔آ چو لس کار کنوکیں دھکانکاریں جنینے ءَ تمردیں بالادے ءِ واھند ات ۔ سیا ہ ءُ رژناھیں چم مکیں دلبند بزیں انارک ، آئی ءِ دراہ جانی ءِ پدریں چیدگ ات انت ۔ آئی ءِ پادانی چیر ءَ گپڑے پارسل ایر ات ءُ یک سپتکے آئی ءِ کٹ ءَ ایر ات ۔
ورنائیں مردین ءِ امر کساس بیست سال بوتگ ات ۔ آ لاگریں لیٹےات ءُ آئی ءِ دیم روچ ءَپیلاشتگ ءُ سیاہ کتگ ات ۔ آئی ءِ سیا ہ تابی ءَ چہ پدر ات کہ آَ زگریں روچ ءِ سر ءَ کار کنگ ءَ ھیلدار انت ۔ آئی ءِ دیم ءَ گرنچے ایر ات آئی ءِ مال ءُ متاہ بس ھمیش ات۔ گرنچ ءِ تہ ءَ یک جوڑھے چمپل یک جوڑھے پچ ءُ یک جیکٹے ءَ ابید دگہ ھچ مان نیست ات ۔ آئی ءَ وتی برد ءُ ٹیکم گوں سادے ءَ بستگ ات انت ءُ جھل ءَایر کتگ ات انت ۔ گمان ات کہ آ پہ کارے ءِ شوھاز ءُ درکپتگ ات ۔
ترندیں روچ تیاب ءَ چو آس ءَ گوارگ ءَ ات ۔ مئی ءِ گڑی روچ ات انت ۔ ریل ءِ پچیں تاکچھاں چہ لھم لھمیں وشبوھے شنگ اتگ ات ۔ نارنج ءُ پرتکالانی درچک چہ زیبائیں پلاں چکار ات انت ۔ آیانی وشبوہ گوں جنگلی گلابانی وشیں بوھاں ھوار بیت انت ءُ یک دلکشیں بوھے تالان اش کت ۔
اے دمگ ءَ گلاب سک باز ات ۔ ھر نیمگ ءَ گلاب ات انت ، گلابانی دلکشیں بوہ ءَ دائم ءَ چاگرد وشنود کتگ ات ۔ اے دلکشیں وشبوہ ءِ سوب ءَ یک دائمی تاھیرے شنگ اتگ ات ۔
ریل سست سست ءَ روگ ءَ ات ۔ گوش ئے زاناں آ ھم ابرم ءِ اے گلباگ ءَ پند جنان ءُ وشنود بوھان انت ۔ ریلءَ لھتے اسپیتیں لوگانی کر ءَ کسان کسانیں اسٹیشناں داشت پد ءَ سھتے ءَ رند پیک ئےِ جت ءُ راہ گپت ۔ اے دمان ءَ ھچ مساپر ریل ءَ سوار بوگ ءَ نہ ات ۔ گوش ئے زاناں سرجمیں دنیا ھبینگ بیتگ ات ءُ بھارگاہ ءِ اے گرمیں سھب ءَ کس پہ سپر ءِ دراھگ ءَ وش نہ انت ۔ جنین دم پہ سھت ھبینگ بیگ ءَ ات بلے وھدے آئی ءَ سما کپت کہ آئی ءِ کٹ ءَ ایریں گرنچ شترگ ءُ کپگ ءَ انت تہ آئی ءَ وتی چم پچ کت انت ءُ گرنچ ئےِمھر داشت ءُ پد ءَ چندے ملٹ ءَ تاکچہ ءَ ڈن چار ات ءُ پد ءَ ھبینگ شت ۔چہ آئی ءِ پیشانیگ ءَ ھید پٹان ات انت آ پہ جزاھے گین کشگ ءَ ات گوش ئے زاناں آ گٹوس ات ۔
ورناہ ءَ زنوک دلبند ءِ سر ءَ ایر کتگ ات ءُ جپا کشیں دھکانی وابے ءَ تاھیر گپتگ ات ۔
