اتا شادءَ گوں دیوانے۔(دومی نبشتانک)بنگیجی بھر۔ اے آر داد
اتا شادءَ گوں دیوانے۔(دومی نبشتانک)
۔۔۔۔۔۔
بنگیجی بھر۔
۔۔۔
کروناءِ ھوپ ءِ ترس نہ کُٹّ اتگ ات کہ سر پدا شال ءَ کپت۔ شھدربرجاہ پہ استاداں پچ ات۔ من چُک نیاورتگ ات انت کہ آیانی دربرجاہ بند ات انت۔ نہ لوٹ ات ھم آدگہ ھزابےءِ دیمپان بہ بنت۔
سرجمیں شھدربرجاہ ءَ ابیتکی یے جان کشّگ ءَ ات بس۔ اینچو وانگ ءُ وپسگ ءَ مردم دل سیاہ بیت۔ اتاءَ چوشیں دیرو ( ٹھکانہ ) ئے نیست ات کہ گند ءُ نندے بہ بیت۔ ھوٹل ھم بند ات انت کہ کیفے ڈان ءَ بروان ءُ بہ گندان ئے ، کہ یک بیگاھے چاراں کسے منی کوٹی ءِ دروازگ ءَ جَنَگ ءَ انت۔ در کہ پچ کت چاراں اتا شات انت گوں شمس الدین شمس ءَ اوشتاتگ ءُ ھمے گوشگ ءَ انت ۔” تو یار ھم کمال کن ئے، کائے کالے ھم نہ کن ئے۔” من سر تئی دوھیں نمبر جتگ انت یکے ھم پچ نہ انت ۔”۔
” یار اے موبائل گوں من رَو نہ کن انت، باریں کجا کپنت ءُ گار بنت۔ من نوں ھمیش انت باندا سیماں بہ کشّان ءُ دگہ موبائلے بزیراں۔” ۔آدنیگا دروازگ ءِ دپ ءَ اوشتاتگ ات۔ ” بلے تو زان ئے مئے سر اے پلوءَچون کپتگ ۔ راست مئے سر کپتگ تئی ھلکءَ پہ ردی۔ من شمس زرتگ کہ بریں دشتیاری سباءَ چاریں کہ مدتے بیت من آئیءَنہ دیستگوں۔ یہ نہ تھی ہماری قسمت کہ وصالِ یار ھوتا۔ مارا ماما مری ءَ ھال داتگ کہ بلوچانی تہ ءَ بیدے ترا دگہ استاد کس نہ اتکگ۔”
” کجام مامامری ۔”
” یار ھمے کہ شمے استادانی دوار گس ءِ ڈکّ ءِ دپ ءَ اوشتاتگ۔ “
” بلے ،بلےمنءَ بچار کہ اینچو وھد بیت من اشی ءَ جست نہ کتگ تئی نام کے انت۔”۔
” من ھم اشی ءَ نزاناں اے شمس ءَ پیش کپت ءُ آئیءَ ماما مری گوشت۔ نام باید گرگ مہ بیت ۔ ماما مری پہ اشی ءِ زانگ ءَ بس انت۔”
” واجہ گڑا مامامری باز انت۔ اے نام ءَ گوں ھرکسی ھیال دگہ مردمے ءِ نیمگءَ روت۔”
بلّے روت۔ ما ھمے لوٹیں کہ کوھنیں ربیتی سسا یلہ کنگ بہ بنت کہ چیز یک ، مانا یک ، گیشوار یک ، باید انت مردم گار بہ بیت۔”
اینچک ءَ آ نشت انت۔ من آیاں آپ دات ءُ پُر دان اتاءِ دیمءَ ایر کت۔
” تو سر اَنچو گوشے نام گرگ مہ بیت ۔”
” بابا نام میں کیا رکھا ہے ۔ ساچشت وت نامے ، ازم وت نامے ، شئیر وت نامے۔ تئی ظفر علی ظفر چی گوشیت ۔ ” ما زباد ءُ رنگ ءُ بوءِ گپ جتگ
