اِدءَ بِچار تراول انت
شائر: علیشاہ طاہر
۔۔۔۔۔۔۔۔۔۔۔۔۔
اِدءَ بِچار تراول انت
کدیءَ داں
نزاناں من
۔۔۔
منی گمانءَ اتکگئے
تہ مہ رو
ودار کن کہ آسمی ئیں پل درا بہ بنت
اِدءَ بچار
کسے اوں است بلبلاں گوانک جنت تہاریءَ
مَلاریءَ
کُدو ءَ آس جِنت ءُ گَار بِیت
اِدا بچار
زمینءِ ھنوشیءَ را سیل کن
کہ سرشپءَ آزمان وہدے سمبہیت
تہ بال کنت
چو کاگدءَ
کلندری ئیں جوگیانی پیمءَ بال کنت
ھاجتءِ کرامتی چی یے؟
کمار بوگءِ سحر کجامیءَ گوش انت؟
زمین بزانت
یا زمین زادگے
بلئے
وادار کن
کہ آزمان پدا ریچیت
داں رژناہی سرجمیءَ گار بیت
اِدءَ بچار
کہ چیدگاں وبایے گون
چڑکہاں ودار مان
توار مان
کہ دیدگانی زردیں پیالگءَ کمار مان
گڑا پدا ھمودا من
ءُ تو
یا زمانگےءِ شہار گیش گشاد بنت