ریل چہ اسٹیشنے ءَ راہ گپت جنین ءَ ناگت ءَ بست بوت ءُ چہ گرنچ ءَ یک ڈبل روٹی یے ءُ لھتے کوھلیں ھیک ءُ لھتے تاجگیں میمیچ ءُ گوں انگورانی ترنداپاں ورگ ءَ لگ ات ۔ ورناہ اوں پاد اتکگ ات ۔ آ ورگ ءِ وھد ءَ جنین ءَ چارگ ءَ ات ۔ آئی ءِ چم جنین ءِ دستانی لنکہ ءَ سک ات داں لنکہ آئی ءِدپ ءَ بہ شتیں ۔ آئی ءِ گب کل ءَ کپتگ ات انت ءُ دویں دست ئےِ دلبند ءَ بستگ ات انت لنٹاں گٹ پاچگ ءَ ات۔آئی ءَ برے برے جنین ءِ نیمگ ءَ دز چمی چار ات ءُ برے برے آیانی چماں ڈیک وارت۔ آ پشل بوت ءُ دیم ئےِ تاب دات ۔
جنین ءَ ھمک لنکہ ءِ ورگ ءَ رند گٹے شراب تنگ ات ءُ کمے دم کت ۔
ھمے داب ءَ ساھتے ءَ رند درستیں چیز چہ نگاھاں گار بیت انت ھیک ڈبل روٹی میمیچ ءُ شراب ھچ سر نیتک ۔ انچو کہ جنین ءِ ورگ ھلاس بیت انت ورناہ ءَ پد ءَ وتی چم نز کت انت ۔
جنین ءَ کمے بے تاھیری سما کت آئی ءَ وتی دست پشت ءَ برت ءُ وتی ترند بستگیں گور بندءِ بٹن بوتک ۔ ھمے دمان ءَ ورناہ ءَ ھم چم پچ کت انت ءُ آئی ءِ نیمگ ءَ چار ات ۔ جنین ءَ ورناہ ءِ نگاھانی پرواہ نہ داشت ءُ گوں بے تواری ءَ وتی جیگ بندءِ بٹن ءَ بوجگ ءَ لگ ات پرچا کہ دلبند ءِ چستی ءِ سوب ءَ پشک ءِ دیمی نیمگ سک تنک ات ۔ جنین ءَ انچو کہ دو بٹن پچ کت آئی ءِ دیم رژناہ بوت ءُ آ تاھیر گپت ، آئی ءَ اتالوی زبان ءَ گوں ورناہ ءَ درائینت ۔ انچیں گرمے کہ مردم ءِ دم پر نہ بیت ۔
ورناہ ءَ گوں ھمے زبان ءُ ھمے گالوار ءَ پسو دات ۔ ءُ اے وڑیں موسماں بس سپر کنگ بیت ۔
اراں تو پائیڈ مونٹ ءِ جھہ منندے ئے؟ جنین ءَ جست کت ۔ ھو من چہ آسٹی ءَ پیداک آں ۔
من کسالی ءِ جھہ منندے آں۔ جنین ءَ گوشت ۔
آ دویں ھمساھگیں ھلکانی جھہ منند ات انت ۔ دویناں وت مہ وت ءَ گپ ءُ رپ بنا کتءُ ھمے دابیں لس ھمروچیگیں گپ کہ اے مردمانی ھیل انت ۔ آیاں وتی لوگ ءُ سیاد ءُ وارسانی بابت ءَ گپ بنا کت ءُ گڑا سرپد بیت انت کہ آ دوینانی بازیں پجاروکے یک انت ۔ آ نوک نوکیں نام گران ات انت ءُ پجاروکیں نام آیانی سیادی ءَ گیش نزیک کنان ات انت ۔ پد ءَ آیاں وت ماں وتی گپ بنا کت ۔ جنین سور کتگینے ات آئی ءَ سے چک ھست ات ۔ چک آئی ءَ وتی گھار ءِ کر ءَ یلہ داتگ ات انت ءُ انوں پرانس ءِ یک مزنیں کھولے ءِ جنینے ءِ کر ءَ روگ ءَ ات پرچا کہ آئی ءَ را جنین ءِ ننکیں چک ءِ شیر میچینگ ءِ زمہ واری دیگ بوتگ ات ۔
ورناہ پہ کارے ءِ شوھاز ءَ درکپتگ ات ۔ آئی ءَ ھال رستگ ات کہ مارسیلزم ءَ کار رسگ ءِ امیت ھست پرچا کہ اود ءَ باز ماڑی بندگ بوگ ءَ انت ۔