چو کے ءَ گوشتگ کہ تئی نامءَ گران ءَ اتکگیں ۔ ادءَ زباد ءُ رنگ ءُ بو وت نام انت۔ من ءَ گیر بیت آئیءَ یک رندے منءَ گوشتگ ات من اے شئیر ساحرءِ پسو ءَ نبشتگ کہ آئیءَ گوشتگ ات ۔” ما تئی نام ءَ گرانءَ اتکگیں ۔” گڑا من گوشتگ ات شئیرانی تہ ءَ کسے ءِ نام باید گرگ مہ بیت۔ ھرچی لبز انت، زبان انت ۔زبانءَ چہ آ دست راستی نیست۔ وٹگنسٹائن گوشیت ۔” منی دنیاءِ ھد داں ھمودءَ انت کہ اودءَ منی زبان ءِھد انت۔ راستی یا ھد یا مانا ھما انت کہ شئیرءِ تہ ءَ انت آئی ءَ جاگہ رستگ ۔” ( ادبی تھیوری ، قاسم یقوب ۔ تاکدیم 75)۔
اے گپّ ءَ ما چو گیشّینیں کہ ھرچی زبان ، شاعری یا نبشتانکےءِ تہ ءَ جاگہ کت نہ کنت ، آراستی نیست۔ بزاں وجود ندارد۔ یار اے مزنیں بنگپےبقول تئی ھاشمی سید ئیگ ءَ”
اتاءَ وتی سگریٹءِ پُر چنڈ ات ءُ کمیں بے توار بوت۔من جست کت سر شمارا چیزے گوں کہ من کسے ءَ کال بکناں۔
” نا ،نا، تو وت ءَ ھلاک مکن۔ یار شمس ھمے کجا بوت بیارئے کہ عدمءَ گوشتگ
سبو کو دور میں لاؤ بہار کے دن ہیں
ہمیں شراب پلاؤ بہار کے دن ہیں۔
داں اینچک ءَ شمس وتی آرتگیں پیلک ءَ بہ پٹ ایت من جست کت۔ ” سر من ڈبیءِ ماھیگ آورتگ ھمے شر انت کہ گوشت بہ گرائیناں۔
” نا،نا ،ماھی جوْان انت بلے تو یار کا ئے زِر شود نیارئے گوں ۔”
من بچکندان ءَ جست کت ۔ سر زِر شود چی یے۔”
” یار ھمے سوریں ماھی ، ھمیش انت نا زِر شود۔”
” تو سر زاناں پیش ءَ وارتگ ۔”
” کمالءِ گالبندے شمے دمگءَ کارمرد بیت۔”
” کجام سر۔”
” ھمے چی یے شما کَنگ ( دان ) ءَ کہ سوریں ماھی ءَ گوں گرادئے۔” ؟
” جی ، جی تو ھواری بٹ ءَ گوشگ ءَ ئے ۔”
” ھا،ھا،ھا ھمیش انت۔”
” تو سر کجا وارتگ ۔”
” من یک رندے گوں غوث بخش بیزنجو ءَ ایران ءَ کہ شتگ اتیں ، پدا چھبار ءَ مانتر ات ءُ گوادرءَ اتکیں ، سیٹھ لال بخش دادک ءَ مارا ھمے گوری سرگ گوں ھواری بٹ ءَ وارینتگ ات ۔ تو زان ئے من مرچی ھم ھمے لزت ءَ سما کناں ۔ بلے ادءَ نوں کجا رسیت ، اد ءَ کہ من جوائنٹ روڈءَ رواں گوریں ماھی بگراں چاراں اے ھر گورءَ ، گور ءِ کھانتہ ءَ بہا کنگ ءَ انت، ۔”
” کککککککک”
اتا ءَ وت ھم ٹھک دات ، داں اینچک ءَ شمس ءَ کدہ ٹھینتگ ات انت۔
ما گُٹے ، گُٹے گرگءَ پد سہیناں وتی سگریٹ روک کت انت۔