راج ءِ دل ءِ ارمان بلوچستان آں من
منی ارزشت ءَ بزان بلوچستان آں من

کوروش بُنلاد اِنت منئیگ ءُ تی پجّار
پَٹّ ءُ پول بہ کن برو البرز ءَ چار
شھنامہ فردوسی ءِ گالاں گوش بہ دار
برات اِنت منی گیلان بلوچستان آں من
منی ارزشت ءَ بزان بلوچستان آں من

بیرجند ءُ کھنوج ءُ سیریک ساہ منی
جاسک ءُ زرّآباد ءُ بِنت ارواہ منی
زاھدان ءُ زابل اِنت لوگ جاہ منی
باسک اِنت منی کرمان بلوچستان آں من
منی ارزشت ءَ بزان بلوچستان آں من

نکش اِنت کِرد بلوچ شیرزالانی تی
مھرگَڑ شاھد نُھ ھزار سالانی تی
کوھیں کتیبہ اَنت گنجیں گالانی تی
مئیگ اِنت ھُرمزگان بلوچستان آں من
منی ارزشت ءَ بزان بلوچستان آں من

واش ءُ تپتان ءُ پھرگ منی پونز ءُ چم
گنجیں سراوان سربازءَمنی راست اِنت گوم
گِھ ءُ لاشار گوں کسر کند ءَ بنت اِنت سرجم
پہ چھبار ءَ کُربان بلوچستان آں من
منی ارزشت ءَ بزان بلوچستان آں من

نیمروز ءُ ھِلمند منی جِند ءِ جھگیر
شال کوٹ ءُ کیچ ءُ پنجگور دل ءِ تاھیر
سِند ءُ کلّرشانک ءِ من ءَ نئیل اَنت زھیر
داں ڈیرہ گازی کان بلوچستان آں من
منی ارزشت ءَ بزان بلوچستان آں من

چہ بازیں تیلانکاں درد ءُ دوراں من
سد جاہ ءَ چُنڈ چُند ءُ ٹَپّ ءُ ٹوراں من
ناتپاکی ءِ دست ءَ سکّ نزوراں من
درد ءُ گم ءِ دیمپان بلوچستان آں من
منی ارزشت ءَ بزان بلوچستان آں من

اے منی پنت ءُ سوج اِنت تو بوانءُدربَر
گوں وت براتءَمُدیکّی بہ بئے تو شیرءُشَکر
گُڑا دنیا تی گُلام بیت او جان ءُ جگر
راست گوش اِیت برجان بلوچستان آں من
منی ارزشت ءَ بزان بلوچستان آں من
راج ءِ دل ءِ ارمان بلوچستان آں من

بـرجـان بـلـوچ
پیشن