چرے گپ ءُ رپاں رند دویں بے توار بیت انت ۔ گرمی چہ سگگ ءِ ھد ءَ ڈن ات ۔ گوات ءِ ھوری ءَ دنز ءُ لوڈ اوں چست بوگ ءَ ات انت ۔ گلاب ءُ نارنجانی وشیں بوہ ھم آتار ات انت دویں مساپر یک رندے پد ءَ واب کپت انت۔ میان ءَ ورناہ ءِ چم پچ بیت انت ءُ آئی ءَ وتی دیم ءَ نشتگیں جنین چمے جت ۔ جنین ءِ چم نز ات انت ۔ءُ آئی ءِ دروشم جوزگ چکار ات ۔ ورناہ ءَ داں دیراں آ چار ات پد ءَ آئی ءَ وتی چم بند کت انت ءُ پد ءَ ناگھاں دوینانی چم ھواری ءَ پچ بیت انت ءُ یکے ءَ دومی ءِ نیمگ ءَ چار ات ۔ روچ دریا ءِ نیمگ ءَ ایر روگ ءَ ات ءُ دریا ءِ جھل ءُ نیلگیں آپ زرد چک بوتگ ات ۔ گوات سارت تر اتگ ات ۔
ورناہ ءَ مار ات کہ جنین ءِ چم تکانسر انت ءُ آئی ءِ دیم ءِ دروشم ءَ بے تاھیری یے سرکشان انت گوش ئے زاناں آئی ءِ دم بند بوان انت ۔ آئی ءِ جیگ نوں سرجم ءَ پچ ات ءُ آئی ءِ چم گوش ئے ملار ات انت ۔ زیکین انت من شیر نہ میچینتگ انت ۔ جنین ءَ نرمیں گالوارے ءَ گوشت ۔ انچو سما بوگ ءَ انت کہ نوں من تساں ۔
ورناہ ءَ ھچ نہ گوشت ۔ آ نہ زانگ ءَ ات کہ چے پسو بہ دنت ۔ جنین ءَ گوشت ۔ وھدے جنینے چو منی پیم ءَ دراہ جان بہ بیت ءُ آئی ءِ تالھہ ءَ اینچو شیر بہ بیت تہ پرائی ءَ روچے سے رند ءَ شیر میچینگ المی انت ۔ اگاں نہ گڑا اجبیں تکانسری یے بیت ۔ دل ءِ سر ءَ پورا بارے ایر انت ۔ دم اوں پر نہ بیگ ءَ انت ءُ سرجمیں بدن واب انت ۔ بازیں شیر اوں جنجالے ۔
جی ۔۔۔ ھو ورناہ ءَ گوشت ۔ من گندگ ءَ آں کہ تو سک تکانسر ئے۔
جنین ءِ دیم زرد تران ات ءُ آئی ءِ سرجمیں بالاد چہ ھید ءَ میچل اتگ ات ءُ آ تسگی ات ۔ من ءَ بس لنککانی سر ءَ پرنچگی انت ۔ جنین گوں وت ءَ جوڑگ ءَ ات ۔ ۔ پد ءَ شیرانی چمگے بجیت ۔ گندگ ءَ اے اجبیں چیزے بیت بلے اشی ءَ پرواہ نیست ۔ ترا باور نہ بیت کسالی ءَ بازیں جنینے منی چارگ ءِ واستا مچ بیتگ انت ۔
پکا؟
ھو پکا من ترا انوں ھم پیشداران ئےِ بلے پریشی ءَ من تاھیر نہ گراں پرچا کہ لنککانی پرنچگ ءَ اینچو شیر در نئیت کہ منی دل ءِ سر ءَ ایریں بار سبک تر بہ بیت ۔ جنین بے توار بوت ۔۔
ریل ءَ اسٹیشنے ءَ داشت پیٹ پارم ءِ سر ءَ چل ءَ ششتلیں یک نزور ءُ لاگریں جنینے ءُ چکے بڈ ءَ ات ءُ اوشتاتگ ات چک گریوگ ءَ ات ۔ جنین ءَ سارتیں گینے کش ات ءُ گوشت ۔ من اے جنین ءَ کمک کت کناں ۔۔۔۔ ءُ اے چک منی کمک ءَ کت کنت ۔
