اے موسمّاں چندن مِہر کَنگ ءَ بیت
چندن ساچ ءِ نامءَ
اے موسمّاں چندن مِہر کَنگ ءَ بیت
میرین نزر
منی مُدام کہ لبزانک وانگ ءِ ھُب ءُ واھگ ءَ سر چِست کُتگ، داں دیستگ ہمے کش ءُکِراں ماھتاک ،تاکبند ءُ ایندگہ کِتاب بوتگ اَنت کہ من آھاناں ونتگ۔چہ ہمے کِتاباں منی وانگ ءِ دوستیگیں پڑ آزمانک ، ناولءُ لچّہ بوتگنت۔ لہتیں سرھال بوتگنت کہ آھانی گِندگءَ گوں مردمءَ جیڑ اِتگ کہ کِسّہ کُجام رَنگ ءَ بوت کنت ءُ آئی ءِوانگ ءَ تاھیر رس اِتگ ءُ لہتیں نام بوتگنت کہ آھانی ساچِشتانی وانگءَ ماں لبزانک ءِ پڑءَ مہر ءُ واھگاں گیشتر سر چِست کُتگ۔ ہمے نامانی(ندّکارانی) تہا چندن تومنی لبزانکی دُنیا ءِاولی سرپءِ کارِستے بوتگ ئےِ کہ تئی وانگ ءَ دِل بودکاریت، تند بستگّیں ارواہ پدا تاھیر گیپت ءُ وتی سٹ ءُ دوراں بیت۔
“مہر بنی آدمءَ زِندگ کَنت۔”
اے گواچن ئےِ پدّر کُتگ ٹالسٹائی ءَ،بلے ہمے راستّی ءَ شیدائی، دیوانگّی، ھُدوناکی، تلوّسگ، چِنچو باز محکم ءُ توانا کننت کہ اے سِپّت اِنسان ءِ مہرءَ داں زِند ءِ گُڑی سیمسراں ھاٹیگ دَنت ءُ مَرگ ءَ پد ہم نمیرانیں کوش بکشاھیت ءُ ہمے لِبز اَنت کہ ترا زیباہ ئےِ کُتگ۔ ہمے سِپت، مہر ءُ واھگ، ھُدوناکی تئی ازِمی بالاد ءَ باز محکم ءُ توانا کنگ ءَ اَنت۔
چندن تئی لبزانکءَ گوں نزیکی سیادی ءُ مہرءِ بَرورد اِنت کہ ترا وانگءَ آں، ترا جیڑآں، تراھیال کناںءُگوں وتی لہتیں جُوڑینتگّیں لبزّاں ماں تاکاں نکش کناں۔”مُدام ترا کہ گِندآں یا واناں گُڈاں وتءَ جیڈآں۔”چواے گپّاں سماہ کُت کنئے کہ تئی گوں لبزانک ءَ مہرءِ سفرءَ اے ندّءَ را ھاٹیگ مان کُتگ ءُ اے زہن ءَ را بودِشت ئےِ داتگ ئےِ کہ ترا لبزانی براہ بہ کنت۔چندن من جزماں کہ منا ابید ہم کسے کہ لَبزانک وانّیتءُھاس تئی ساچِشتاں، یا نِبشتہ کنت گُڑاں آ پِگرے ءَ کپیت، تئی گِندگءَ گوں ، ترا وانگ ءَ گوں آ وتی اَندر ءِ مردءَ شوھازگ ءَ لگیت ءُ گُشیت ئےِ کہ تو اَنگت ءَ واب ئےِ یا مُرتگ ئےءُ سفر دیما روان کنت ءُ آ وتا سپرءِ پشت کپتگیں مُسافر گُمان کنت۔ ہمے لبزانکی واھگ ءُ ھُدوناکی آئی ءَ پدا پہ جُنزگ ءَ ھاٹیگ دَنت.
چندن تو زانئے لبزانک ءِ سپر ءَ وھدے من ایندِگہ نِبشتہ کارانی ساچشت ونتگ اَنت، دِل ءَ تاھیر گِپتگ۔ چیاکہ ھر کسی جِتائیں کِسہے،اَنچو تو ہم گوں وتی جِتائیں درشانداب ءَ دِلءَ ایر شُتگ ئےِ۔ بلے اَنگت کِسہّ اے نہ اِنت۔ کِسّہ تئ آزمانک ءُ لچہاں ابیدتئی دوئیں کِتابانی اِنت یکے”زِند کہ بیت لبزانک بیت” ،دومی” لبزانی گویاک” اَنت۔ چندن تئی جِتائیں دابے، نبیسگ ءِ ترزے کہ ہرکسی گورا اے بودِشت نیست اِنت۔ تئی ساچِشت نہ ایوکءَ پہ لبزّانک ءَ مڈی یے بلکنہ مہراں باریں زِرے کہ ما وانوک وتءَاوژناگی ءَ گِندیں ۔ چندن گُشئے ما ودارے ءَ بوتگیں ، بے ھاٹیگ، پژمردگ،دمبُرتگ بلے وھدے کہ تئی کِتاباں گوں مِہر برجاہ بوتگ ءُ ونتگ اَنت داں گُشئے ہمے ودار ءِ سر پرشتگ ءُ جان ءَ ھاٹیگ آھان بوتگ ءُ لبزانک ءِ سپر ءَ پدا رھادگ بوتگیں۔ اے تئی جِتائیں تہر اَنت کہ وانوک ءَ ہِمت دَنت۔
چندن پمیشکہ تو وت وتی کِتاب “لبزانی گویاک ” ءِ تہا گُشتگ کہ” لبزانک ءِ نِبشتہ کنگ ، گوں آئی ءَ مہر کنگ، سنگین بوئگ، لبزانک ءِ وہد دئیگ ءُ پدا صبر ءُ اوپار کنگ ارزانیں کارے نہ اِنت۔” (تاکدیم۔31)۔ ہمے گپ اِنت کہ تئی گوں لبزانک ءَ گیشیں مہر ءُ مارِشتاں ترا اے مقام داتگ چیاکہ تو گوں لبزانک ءَ اسلیں دروشم ءَ مِہر کنگ ءَ ئے ءُتئی ساچشت تئی مِہر ءِ چیدگ اَنت۔ تو چو ہم گُشتگ تاکدیم۔37 ءَ کہ “گوں وتی اِزم ءَ مہر بہ کن، مہر دریگاں وت پچ کنت۔” گُڈاں کمے بہ جیڑ کہ چُشیں مِہر اں تو سک آشناہ ئے، پمیشکہ تو زِندگ ئےِ ءُ اے مہرءِ موسماں ترا مُدام ساچِتگ ءُتو وتی اھدءِ اِزمکارے ئے۔اے موسم تئیگ اَنت۔ اے موسمّاں ہمے رَنگ ءَ مہر ءَ برجاہ دار۔ سلامتی
تئی مہر پہ لبزانک وانگ ءُ نبیسّگ ءَ سلامت باتنت۔
11 فروری، 2022
