ابا کوٹو کے انت۔ جی ایم آزاد
ابا کوٹو کے انت
من وتی کوٹی ءِ تہ ءَ درستیں کتاب شنگ ءُ شانگ کتگ اتنت
برے اے کتاب ءَ بزور چو چیزے شوھاز کنگ ءِ وڑ ءَ تاکاں لیٹین برے آ کتاب ءَ من چو وت نہ زانت کہ منا چے پکار انت بلے منی شوھاز ءِ دروشم انچش ات کہ ھر کس ءَ بدستیں الم زانت ئے منی چیزے گار انت
من برے اے کتاب ءَ دست جن برے آئی چہ دگنیا ءَ بے سما اتوں
ابا اے کوٹو کئے انت ؟
منی لاڈوکیں چک ءِ شھدیں توار ءَ منی ھیال وتی نیمگ ءَ گور کت من چَک ترینت داں منی چک ءَ اسگر زھیر ءِ گونچان کتاب دست ءَ انت ءُ کتاب ءِ سر ءِ اکس ءِ سر ءَ دستے ایر کتگ جست ءَ انت
گوں گونچان ءِ گندگ ءَ منی چماں رژنے آؤرت گش ئے منی سرجمیں روچ ءِ شوھاز ءِ مز منا رست
من دست شھارت چہ زھگ ءِ دست ءَ کتاب زرت وتی دست ءَ کت ءُ گشت منی چک اے چشمکی ءَ گندئے اے چہ زانت ءُ زانگ ءَ چکاریں یک دربرجاھے
گوں منی گپ ءِ اشکنگ ءَ چک گش ئے چو نہ پھمگ ءِ وڑ ءَ پکر ءَ کپت
من پدا گشت منی چک اے اسکولے
ھھھھھھ ابا گشی کوٹو اسکولے ھھھھ ابا اے مردمے وا ھھھھھ ابا گشی اسکولے
گوں منی گپ ءِ اشکنگ ءَ چک سک کندگ ءَ لگت کنداں کندان ءَ انچو گشان بوت چہ کوٹی ءَ دراتک
من گونچان ءِ دپ پچ کت ءُ جیڑگ ءَ لگتاں کہ اے نا سرپدیں چک ءَ چوں سرپد بکن آں کہ اسکول دربرجاہ ھشکیں دیوال یا آھانی تہ ءِ کرسی ءُ ٹیبلاں نہ گش انت
ھرکس ءَ اسگر زھیر ونتگ ءُ ھر کس ءَ دیستگ ءُ ھرکس ءَ پھمتگ آ الم زانت کہ دربرجاہ ءِ مول ءُ مراد چے انت ءُ اسگر زھیر ءِ توک ءَ بود چے مان بلے ارمان کہ تو انگت کسان ءِ ءُ وانگ نہ زان ئے
گوں ھمے جیڑگاں من گونچان ءِ تاکاں لیٹینان اتوں منی چم زھیر ءِ آزمانک نیکو ءِ کلی ءَ کپت انت گڑا من گوں زھیر ءَ ھمراہ پدا چے دگنیا بے سما بوتاں
جے ایم آزاد
18/04/2017