ترا گمان بیت کہ من مالداریں جنینے نیاں من وتی لوگ ءُ جاگہ ءُ وتی ننکیں چک پہ چندے زر کٹگ ءِ واستا یلو داتگ ءُ اتکگ آں بلے اگاں من ءَ اے چک ءَ را شیر میچینگ ءِ رزا دیگ بہ بیت تہ من اشی ءِ مات ءَ پنچ پرانک دیاں اے وڑ ءَ اے چک ھم آرام بیت ءُ من ھم تاھیر گراں ۔ من ءَ نوکیں زندے رسیت۔
آ پد ءَ بے توار بوت ۔ آئی ءَ وتی گرمیں دست باز رند ءَ پیشانیگ ءَ مشت ۔ پیشانی میچل اتگ ات۔ آئی ءَ کِت ات ءُ گوشت ۔ نوں۔۔۔ نوں من سگ ات نہ کناں ۔ گوش ئے زاناں ۔۔۔ گوشیگ ءَ منی گین پر نہ بیت من مراں ۔ جنین ءَ گنوک گنوکی وتی پچ درت انت ۔ ورناہ ءِ چم درگڑ ات انت ۔ دلبند سک چست ات۔ جنین ءِ نارگ گیش بوت انت ۔ آہ ۔۔۔۔۔ اُپ ۔۔۔۔ من چتو بہ کناں ۔۔۔۔؟
ریل پد ءَ راہ گپت ترندیں گوات ءِ شیکگانی ھمرائی ءَ یک رندے پد ءَ وشبوہ آتار ات انت ۔ ریل پُلے ءِ سر ءَ گوزگ ءَ ات ۔ برے برے کسان کسانیں لانچے گندگ بوت بلے انچوش گوش ئے زاناں اوشتاتگین دریا ءَ وپتگ۔ ورناہ بھہ ءُ بکڑ ات ۔ آئی ءَ پہ لج مک ات ءُ گوشت ۔ بانک ! بلکیں من تئی کمک ءَ کت بہ کناں ۔
جنین ءَ گوں پرشتگیں گالوارے ءَ پسو دات ۔ ھو۔۔۔۔ اگاں تو بہ لوٹ ئے ۔۔۔۔ تئی تورہ بار باں ۔۔۔۔ نوں اے سگگ ءِ ھد ءَ چہ ڈن انت ۔
ورناہ کونڈانی سر ءَ نشت ۔ جنین ءَ وھدے گوں دویں دستاں وتی گودان گپت ءُ آئی ءِ نیمگ ءَ برت انت ۔ گڑا شیرانی دْردے بتک ۔ ورناہ دیم ءَ کنزات ءُ چٹ ات انت ئے ۔ پد ءَ گودان ئے دپ ءَ کت ءُ گٹ گٹ ءَ شیراں نوشگ ءَ لگ ات ۔
آئی ءَ وتی ھر دو دست جنین ءِ سرین ءَ پتات انتءُ گٹ گٹ ءَ شیراں مچگ ءَ ات ۔
ساھتے ءَ رند جنین ءَ ناگت ءَ درائینت ۔ اے نیمگ ءَ بس انت نوں دومی نیمگ ءَ
ورناہ ءَ گوں شرپمندی ءَ دومی نیمگ ءِ گودان دپ ءَ کت ۔ جنین ءَ پہ بے ارادھی وتی دویں دست ورناہ ءِ پشت ءِ سر ءَ ایر کت انت ءُ تاھیر گران ءَ گرمیں ساہ کشگ ءَ لگ ات ۔ نوں آ نارنجانی وشبوھاں وشنود بوھان ات ۔ موسم چینچو دلکش انت ۔ آئی ءَ گوشت ۔ ورناہ ءَ ھچ نہ گوشت ۔ آ چو تنگے ءَ اے کدرتی چمگ ءَ نوشگ ءَ ات ۔ آئی ءَ پہ گیش وشنود بوگ ءِ ھاتر ءَ چم نز کت انت بلے جنین ءَ آ تیلانک دات ۔ نوں بس انت نوں من تاھیر گپت آں ۔۔۔۔ تو من ءَ نوکیں زندے بکشات ۔
ورناہ گوں آستونک ءَ دپ ءَ پھک کنان ءَ پاد اتک ۔ جنین ءَ وتی دلبندچیر دیان ءَ گوشت ۔ سک باز منتواراں واجہ ! من تئی تورہ باراں ۔
ورناہ ءَ گوں گلوتگی گالوارے ءَ گوشت۔ تورھاں وَ من تئی سرباراں بانک کہ دو روچ بیت من ھچ نہ وارتگ ات۔
